قصه عشق بالدارجة تجمع بين الكوميديا والتراجيديا

المحتويات

نعم أنا مطلقة 

قصة عشق بالدارجة ؛درامية كتجمع بين الكوميديا و التراجيديا

الجزء الأول —> ~ رجل ليس ككل الذكور~

قصه عشق
من نهار طلقت ، كرهت الرجال و ما يجي منهم .. اللي يحاول يتقرب مني و لا يبغي يتعرف عليا ؛ كنزيد و نخليه .. كلهم ذياب و ما فيهم أمان 👿
مشيت ندوز الصيف في المغرب ؛ وماهامني حتى حاجة غير نرتاح من هم الغربة و نشبع من هالي و حبابي منها نحيد شوقي و منها نتناسى قرب الرجل !
عائلتي مجموعين كاملين؛ فرحانين بشوفتي والطابلة كانت عامرة ومتنوعة فحال الى كان نهار اللول ديال رمضان؛ كل ماتشهيت فيها؛ مع الكاس الثالث ديال أتاي بداو الملاحظات “سارا خاصك تزوجي منها تبعدي عليك الشبوهات وهضرت د الناس منها ضربي الحديد من حدو سخون غذا يكبر ولدك و يوقف لك في وجهك ميخليكش تزوجي .. بلا بلا بلا “
ما بغيتش و ما غاذيش نتزوج ؛ثلاث سنين وانا بوحدي ما ناقصني خير، جيت و لا مازال ؟؟؟ إلى بغيتوني نطول البركة معاكم ؛ سدو هاذ الموضوع .
حتى واحد فيهم ما عرف باللي ما كرهتش نكون متزوجة و هانية في حياتي حتى أنا وايني ماشي بإيدي ، منقدرش نرجع نثيق في شي راجل ..
واحد النهار ؛ خرجت أنا و مرت خالي ،بناتها و ولدي ؛مشينا الپارك أو إن أصح القول حديقة العشاق؛ تمشينا شوية و من بعد قررنا نبركو في قهوة ..
أنا: اينا قهوة كتعجبكم؟!(سولتهم و الإجابة عندي )
بنات خالي: اللي بغيتي 😉
عزلت قهوة خاوية من الناس و بالأخص من الرجال ، طلبنا شنو نشربو ؛ و بدينا النميمة : شكون تزوج شكون طلق شكون ولد شكون مات .. فرحانة و مستمتعة باللحظة !!
و في لحظة صمت و أنا كنشوف في الغادي و الجاي ؛ عينيا جاو في واحد المجموعة ديال دراري خمسة و لا ستة بيهم قاطعين طريق جيهتنا ..دورت وجهي و أنا كندعي في خاطري ياااااا ربي ميجيوش يبركو حدانا يااااا ربي 🙏🏻
مع هزيت راسي باش نشوف فين واش داخلين نفس القهوة ؛ عينيا جاو في عينين واحد من الصحاب 🙄دورت وجهي بالزربة ..
دخلو القهوة اللي حدانا حدرت راسي على التيليفون وايني وذني معاهم ، كنسمعهم كتشاورو على بلاصة ؟؟
دخلو حتى للداخل و رجعو خرجو بركو في التراس اللي مقابل معانا ..
الكراسة مقابلين معايا كنسمعهم كجرو فيهم باش يبركو ؛ رجعت هزيت عيني ما تجي غير في نفس الولد ..حتى هو كشوف فيا 😳
أووووووف دبا يحسابليه غير عجبني ؛ حتى انتي أ سارا كتجي تقاديها كتعميها ، آش داك تشوفي فيه يضبر راسو و يبرك فين ما بغا !
درت راسي كنشوف في التليفون ؛ وايني وذنيا معاهم كنحاول نسمع فاش كهضرو 🤔
مقدرتش ؛ صداع ديال الطوموبيل مخلانيش..
كشوف فيا ؟! و لا لا ؟! هزيت راسي و هضرت مع بنت خالي على أساس غاذي نسولها و أنا كنشير بإيديا باش نقدر نشوف جيهتو بلا ميعيق بيا 😒 وللمرة الثالثة لقيتو كشوف فيا ؛ ؛ وايني هاذ المرة ابتسم ابتسامة خفيفة ؛ لأنو حتى هو كقول لصحابو آه اه وكهضر معاهم ؛ متأكدة حتى هو .. بالو معايا ؛ رجعت شفت فيه لقيتو ملكشوفش فيا ؛ طيحت بزطامي في الأرض و جريت الكرسي و درت صداع و كنشوف فيه بجنب عيني و حسيت بيه كشوف فيا ؛ ابتسامة عرييضة رسمتها على و جهي بلا منشوف فيه .. 😬
صافي أ سارا ؛ بلاش من هاذ اللعب الباسل ؛
يالاه دوري وجهك و متبقايش تلفتي جيهتو
وهاذ الشي اللي درت .. واحد شوية شفت الساعة لقيت الوقت بدا يتأخر ؛ قلت لعائلتي ؛ يالاه نتمشاو شوية و ناخذو طاكسي و ندخلو ..
دخلت للداخل ديال القهوة خلصت ؛ ملي خرجت شفت جيهتو ؛ مبانش ليا 😳😳 ناري مشى ؟؟ بقى فيا الحال ؛ قلبت عليه بعينيا في كل مكان 😢
شفتووووو ؛ راه كتمشى مع صحابو وسط الپارك 👏🏼👏🏼👏🏼
زوين ؛ ماشاااااء الله ؛ وأنا فرحانة ؛ كملت طريقي و درت راسي مشفتوش 😎
وهو كيتمشى في نفس الاتجاه تخطى الناس و جاي لعندي ..
والله و يجي يهضر معايا حتى ندمو 😡 زعما معايا ولدي و مرة كبيرة ميحتارمش؟؟؟
تبعت ولدي ؛ جريت و بعدت : خفتو يجي يهضر معايا ..
لا مجاش لعندي .. مشى عند مرت خالي سولها ؛ وأنا حدوت راسي و بقيت بعيدة و كندير راسي كنلعب مع ولدي ؛ وكنسمع ليه شنو كيقول ليها 😱ً
هو: سمحي ليا أ خالتي ؛ بغيت غير العنوان ديال الدار ؛ راني والله ناوي المعقول 👍🏻
مرت خالي : مرحبا أ ولدي ..
