يابنات اللي تبي تشارك في المسابقه (( تحذير )) من نظام دشتي

[غموض]

السلام عليكم ورحمة الله وبركاته

انا بصراحه من فتره مادخلت ويوم دخلت حصلت مسابقه الخاسره الاكبر

بصراحه تحمست وايا الموضوع وصرت اشوف رجيم بعض البنات في المسابقه

لفت انتباهي احد ردود العضوات انها راح تتبع نظام دشتي اللي هو نفسه نظام اتكنز

طبعا لفتني الاسم قلت بشوف خواص هالنظام قبل اتبعه يمكن تصير فيه اضرار

وفعلا صار مثل ماتوقعت

تجربه من وحده من عضوات منتدى اخر تحكي ضرر هذا الرجيم عليها وعلى غيرها ونقلت لكم ماقالته للإفاده

من فتره نزلت لكم موضوع عن نظام د / حسين دشتي وقلت لكم اني جربته مع الاهل عندي واني قدرت انزل من وزني وصار ان تسكر موضوعي بس بصراحه استمريت على النظام وبعدين وقفت عنه وبصراحه مالاحظت اي شي على ولاعلى اهلى بالعكس نزل وزني وترتب جسمي بعد وعشان جذي رديت اسويه مره ثانيه بس بالمره الثانيه وكانت تقريبا من شهر ونص او شهرين حسيت باعراض غريبه صارت معاي وعشان جذي نزلت هالموضوع عشان احذركم من هالنظام.

انا بديت النظام مع صديقتي باول الايام حسيت بصداع قوي ولا كان ينفع معاه ولا مسكن.. لابندول ولا بروفين والمشكله اني ماكنت انام من شدة الصداع وقوته وهذا اثر على بالدوام ولا كان لي نفس للشغل وكنت احس بالتعب وبالاجهاد بشكل كبير مع اني قبل لاابدي هالنظام كنت طبيعيه وعاديه ..هذي من نايحه...

من ناحيه ثانيه اثر هذا النظام على هرمونات جسمي بشكل كبير وهذا خوفني بصراحه بقولكم شلون..

الله يعزكم الدوره عندي منتظمه ومرات اتجي قبل موعدها بكم يوم وهذا شي طبيعي ...بس الشي مو طبيعي انها تجيني بالشهر مرتين!!يعني جاتي باول الشهر وبعدها باسبوعين اول اقل جاتني مره ثانيه ونزلت على بغزاره واستمرت معاي تقريبا 10 ايام وهذا سبب لى الصداع اللي قلت لكم عنه بالبدايه لان انا اصلا فيني انيميا ( فقر دم ) .

طبعا انا ما وقفت النظام وبعدين قلت اكيد انا فيني شي بس مو منه لكن لما سئلت صديقتي شصار معاها قالت لى نفس الاعراض اللي صارت معاي وخصوصا صادف ان جاتها الدوره معاي باول الشهر اللهم وحده نظفت قبل الثانيه بيوم واحد . يعني نظفنا تقريبا بيوم 6 و 7 مارس وفي يوم 17 نزلت مره ثانيه على انا اول وبعدها بيومين نزلت على صديقتي!!!

اهني بدينا ندور بانفسنا عن السبب وخصوصا احنا ماغيرنا شي ولا اكلنا شي غريب بس اللهم اتبعنا النظام مع بعض؟؟وهذا سبب لنا تغير بالهرومونات ونزل لنا الدوره مرتين بالشهر..

ومره من المرات وانا اتصفح المنتديات لفت انتباهي عنوان عندهم وصاحبة الموضوع تقول صارت ابحاث ( بصراحه ماثبت وين باي دوله بس اذكر انها دوله اوربيه ولا احتمال بامريكا) المهم صارت هالدراسه وتوصلوا لنتائج مخيفه وهي ان هذا الريجيم له تأثير على المستوى البعيد يعني بعد كم شهر من نسويه ونمشي عليه ومن هالنتائج:

في حالات وفاه كثيره من بين اللي مشوا على هالنظام وفي حالات جاتهم امراض خطيره ومزمنه ..

عشان جذي والله ثم والله انا بصراحه تحسفت اني نزلت لكم الموضوع الاول ولاني مدحته لكم وقلت لكم انه عجيب وخطير بس بصراحه ماكنت ادري عنه جذي.. ولما الاخت الينا قالت لي عنه ضار بالصحه ولما سكرت الموضوع بصراحه وعذرا للاخت الينا بصراحه زعلت وقلت ليش تسكره بس الحين انا والله مستانسه انها سكرته لى على الاقل ارتحت ان مافي احد طبق النظام.. بس بعد فتره صرت الاحظ وجود هالنظام بعناوين مختلفه..

يابنات بقولكم شي وانتوا والله مثل خواتي واحبكم كلكم

شالفايده نمشي على هالنظام ونتعب نفسنا وبالاخير نخسر صحتنا وحياتنا؟؟؟ احنا صج ودنا نضعف بس الضعف يبيله اراده قويه وبنفس الوقت نظام صحي فيه كل العناصر ومع اشويه رياضه..

