أسلوب الحياة

تجنب زيادة الوزن في رمضان

النهارده هنتكلم عن تجنب زيادة الوزن في شهر رمضان الكريم, وخصوصاً في شهر رمضان كتير من الناس بتعمل عادات غلط بتخلي وزنهم يزيد فخلينا نعرف ايه هي العادات الي ممكن نعملها غلط في شهر رمضان اولها الحلويات كتير من الناس بتعمل قطايف او بسبوسه او هريسه …الخ في شهر رمضان ودي بيكون فيها نسبة سعرات حراريه عاليه بالاضافه للدهون عشان كده لازم نحاول نستبدلها بسلطة الفواكه ونحاول نغير طريقة التحضير يعني بدل ما نعمل القطايف مقليه الي فيها 350 سعره حراريه نخليها 150 سعره حراريه ونخليها مشويه ودي اول نقطه بالنسبه للحلويات, اما بالنسبه للعصائر دي كلها بتكون مليانه سكر خصوصاً العصائر الجاهزه فبنحاول نتجنبها ونتجه لعصائر الفواكه الطبيعيه ونقلل من السكر عشان كده بنحاول نستغني عنها بجزء من المياه المعدنيه.
اما بالنسبه للبطاطا والسندوسه …الخ ودي بتكون نسبة السعرات الحراريه فيها عاليه جداً لإن معظمها بتكون مقليه فبالتالي بتكون فيها نسبة سعرات حراريه عاليه ونسبة دهون مشبعه عاليه عشان كده لازم نقلل خالص من الاكلات دي ونحاول نستغني عنها لتجنب زيادة الوزن في شهر رمضان.
بالنسبه لزيت الزيتون كتير من الناس بتستخدمه وهو فعلاً مفيد جداً لكن بيكون فيه نسبة عاليه من السعرات الحراريه يعني معلقة من زيت الزيتون فيها 120 سعره حراريه فبنحاول نستخدمه بكميات معقوله في الطبخ والسلطه.
لا تتجنب السحور لإن السحور وجبه مهمه جداً لكن نكون ازكياء في تنويع الاكل الموجود في وجبة السحور ونحاول نركز علي الفواكه والخضار ونقلل من النشويات لإن قبل النوم زي ماحنا عارفين نسبة الحرق بتكون قليله جداً, كذلك لازم نشرب كتير من الميه بعد الفطار يعني بمعدل كوب من الماء كل ساعه.
اما بالنسبه للرياضه خلال شهر رمضان فلازم نتابع بممارسة الرياضه ولازم يكون الرياضه في مكان فيه تهويه معقوله مايكونش مكان مقفول او بمعني حر عشان مايفقدش السوائل من جسمنا وبالتالي ممكن يؤدي للجفاف, واحسن وقت لممارسة التمارين الرياضيه في شهر رمضان بيكون من نص ساعه لساعه قبل الفطار لان الفتره دي بيكون عندنا حرق كتير من الدهون وده بيساعد علي تخفيف الوزن وممكن نأجلها لبعد الفطار ولكن لازم نستني بعد الفطار من ساعتين لتلات ساعات عشان قبل كده بيكون الجسم مشغول بعملية الهضم, لازم نركز علي عدم ممارسة التمارين صباحاً في شهر رمضان لإن ده ممكن يؤدي الي انخفاض في سكر الدم ويؤدي الي الدوخه والعطش, واحسن انواع الرياضه في شهر رمضان هي الرياضات الخفيفه زي ( المشي – السباحه ) ونتجنب الرياضات الي محتاجه طاقه خصوصاً إذا مارسناها قبل الفطار زي كمال الاجسام دي تفضل تكون بعد الفطار وزي ما قلنا من ساعتين لتلات ساعات, وبكدا نكون لخصنا النقاط الي بيها نقدر نتجنب زيادة الوزن في شهر رمضان وازاي نمارس الرياضه في الشهر الكريم.

اظهر المزيد