هو : ترحب بيك الجنة ..
مرت خالي : وايني شكون في هاذ الجوجات ؟؟ الكبيرة و لا صغيرة ؟! (وشيرات ليه على بناتها)
هو : لا على هاذيك مولات الجلابة الصفرا ..
هي : أ ويلي هاذيك راها مزوجة و اللي معاها ولدها !!
أنا تفاجأت و قربت ..
هو: شافيا و قال: بصح ؟! و خاطرو باين مكسور 😟
مجاوبتوش و تأسفت ليه بعينيا و في خاطري كنقول : علاش ؟! علاش وصيت مرت خالي تقول للناس راني مزوجة ؟! علاش ☹️☹️☹️
مرت خالي لاحظت باللي معجبنيش الحال و قالت ليا : سارا بغيتي نرجع نقوليه ؟!
أنا : أ ويلي لا (كرامتي مسمحاتش ليا نقوليها ترجع تكلمو )
هو مشى ركب في طوموبيلتو و بقى كتسنى و يشوف جيهتي حتى ركبت في الطاكسي ؛ دزنا من حداه و عينيا مفارقوهش حتى بعدنا ..
قلبي حسيت بيه كيرعد و الحسرة كلاتني .. اصطنعت ضحكة وخلقت هضرة ؛ باش حتى حد ما يحس بشي حاجة و عننننننننننقت ولدي حتى وصلنا للدار .
غير دخلت نعست ولدي ؛ دوشت بالزربة و تخشيت في فراشي غمغمت عليا الليزار غير باش نفكر فيه على راحتي و في التفاصيل و شنو طرا ثانية ثانية ؛ رجل ليس ككل الذكور
حتى داني نعاس ..
فقت في الصباح ؛ روتينيات ..
وملي جلست نفطر و أنا كنفكر كيفاش ندير حتى نلقاه ..؟؟
في العشية ؛ لبست تمكيجت قاديت راسي ..وقلت نمشي لنفس البلاصة وايني هاذ المرة غِ مع البنات ، بلا ما ندي معايا شي حد يحرمها عليا 😬
مول الطاكسي : فين أ ختي ؟!
أنا : الپارك ؛ عافاك أ خويا ..
مول الطاكسي : هي للولا ، توكلنا على الله ..
الموسيقى خدامة.. وكنفكر في ألف حاجة و حاجة .. و في نص الطريق ..
أنا –> مريم (بنت خالي ) : شنو بان ليك نچلسو في شي قهوة على البحر ؟؟
مريم : اللي بغايتي ..
أنا : حسن ؛ يضربنا البرد شوية ..
أنا –> مول الطاكسي : خويا الله يعطيك استر ؛ الصابليت إلى جات على خاطرك ..
مول الطاكسي : الله يا ودي ..
آه بدلت رأيي و قلت بلاش ، إلى لقاني غاذي يقول مع راسو هاذي خفيفة و كتطير .. من الأحسن نخليها حتى الويكاند نفس نهار ، نفس الساعة و نفس البلاصة ..في الأول و الأخير إلى مكتاب نشوفو غاذي نشوفو ..
ليلة السبت ؛ طلبت من صحاباتي ديال الثانوية نتلاقاو في الپارك ..
الغذ ليه .. من 11 ديال الصباح و أنا كنوجد في راسي ؛ مشيت الحمام صايبت شعري ، ظفاري و حتى من جلابة شريت وحدة جديدة ..فرحاااانة و لأول مرة بعد ما طلقت حسيت براسي “امراة ” ..
وصلات 7 ديال العشية ؛ هزيت الطوموبيل ديال الدار ؛ حطيت أغنية : صدفة ومن بين كل الناس علقني ديال يارا و جهدت الصوت حتى اللخر ..وكنغاااني و معامني حتى حد وكل مرة كتكمل كنرجع نعاودها حتى وصلت ..
تلاقيت بصحاباتي قدام القهوة و تعانقناااااا حتى ضلوعي و ضلوعهم تطرطقو ..
دخلنا للقهوة ؛ يالاه فيها جوج ديال الناس ؛ يوپپيييي
بركت في نفس البلاصة و مرة مرة كنقلب بعينيا وصلات التسعة قل عشرين و مازال مجاش ..
وحنا خمسة ديال البنات ؛ كل مرة كجي واحد في شكل يحاول يهضر معانا ؛ وحتى واحد فيهم ما جذبني و لا وصلني الإحساس اللي وصلني ليه لاخر !
أنا : البنات يالاه نتحركو من هنا ..
البنات : آه ؛ نيت برزطونا هاذو كل مرة جاينا واحد يقدم راسو ..
بصح ثقال على الخاطر ، عيطت على السيرڤور ؛ خلصتو وبقينا نتسناو في واحد الساندريلا ترجع من الحمام ..
لبنى (أعز صديقاتي) : البنات اليوم غاذي ندوخ ليكم ؛ شوفو ، شوفو الولاد اللي قاطعين الطريق جيهتنا ؛ غير الزين على خوه ..
كلنا تلفتنا ..
حنان (أول وحدة نتفتها في الليسي) : والله لا تحركت ليكم من هنا ..
نسرين (قرات معايا في الكوليج) : حتى أنا بت نبت !
أنا : واها اللي بغيتو ..
كنهضر بشوية و دايرة راسي فحال إلى مهامنيش الأمر و في نفس الوقت كنحاول نتحكم في راسي ؛ قلبي كدق ألف في الدقيقة و كنحس بوجهي سخن ؟!!
وليت كنهضر بلا سوالات ؛ومتلفتش جيهتهم ..جاو بركو في الطابلة اللي حدانا ..
لمياء (بنت دربنا و الهبيلة ديال المجموعة ) راجعة من الحمام وكتهضر بجهد : يالاه تقلعو ؛ يا قلتو غاذيين ؟؟! شفتكم بركتو ؟! نوضو نوضو فيا الموت ديال الجوع ..بلا بلا بلا
معندهاش بوطونة ديال صطوپ ؛ قرستها و بركات ..والاولاد كنسمع فيهم كضحكو ..
