كل سنة و بنت رجيم بألف خير و الف صحة و سعادة
النهاردة انا نويت اعملكم مائدة العيد كل الاكلات الخاصة بعيد الاضحى علشان اى بنوتة تعمل الاكل لخطيبها او جوزها بأيدها و يا رب المائدة تعجبكم
يلا نبدأ
اولا :- طبق الفتة المصرية
المقادير:
كيلو و نص لحم ضاني مقطع
رغيفين عيش بلدي ناشف
2 كوب رز مصري
3 فصوص ثوم مفرومين
بصلة متوسطة
4 معالق سمنة
شعيرية
ملح و فلفل و حبهان (هيل) و مستكة و ورق لورا(غار) و قرفة (مسمار) و جوزة الطيب
الطريقة:
-نسلق اللحمة مع البصلة و التوابل و نملحها بعد ما تستوي
-نحط السمنة في قدر لحد ما تقدح و نحط الشعيرية لحد ما تتحمر و بعدين نضيف قليل من الثوم و نقلبه و نضيف الرز مباشرة و نقلبه حوالي 5 دقايق و نضيف عليه مرقة اللحمة لحد ما تغطي الرز و نملحه و نخليه يغلي و بعدين نهدي النار لحد ما يستوي
-نقطع العيش قطع متوسطة أو صغيرة
-نأخذ كوبين من مرقة اللحم و نغليهم مع باقي الثوم
-نحط العيش في طبق التقديم ( لازم يكون عميق شوية) و بعدين نسقيه بالمرقة شوية شوية لحد ما يبتدي يلين و بعدين نحط الرز فوق العيش
و نرص اللحم و ممكن نحمر اللحم في السمنة قبل ما نحطه
-نقدمها ساخنة
بألف هنا و شفا