هدفنا الاساسي تكون اجسامنا حلوه مو شرط نكون مثل عارضات الازياء يعني ودنا نلبس وتكون الملابس متناسقه ومناسبتنا بس الاهم من هذي كله نكون بصحتنا مو بعيد الشر واحنا تعبانين ونحس كانه شايلين الدنيا فوق راسنا ولا نحس كبرنا بالعمر 10 سنوات جدام..

يابنات نصيحه مني لاتتبعون هالنظام و لاتخسرون حياتكم عشان جم كيلو ولا عشان مناسبه عرس ولا حفله تخرج ولا عشان فستان ولا بدله..واصلا شالفايده تضعفون ويكون هذا على حساب حياتكم وصحتكم؟؟؟واذا كنتوا تبون تضعفون احس شي تقللون الاكل مع الرياضه والمشي اسهل رياضه والاهم من كل هذي الاراده والاستمرار ..او تتبعون نظام مدروس من المستشفى يكون خاص على حسب كل حاله وكل جسم.

وانا اقولكم ماراح يفيدنا الا الله ثم اكلنا المتوازن اللي يحتوي على جميع العناصر الغذائيه

بس يكفي اننا بدل صحن كامل نخففها لنصف صحن

وبدل الوجبات السريعه نسوي احنا اكلنا بايدنا نعرف فيه كم سعره نحط علشان يفيدنا

ويابنات احذركم ثم احذركم من تجويع انفسكم لانه بيصير نقمه عليكم اكثر من انه يفيدكم

لان التجويع راح يعطي تنبيهات للجسم باستقبال اي لقمه طعام وتخزينه في الجسم حتى لو كان شوي

لتفادي حاله الصيام اللي بتصيده مره ثانيه

اتمنى ان كلامي يفيدكم واتمنى انكم تشوفون الافضل لكم

وتبحثون في كل رجيم تبون تسوونه قبل تسوونه لان هذا الشي راح يفيد صحتكم قبل كل شي

وهذا هو هدف الرجيم من اساسه

كلام الاخت الفاضله نقلته لكم مثل ماقلت عن تجربه شخصيه منها

تقبلوا مروري

[امي الدنيا ومافيها]

بس حبيبتي ممكن يكون هي عندها خلل مع النظام نفسه يعني لا نطلع انظمة دكاترة هي الغلط بس
ونفس ما قلتي يجب تشخيص الحاله في الاول وعمل التحاليل اللازمة لكل انسان ولمعرفة الاثار الجانبية لكل نظام ممكن اتباعه

شكراً لموضوعكِ

[IDiet]

نظام الدكتور أتكنز ينزل الوزن ولكن الوزن يرجع اذا اكلتي كمية من الكربوهيدرات ولكن تخلتلف النظرية من شخص الاخر.

[غموض]

صح الغاليه يمكن هي عندها خلل ويمكن لا

لكن اخبر شفت برنامج عن نظام اتكنز واعتباره البروتينات هو اساس التنحيف وانزال الوزن

صح ان البروتين ينزل الوزن لكن كثره يسبب تعب شديد للكليه

لان البروتين يعتبر الاصعب من ناحيه الهضم هذا من ناحيه غير الاضرار اللي تكلموا عنها الناس في البرنامج

واكيد لو تسون بحث عليه بتلاقون ان ضرر هذا الرجيم اكثر من نفعه

ومثل ماقلت اساس الرجيم الطعام الصحي وليس الحرمان من بعض الاشياء المهمه

ارجو ان كل بنت تراعي هالشي في نفسها قبل تتخذ هذا الرجيم كملجا لها

وترى من خوفي عليكم اقولكم هذا الكلام وان شاء الله تسمعونه وتشوفون الاحسن لكم

دمتم بود

[(بوسى)]

بصراحة انا مشيت عليه اسبوعين ونزلت فيهم 5 كيلو بس الدورة جاتلى مرتين برضه بنفس الشهر وماكنتش متخيلة ان الرجيم السبب لانها انتظمت تانى الشهر اللى بعده بس كنت بطلت نظام دشتى
غير ان اللى خسيته زدته تانى فى يومين
انا حاليا على رجيم سعرات عادى

[بنتـ ابوها]

مشكوره اختي على التنبيه

[هــدوء الكــون]

مشكووووووووووووووووووورة على التنبية

والاكل الصحي والمتوزان احسن شي


وربي يحفظكم ويحفظنا من كل شر

[عبيرالورد]

انا بالنسبة لي مناسب لاني سبق وعملته ونزلت في شهرين 18 كيلو ولله الحمد انتظمت الدورة والربو انتهى مني ومفاصلي كذلك الاجسام تختلف من شخص الى اخر وشكرا على التنبيه

[honey]

ر بما هذه الأنظمة تفيد ذوي الأوزان المرتفعة جدا....و لا تناسب الأوزان القريبة من الطبيعي...
شكرا أختي على التنبيه...