هزيت فيهم عينيا ؛ كنقلب عليه .. وأخيرا شفتو ؛ وشافني وايني فيساع دور راسو ..؟
أووووف مال هذا ؟!
الغلطة ديالي أنا اللي جاية ؛ وواهمة راسي باللي غاذي يفرح بشوفتي ..إلى عاودت تلفت جيهتك ها وجهي ؛ ودبا هاك قفايا 😤
مبقيتش ديتها فيه ؛ واحد شوية جا اللي كيبيع كاوكاو ؛ عيطت ليه ؛ واحد من صحابو شدو هو اللول يشري من عندو ؛ملي خنزرت فيه ، قاليا : بلا متاكليني بعينيك ؛ راه غير بغيت نتأكد غاذي يبيع ليك حاجة مزيانة 😁✋🏻
ضحكت و ملي شفت فيه هو دورت وجهي و أنا مغوبشة ؛ يالاه أني رجعت ليه تخنزيرتو ؛ أااااهه
أنا—>البنات : نخليكم دبا ؛ نتشاوفو غذا إن شاء الله
البنات: خليك معانا أ صاحبتي ؛ عيقتي مازال حتى ما شبعنا معاك تقرقيب الناب 😬
أنا : لا غ سمحوليا ؛ را خليت ولدي في الدار !
سلمت عليهم و مشيت ؛ وكنحس بعيون دراري كاملين متبعيني .. متلفتش جيهتهم ، ديماريت الطوموبيل و مشيت لا كورنيش .. كنت محتاجة نهرب و نبقى شوية وحدي ونفهم مالي ؟؟ ماشي على أساس باقا كنبغي طليقي ؟! على أساس عمرني باقا نشوف في شي راجل آخر ؟؟؟
غير وصلت هبطت و بقيت كنتمشى و بالي كلو معاه .. 😕
علاش هو و ماشي شي حد ثاني؟! وماشي حتى شي زين اللي غاذي نقولو عليها وحل ليا في بالي ..
شوية حسيت ب يد شداتني من ذراعي ..
أووووو هذا هو ؛’، تبعني ..يعني مهتم بيا 😍😍😍
كيفاش تجرأ و تبعني ؟!! يا حمار يا ديوثي معندوش كرامة .. ماشي على أساس أنا امراة متزوجة و بولدي ؟؟؟
هو : حنززي فيا مزيان .. قولي ليا علاش كتقلبي ؟علاش جيتي للقهوة ! راجلك مكتحتارميهش؟! ممربياش؟!
واخا ماماك باينة فيها امراة الله يعمرها دار ..
بقى كهضر ول ول ول ول بلا مايحبس ..
نثرت يدي منو و خرجت فيه مزيان عينيا واخا لداخل ديالي لاعب حماداموس بالفرحة ..
أنا : أولا شكون أنت ؟؟؟!هو : بصاااح معرفتينيش؟! و انتي نهار و ماطال تشوفي فيا بنص عين ..معندكش علاش تحشمي ؟! راك زعمة مزوجة و بولدك ! و زيداها جاية بالليل البحر ..بازليك .. مكتخافيش ؟!
أنا : أووو أووو أووو ، حدك تماك ؛ اللي يسمعك تهضر هاكذا يحساب ليه بابا ! وزايدون مدخلكش فيا الله .. وانت يا ثقي ؟! آش اللي مخرجك حتى أنت في نصاصات الليل؟!
هو (كتمتم و يقلب على الهضرة ) : أنا ديما و را العشا كنتلاقى مع صحابي وعادي جدا معنديش المراة اللي ..
شوفي انتي الى معندكش ثانيا( وكعيب فيا) تحركي دخلي لداركم ..
وصلنا للطوموبيلاتنا ..
هو: في أمان الله
أنا : الإيمان عندك داير ليه الميزاجور 😬
خنزر فيا و بقيت واقفة مخرجا فيه عينيا .. وكنقول في خاطري ؟! أوووو سارا ؛ في طبعك متمردة ؛ علاش تبعتيه و سمعتي ليه ؟؟!
هو: يالاه ديماري بلا متبقاي تمسكني ؛ غاذي نوصلك حتى للدار ..
أنا (من شرجم ديال الطوموبيل ) : بلا حكام ديالك متهرسش ليا راسي عافاك ..
هو: غ بقاي تنچرزي ؛ وراك وراك حتى توصلي ..
دورت وجهي كسيريت و أنا ميتة بالفرحة ؛يا ربييييييي فيه شي حاجة عمرني شفتها ف شي حد آخر ؟!! ا
أسلوب ديالو عصبيتو شوفتو ..أووووه سارا زيدي زيدي راه مكاين والو من هاذ الشي .. خرجو عليك الأفلام الرومانسية !
خدمت الأغنية ديال أسماء المنور ؛ صافي يا صافي سكت حتى كلمة صافي ..كنغني و نمايل في راسي !
وصل عليا لسطوپ ؛ هبطت الزاجة باش توصلو الأغنية !
وهو يخدم القرآن و جهد فيه ؛ تلفت فيه قاليا پففففف
حشمت ؛ وكسيريت .. وخذيت طريق أخرى مغاذياش للدار و غاذي ندير غ اللي فراسي ..يالاه 😤
كنشوف فيه من الريطروڤيزور كدير ليا “ليفار” باش نتقل !
وموقفتش ..😈 خليك باغي تبعني يالاه تبع !
بغيتو غير يتودر ؛ والو .. ملي وقفت في الضو حمر وجا جنبي ؛ متلفتش فيه بغيت نقلي ليه دمو هو اللي وصلني لهاذ الحالة 🤒 وماعارفش شنو داير فيا !
تمرد امرأة و غرور رجل ..
بقيت مجرجراه من درب لدرب .. واحد شويا غبر مبقيتش كنشوفو ورايا !
أوووووف ؛ تودر بصح .. 😕😕 ثقلت في السرعة و بقيت غاذية غير بشوية .. واحد شوية خرج قدامي !!
جن هذا ؟! بلوكا ليا الطوموبيل و نزل جا لعندي ..
هو: مبغيتيش تدخلي للدار ؟!
أنا : شنووو مسمعتش ؟!
دخل راسو من الشرجم و سكت الطوموبيل ..
واش مبغيتيش تدخلي لداركم ؟!
أنا : ندخل نخرج سوقي هذا !
هو : اممممم حتى أنا معندي مايدار ؛غ الصيف هذا .. غير هو وكان شوفي ليصونص راه ككلينيوطي ! .. ومشى
أنا : دارها بيا معارفاش حتى واش طوموبيل مازوط و لا يصونص حسن ندخل للدار .. واخا باقية فيها شي بركة 😄
وصلت للدار ؛ حليت الباب .. دخلت شعلت الضو تسنيت حتى ديمارا و رجعت خرجت ؛ تبعتو .. من بعيد !
ساكن قريب ليا ؛ في الڤيلات ديال لاكولين 💃🏻💃🏻💃🏻

 

المهم ..عمرك تلف ليا !

رجل ليس ككل الذكور 2

وصلت للدار،دخلت كنتسلت وصلات الوحدة،عشرين مكالمة
وخمسة الميساجات؛ أووووف شكون؟؟
حيدت جلابتي مسحت مكياجي و تخشيت في فراشي حدى ولدي اللي ناعس في بلاصتي
تغمغمت بالليزار وبديت نقرا في الميساجات!
ميساج1 نسرين :”سارا غير انتي ديماريتي،واحد من الاولاد مشى يجري ركب فطموبيلتو؟ عيطي ليا ضروري ملي تقراي الميساج”
ميساج2لبنى:”سارا مالكي غير حتى طرتي؟! بتذاكري من ورانا أ العفريتة”
ميساج3لبنى:”وانتي جاوبي في التلفون”
ميساج4لبنى:”وااا الزعترة منعسش حتى تجاوبي”
ميساج5:ميديتيل تهديكم رصيد مضاعف؛ابتداءا…..
شعلت الضو تصورت و رجعت لبلاصتي
الجواب على الميساجات :سيلفي حدا ولدي..
وانا كنفكر فيه، عاودت شنو طرا بتفصيل والتدقيق،صورتو متنساش ليا,ماشاء الله الخالق،حتى وهو معصب زوين.. شنو غادي تكون سميتو؟؟فاش غادي اكون خدام؟ شنو عجبو فيا؟؟ المهم الى كانت عاجباه فيا شي حاجة دبا يبدل رأيو😳
كيفاش قاليا ساراا منين جاب سميتي؟؟ عندااك يكون كعرفني ولا سول عليا شي حد؟؟
و بقيت كنفكر حتى نعست على ريحتو اللي بقات لاصقة ليا فذراعي.
فقت في الصباح .. روتينات ؛ وجدت راسي وخديت ولدي البحر ( الزيمر بيتش ؛ بلاصا بريفي .. وكلشي محضي ..غفل عينك بقات ، حتى حاجة مكتطير ) كنت كنلعب معاه ؛ وهو يجي عندي ولد ؛ وجهو مغريبش عليا ..
هو :ماشي هي انتي ..؟! اللي كنتي باركة حدانا فالقهوة ؟؟!
أنا : كيفاش ؟؟
هو : أنا أمين اللي كونطرولا ليك الكاوكاو البارح قبل متاكليه
أنا : و دابا كونطرولي الطريق لي تردك عندو
أمين: أ مالكي أختي باغيا تضاربي؟؟
دورت وجهي وتكيت في الرولاكس ديالي… ولدي كلعب حدايا
واحد شوية جاب الرولاكس ديالو وقرب حدايا!
شفت فيه شوفا ناقصة
أمين:حتى أنا مخلص فحالي فحالك غير خنزري حتى تشبعي…هههه
ولدي مشى لعندو يلعب معاه خليتوو و بقيت حاضياه بجنب عيني
أمين:والله الوْلِيد مربي حسن منك..
انا:على اساس انت اللي ربيتيه؟؟ ياك؟؟
أمين بدا كهضر مع ولدي :فين هيا ماماك؛حشومة عليها خلاتك مع هاد العيشورية غادي تخرج عليك!
جريت ولدي عندي وبقيت كنلعب معاه في الرملة…
حتى صونا ليه التيليفون،بقى واقف قريب ليا
امين:الو، وافينك من صباح ونا نعيط لا انت لا مهدي كتجاوبو، جيو انا فالزيمر بيتش…
كان عاطيني بالضهر و انا نوض نجري…مستحيل نخليه يشوفني بكسوة قصيرة… لا لا لا
مشيت للدار…عيطت لصحاباتي باش نتشاوفو ورا لعشا،وقلت ليهم لولاد ديال لبارح هاديك بلاصتهم.. كاملين جايات .. يوبييييي مع التسعة ونص تلاقينا .. في بليصتنا ، شوية جاو دراري الا اللي مدوخني؟؟؟ علاش مجاش؟؟حيت عرفني ساكنة فحي شعبي؟؟ ولا مريض؟؟ ولا مبقاش باغي يشوفني؟ دازت نص ساعة أخرى ومازال مبانش.. فهمت كاينة شحاجة؟؟!
هزيت طموبيل ومشيت حدا دارو.. طومبيلتو كاينة؟؟ بقيت حدا الباب شي نص ساعة بغيت غير نشوفو.. والو مخرجش!
بديت كنحس براسي كتزير عليا و نفسي كضيق ؟
رجعت للدار،مبغيت نهضر مع حتى شي واحد نعست حدا ولدي وخاطري مكسورة!
في صباح قررت نسافر جوج سيمانات مشيت لمراكش اكادير وصويرة وانا في هاذ الوقت كامل كنحاول نتناساه و طلع العكس وليت كنفكر فيه نون سطوب… سارا كتبغيه؟؟ هاذي ما فيهاش شك!
بعدت على الضجيج خديت وقتي مع راسي فكرت في كلشي،وعرفت باللي خاصني نتعلم من أخطائي،وأنا مزاال صغيرة علاش منعاودش حياتي؟! شنو فيها نعطي راسي فرصة ؟! بلاك ننجح في زواجي هاذ المرة ؟؟
ويلا كان على طليقي ؟! و ردت فعلو ؟! علاش هو حشم ملي نهار خرج الطلاق نهار تزوج؟!
إوا حتى انا غادي ندير جميع الفرص من جيهتي باش ناخد واحد مزيان يحتارمني وصوني ويبقى حدايا طولت لعمر بحال جدي وجدة (أماحتى والديا منقدرش نضرب بيهم المثال)
ارتاحيت نفسيا قاديت أفكاري فكل نهار داز ؛ حتى وصل نهار العاشر ..وقررت نرجع وندير المستحيل باش نكسب قلبو… كيف ما كان الحال باينة فيه ولد الناس !! و حتى الى ماكانش هكذاك ، قلبي بغاه ..شنو مازال نقدر ندير ؟!
خديت الكار ورجعت آه رجعت للمحمدية، رجعت نشوفو ونهضر معاه معندي علاش نضيع الوقت، بقات ليا غ ثلاثة د سيمانات ونرجع لفرنسا…
وصلت المحمدية صباح بكري رتاحيت وفي العشيةغ نمشي نتسناه فالقهوة..حتى يجي عيطت لبنات قالو خارجين معروضات ،مشيت بوحدي وخديت طابلة
غير جا عندي السيرفور سولتو عليهم ؟؟
قاليا باقين كجيو و واحد منهم سول عليا!طرت بالفرحة..
ونا كنتسنى ،تلاقيت بأحد أصدقائي القدام اللي أنا وياه كنا ديما على اتصال في الفايسبوك ..
شافني و جا يجري يسلم !!
أهلااان سارا كيف دايرا؟! لا باس عليك ؟!؟ آش كتعاودي كلشي مزيان؟؟!
أنا: عبد العظيييم ؟؟الحمدالله ونت فين شادها؟!
عبد العظيم:يمكن ليا نبرك معاك شويا ولا كتسناي فشي حد؟!
انا:لا.. بغيت نقول اه يعني تقدر، عافاك !
وبدينا..بلا بلا بلا
حتى جاو اللي كنت كنتسناهم..امين وصحابو..
شفتو عايني بقاو غير كدورو؟نشوف فيه ولا لا؟ ندير راسي ممسوقاش ليه؟ قلبي بدا كدق زدت تاكدت باللي كنموت عليه!
نسيت لولد اللي معايا،هو كهضر وانا كنشوف فيه .. بعينيا و عقلي ممعاهش بالمرة .. وكنفكر باللي نهار على نهار كنزيد نبغيه…
عبد العظيم إستأذن و مشى للحمام ..
واحد شوية آمين هضر بجهد من بلاصتو .. قاليا:كيف داير جاد(على ولدي) علمتيه التاعيشوريت ولا مازال ا؟! متلفتش جيهتو؟ وحابسة ضحكة والفرحة بشوفت لاخور!
آمين : مرة مرة كنفكر فيك،بالكسيوة اللي كنتي لابسة فالبحر 😍 يا سلاااااام..
نضت بجهد وقلت ليه:ممربيش انت
ولاخور:بقا كشوف فينا
امين:والله وكون محشمت حتى…
هو شدو من يدو و قال ليه :حشم أ صاحبي را معها راجلها ،عييب !
انا حرة ديال راسي،ممرت حد..(وكنشوف فيه،كليتو بعينيا)
أمين: اصاحبي غير ضحكنا معاها هجراتو لينا؟
مشيت و ما خلصتش حتى العصير ديالي… وجا ورايا … يجري
هو: سارا تسناي،سارا سارا ركبت ودرت السيكيريتي البيبان ومشيت..مغديش نديماري فيساع غادي نتعطل باش يوصل عليا ويلقاني…😉
مشيت و وقفت في الضو الاحمر و هو يهبط زاجة ديال طوموبيلتو و كشير ليا بإيديه
قاليا متدخليش للدار خمسة دقايق نهضر معاك ودخلي… وفي لبلاصة اللي تختاري؟؟
انا:قلت ليه اه براصي
سبقتو وهو جاي ورايا حتى وصلنا لبحر نزلت:سطاسيونا و جاني ..بديت كنقفقف شنو غادي نقوليه؟؟!
وكيفاش غادي تكون ردة الفعل ديالو ملي يعرف الولد ولدي؟؟!
هو: سارة بصح ممزوجاش؟؟
انا:السلام، سميتي ساررا(ورك على الراء)
هو: عليكم السلام،سمحي ليا..و حتى انا سميتي أشرف … أ ساررااا (باستهزاء) مزوجة ولا ممزوجاش؟؟
أنا: كندور فعينيا وكنقلي ليه أعصابو
أشرف: عافاك هضري قولي الصراحة؟؟!
أنا: ويلا كنت كنت مزوجة آش غادي يطرا يلاه؟؟!
أشرف:غادي نمشي ونخليك،ومعندي لاش نزيد نهضر معاك ؟؟؟
أنا؛وتخليني بوحدي؟؟
أشرف:ودبري راسك… خليه هو يحضيك ويخاف عليك😤
أنا:وعلاش هاديك المرة،بقيتي حتت دخلتيني لدارنا؟؟
أشرف: هاديك لمرة مكنتش عارف اشكندير..
أنا:عليها مجيتيش لغد ليه لقهوة؟؟
اشرف: جاوبييييييني 😡😡😡
أنا:مطلقة! 🙈🙈🙈
أشرف:يا االللللللله… الحمدالله(دور ضهرو على بالو قالها فخاطرو و لكن راني سمعتو🙄 )
أنا: وعندي ولد ،هاداك اللي شفتي معايا أول مرة
أشرف:زوين تبارك الله.. وايني علاش ماماك قالت ليا مزوجة؟؟؟؟
انا:ماشي ماما هاديك .مرت خالي.. وانا اللي محرشاها،على الناس كاملين..
أشرف:اييه وفين كنتي هاد الايام كاملة ؟! مشيت ألف مرة حدا داركم وبقيت واقف سوايع مكنتيش تماك ؟؟
أنا:ملي تقول ليا انت علاش هداك نهار مجيتيش؟!
اشرف:كيف درتي ليها؟ بغيتي تغرقيني مع امراة مزوجة؟؟ كنت كنتهرب منشوفكش على اساس شنو قالت ليا مرت خالك ؟!
أنا:عليها سولتي السيرڤور عليا؟؟أ متناقض مع راسك ..
أشرف:اشمن سيرفور؟؟
أنا:ديال القهوة اللي كنبرك فيها؟؟
أشرف: لا والله ما انا
انا:وعلاش جيتي حدا بابنا؟؟ياك انا مزوجة؟؟
اشرف: مكنتش غادي نهضر معاك..غي نشبع شوفة منك .. حيث لقيت راسي كنقلب عليك.. وانتي فين كنتي غابرة؟؟
أنا:سافرت … حتى انا بغيت نهههر…
أشرف:وعلاش يا بنت الناس ياك بغيت نجي لداركم من الباب؟؟ فاش غلطت ولا فاش قصرت معاك ؟؟ معجبتكش؟؟
أنا: لا ماشي هكذاك… أنا مطلقة وعندي ولد وخفت من ردت الفعل ديالك… وأصلا كنت مواعدة راسي منزيد نهضر حتى مع شي واحد، و أنت مخليتي ليا فين نهضر ملي جيتي وطلبتي العنوان ديال دارنا… حاجة ميتقبلهاش العقل … واش كتعرفني؟؟ فايت شايفني؟؟
أشرف:اول مرة نتصادف معاك هداك نهار تلاقيتك وانا جاي عند صحابي.. كنت وراك وعجبتيني كيفاش كتهضري حلوة .. حتى لقيت راسي تبعتك حتى القهوة ..🙄
أنا :يعني شفتيني قبل منكلسو فالقهوة؟؟
اشرف: اااه.. وصحابي كانو باركين في قهوة واحد اخرى وقلت ليهم نبدلو..
أنا:فعايلك ديال ديما ولا اول مرة؟ الا قلتي اول مرة غادي يكون صعيب نصدقك…ويمكن مستحيل!!
أشرف:لا ماشي اول مرة!!
أنا :يالاه نمشيو تعطلت!!
حسيت بواحد ديقة ديال لغيرة افففف
أشرف:تفضلي نبداو بالكذوب
أنا: لا عندك الحق… وشنو يضمن ليا مكتكدبش وباغي تفلا؟؟
أشرف:يا لهبيلة لو كان بغيت نتفلى منهضرش مع مرت خالك ونقوليها عطيني العنوان
أنا: اييييه وشحال من وحدة خطبتي حتال دابا؟؟
أشرف :نتي اول وحدة نطلب لعنوان ديالها!لاخرين كنت كنطلب نوامرهم نتعرف عليهم..
أنا: سبحاااااان الهادي!
أشرف:والله أ سارا… كنت كنعيط ليها كتقولي فين غادي نتعاشاو ولا فين غادي نسهرو … مكيخدوش حتا لوقت فين يتعرفو عليا 😡
أنا: وأنا فين ناوي تسهرني اليوم؟؟
أشرف:مع نجوم دابا تشوفي 😡😡😡 وقبل من هادوك لطلبت نوامرهم كنت مصاحب مع وحدة ثلات سنين… وايني كنت ممزيانش معاها كانت كتموت عليا وانا مكنتش باغي نتزوج… نهار سمعتها تزوجات طاحت عليا الدنيا؛عرفت راسي كنبغيها! ومن وراها وليت كنشرب بزاف و حاضي غير الملاهي والبنات و تلاهيت على قرايتي..وليت كنتفلا بزاف ، دابا ولات عندي اتنين وثلاتين عام… خاصني ندير داري و وليداتي ونفرح واليديا،انا هو لكبير فخوتي..😬
وأنا من الهضرة كاملة اللي قاليا شديت في:لقيت راسي كنبغيها 😔
مالكي سكتي؟؟ ياكما خلعتك؟؟ را عفا الله عما سلف ،والله عامين محطيت شي قطرة ديال شراب في فمي..
أنا:مزال كتبغبها؟ عيني فكسيتهم فيه باش نحاول نعرف واش غاذي يكذب ولا غاذي يقول الصراحة
أشرف:غادي نكذب عليك إلى قلت ليك لا و إلى قلت ليك اه.. يعني هي ثلاثة د سنين وحنا مع بعضياتنا،ضروري باقة شي بركة ههه.. 😁
أنا: سبحان الله حتا أنا نفس الاحساس مع راجلي بغيت نقول طليقي سبع سنين ماشي ساهلة تنساها فيساع وحنا مزال كنا فالحلال و في وجه بعضياتنا صباح و عشية و ليل ، طبعا فهمتي قصدي ..زيادة على هاذ الشي سافرنا وتقاسمنا بزاف دياا الحوايج.. إن أصح التعبير ماشي بركة ؛ الللللللللهم بارك ..
قاطعني وقال
أشرف:يله تعطل عليك الحال…
وأنا في خاطري يلاه خود حسيتي بشنو طرا فيا وأنت كتعاود ليا عليها بكل برودة ، إيوا شرب ليك دبا شي إيترو وربع ديال كوكا يالاه تعدل ليك درجة الحرارة ..متأكدة كبخ دمو.
أشرف: خلي ليا نمرتك.. نتصل بيك شي مرة
أنا:شي مرة؟؟ (أاكدت بلي مزال متسرطات ليه)
أشرف: إلى بغيتي..🙄
انا: وخلي هاديك المرة نهار تتلاثاو بالصدفة، وعرض عليا نشربو كاس ديال اتاي على حسابي..
اشرف:نقدر نكون مشغول مع الخدمة منضمنش ليك نتلاقاو بصدفة
أنا : اللي يضمن ليا تعيط ليا شي نهار يضمن ليك نتلاقاك صدفة!
تمشينا وحنا ساكتين…حتا وصلنا للطوموبيلاتنا…
انا:تصبح على خيير
أشرف:في أمان الله..
أنا :عنداك بكثرت تخمام فيها تسهى على طريق رد بالك 😈
أشرف:وعنداك حتى أنتي من كترت متوحشيه تسهاي 😈 راني قلبت عليك المواجيع والذكريات … غادي نبقا وراك حتا توصلي..
انا: لا سير قدامي لا تولي داخل فيا، راك حفظتي طريق!
وصلت للدار وهو قدامي… غير طلعت كسيرا..
يالاه مشية بلا رجعة.. مخاصمة معاه وفي نفس لوقت فرحانة.. كيف ما كنت كنتصورو عندو شخصية كتعمي وليت كنشك واش بصح زوين ولا غير فعينيا زيان؟
وليت نخاف نفيق .. غير كصبح عليا الحال كجوني شي افكار: غييير الله يستر..
وبالفعل لغد ليه فقت وأنا مصممة نتقم منو:شي نهار نعيط ليك نانانانا بلاتي غادي تولي تعيط ليا ونت حدايا…جنس متكبر!!
دخلت الفايسبوك،هضرت مع صديقي كان كقرا معايا فسانتر حتى هو مطلق الزغبي… بديت كندردش انا وياه وقلت ليه :
أنا:كريم نتشاوفو غدا الى بغيتي راني في المغرب(عزلتو حيت هو مچلدم وطويل وكتهلا فراسو) جيب معاك صحابك وحتا صحاباتهم غادي تكون معايا صحبتي و مجاتش نكونو غيير انا وياك 🙄
كريم:واخا بالفرحات علينا ؛ رسلي ليا مساج في هاذ النمرة 06********
انا: يلاه نخليك ، نتشاوفو في قهوة لا بلاص فيغت اللي في البارك مع جوايه التسعة ونص
كريم:انشاء الله…
من بعد عيطت لبنى صحبتي وتشاوفنا وعاودت ليها القصة كاملة وبالتفاصيل المملة..من بعد مشينا لصالون لحلاقة عند مرات خالي وصبغت شعري من كحل لبني فاتح ،شريت عدسات رمادي فاتح بدلت اللوك ديالي حتى من جلابتي كنت حاطاها تخيط مشيت جبتها ، في الغوز ومع التبديل جيت كنهبل 💃🏻💃🏻💃🏻 وقتها كون قلتو ليا هيفاء وهبي نقوليكم متبانش حدايا هههه (الحب كرد الثقة في نفسك اللي طلاق دمرها ليك)
لبست ووجدت راسي مع الاسف اليوم معنديش طموبيل ..
خديت طاكسي انا ولبنى هزيت سي دي معايا وهبطنا بعاد على البارك،بقينا نتمشاو حتى وصلنا… غييير وصلت لقيتهم تماااااااك أشرف وصحابو كلهم كشوفو فياااا 🙄🙄🙄
بركت خديت براد اتاي بينما وصل كريم وصحابو (قبل ميجي قلت ليه دير راسك شفتيني غيير بصدفة صاحبتي قاتلي نخرجو غييير بنات بناتنا و مبغيتهاش تقلق مني)
السهرة باينة طويلة!!
جا عندي امين قاليا : السلام
أنا: وعليكم سلام…. خبار الخيير؟؟
أمين:لا ؛كلشي خيير.. سمحي ليا هداك نهار غلطت معاك مكانش قصدي
أنا:مكاين حتى مشكل
أمين:نقدر نبرك زوج دقايق؟
أنا:مرحبا زوج دقايق أها؟؟
نقدم ليك صحبتي لبنى أعز صديقة عندي وبمعنى اخر إلى بغيتي هاد طابلة تقلب عليك غلط معاها 😁
أمين: متشرفين الأخت لبنى ، أنا أمين😁
لا حاشا و بلا تهديدات دياولك منغلطش😜
أنا:تشرب شي حاجة؟
أمين:إلى جات على خاطرك كبي ليا معاك شي كويس
و أنا كنچمچم في خاطري ؛كون جات على خاطري بغيتو يلصق ليك لسانك مع قرجوطتك
وايني لاحظت امين واشرف بحالا ماشي صحاب بيناتهم السم وتلفت ل أشرف ودرت ليه غميزة ديال “موت بسم” حتى حسيت بالعدسات تزعزعو من بلاصتهم…
أمين:شكرا سارا على الاستضافة
نرجع عند صحابي قبل ميتقلقو عليا
لا غ زييد برك و نجيب ليك فين تسرح رجليك ؛ تفضل الما دافي و لا بارد؟؟ قلتي زوج دقايق ولينا في خمسطاش ؟؟! 😳
أمين: دبا نوصي السيرڤور يجيب ليك براد
بقيت كندردش مع لبنى؛وكتعاود ليا على حبيبها لتبدل معاها ومبقاش كديها فيها .
بلاتي حتى هو خاصو براد بوحدو وشي رابعة كاوكاو وزوج دراهم زريعة…
جا كريم دخل عادي:أووف أووف أوووف شكون هنا؟؟؟ سارااا إمتى جيتي؟؟؟
ناري فضحتيني مبغيت تا وحد يعرفني ساكنة برا.. خرجت فيه عيني 🙄
انا: اكادير راها غيير هنا مالها بعيدة؟؟
كريم:توحشتك الخيبة
انا:حتا انا الزينوش
كريم نقدم ليك صاحبتي لبنى😁
لبنى كريم حب السونطر ويا دلالي ههه
صاحب كريم حتا هو معاه صاحبتو(من البنات اللي كسلمو عليك و مكززين على سنانهم،كعصرو ضحكة بزز)،صاحبها ما بيهش،ضحوكي.
ولبنى جراتني عندها توش وش ليا في وذني .. وكززيت سناني و قلت ليها : لبنى خلي حتى للداو و نعيدو النظر في الضوسي غ صبري ..
لبنى: شفتيها ككتطلع وتنزل فيك ؛ نيت اليوم انتي طايح عليك السر ..بسملي وقراي آية الكرسي الى بغيتي تنوضي بياسة وحدة من فوق هاد الكرسي…
وليت غا داوية ع الله البنت متحس بوالو..
كريم جي برك حدايا عاود ليا اش درتي هاد الوقت اللي متشاوفناش (وفكني من لبنى وخلي الليلة دوز بلا تناتيف)
كريم ناض وانا تلفت نشوف ف أشرف ودنيه على طابلتنا … 😈😈
السيرفور: تشربو شي حاجة؟
كريم :قهوة.
صاحب كريم عبد الله :كوكتيل پيناكولادا
وصاحبتو نجلاء:عصير الحامض
(دايرة رجيم وهي قريبة تهرس)
السيرفور:خاصكم شي حاجة أخرى؟؟
إلى جات على خاطرك حط معاك هاد سي دي عافاك 😬
وبقينا كنهضرو ونضحكو عبد الله نقيمي وفيه ضحك😂😂😂
حتى بدات الاغنية:لا علاقة ودير كلامي حلقة ما صالح الحب ولا للصداقة
ونا كندندن ….وشي ناس كدورو في عينيهم !
كمل سي دي..
أشرف خدم موسيقى فتليفونو🎧🎧🎧
انتي باغية واحد يكون دمو بارد ساكت ديما جاامد… وشاف فيا بنص عين !
ضحكت بجهد حتى تسمعات ضحكتي
نقز كريم قالي : ليوم نفضحك ليوم نفرج فيك اللي يسوا ولي ميسواش
لبنى في ودني: عجبني فيك 👏🏻
انا:بغيت غييير نفهم واش أنتي معايا ولا معاه؟
لبني:لا معاك طبعا،وايني عجبني فيك😬
غير الاغنية كملاااات قاليا كريم يا غادي تغني لينا يا نجمع عليك جوقة ختاري أ سااراا
يالاه بديت نغني…
كريم :مكنسمع والو.. بجهد
انا:أنت باغي وحدة تكون بحال لوردة ساكتة ديما جامدة تسمع وما تدويش تجيب عليها مرأة،بيضا ولا سمرا وترجعها ضراااا تنفخ عليها الريش
كل مرة مع وحدة عايش ليك اللحظة تدخل تال الوحدة هاهاهاها وباغيني مندويش
مليقش لييييك يا زهواااااني ألف واحد يتمناني
أنا منليقش ليك يا زهواني آاااااالف واحد يتمناني 💃🏻💃🏻💃🏻
دراري صحاب أشرف :هي والله حتا هي شوف مزيان ونفس صوت
كريم:جبدت عليك نحل هاهاهاها
انا :ياله اخويا دابا يوليو مهرسين عليا طوابل
كريم مشا يخلص..
وأنا غادية وقفني أمين:انتي اللي غنيتي هاد المقطع اللي في اليوتوب؟؟
أنا:شتتتتت آه ؛ مغنيت والو غير پاغودي
أمين:والله حتى نتصور معاك…
أشرف ناض من طبلة ومشى..و هو غاذي تلفت عندي و قاليا تبارك الله عليك 👍🏻👍🏻👍🏻😡
تبعتو بعينيا ،دخل لطموبيلتو،علاش تقلق بالضبط؟؟ من كريم،أو من أمين(اللي مشا ياكلو بعينيه)؟؟غار؟😈
وأنا كنتمشى أنا و المجموعة في البارك،كنسمع:سارا سارا 📣
تلفت ..🙄ماشي أشرف العلكة ديال أمين..
عفاك نقدر ناخد نمرتك؟؟
أنا:مغاديش تيقني معنديش التليفون وهدا ماشي ديالي غير مخلينو ليا…
أمين:امممم فهمت
(فكرت بلي نقدر نحتاجو )
أنا: خلي ليا نمرة ديالك غير يوصلني تيليفون و ناخذ نمرة ديالي نرسل ليك مساج وخا؟؟
أمين:اه مزيان..قيدي ..نقدر نشوفك غدا؟؟ولا حتى الوقت مسلفينو لييك؟؟
أنا: وعلاش…ان شاء الله
امين:نتعارفو….حتى حاجة اخرى
كريم: سارا نسيتينا؟؟
انا جاية،دقيقة
نخليك امين خاصني نمشي،نفكر ونرد عليك
مشيت عند صحابي قولو ليا شكون باغي ياكل معانا ببوش؟؟
كريم:بصحتكم انا مكناكلوش😩
نجلاء انا:في عين دياب كاين واحد عندو داكشي نقيقي ومتيول معرفتش هنا كيف داير هداك الشي؟
أنا:على الاخت ماشي من المحمدية؟
(النوع ديال البنات اللي يقدرو يرفعو ليا الضغط غير بتملميلة 😡😡)
نجلاء:نو من صفرو،وساكنة في كازا دبا عامين ونص
انا:اهلا وسهلا،اجي نبوسك وندير معاك الواجب،بنت عمي حتا انا صفريوية…عندنا نفس الطاسيلة .. و جريتها بستها!
عبدالله:يالاه!ويلا معجبكش متاكليهش 😩
غادين جيهت مول لببوش وكنقلب بعيني😳 على أشرف مبانش ليا ؛مزيان مع الليل مكرهتش نمشي معاه😢
بديت كناكل الببوش 😋😋
وخاص دنيا كلها تعرفني كناكل الببوش امممم بنييييين، الله يعطي صحة لكعرف ياكلو😀😀
شوية ونا كنساري في عينيا : 😳هذاك أشرف اش واقف كچجدر مع هاذيك البنت 😡
نغزت لبنى ؛شوفي 😱
وحلات ليا غسلت يديا وقلت لكريم بغيتك!
جريتو ومشينا بركنا في الكراسا ديال الپارك
وقلت ليه يعادو ليا على طلاقو ..
وعينيا مرة معاه مرة كنتلفت لجيهت أشرف
😱جرها عنقها وكضحك.. ويشوف فيا ببرودة دم 😏😳😡
مشيت بعدت عليه؛ سمعت قصة كريم؛ نساتني فيه وخا مرة مرة كنشوف جيهتو ..
وصلو علينا لاخرين بغاو يدخلو ..للدار!
ركبنا كاملين مع كريم، وصلنا..
دازت ثلاثة أيام مكنخرج ما كنمشي فين ..غير في الدار ولاكنهبط للصالون ديال مرت خالي ..نقاد راسي ونرجع للدار ونجمع مع فاميلتي؛ خاصني نوجد للطهارة ديال ولدي ..🎉
الغد ليه مع التمانية ديال صباح،كنسمع كلاكصون ،ككلاصوني مرة ويتسنى شوية ويعاود (هدا ضريف ماشي فحالي الى تكيت عليه يصحبوني غير غادية بدفوع) حليت شرجم وجهي مكمش شعري مشعكك مقديتش نحل عينيا بزوج،كنقلب منين جاي صوت .. السيد أشرف،جاي ككلاكصوني قدام دارنا،واقلية باغي يدفع جنازتي؟
معرفتش شنو ندير،منقدرش نهود ومنقدرش نخليه ككلاكصوني ل يهبط ليه شي حد “حي شعبي هنا؛ نتوقع أي حاجة”
وبدا كشير ليا نهود؛ تضرقت بالفدريش و قلت ليه خمسة دقايق أنا جاية ..عشرين دقيقة ومازال مهودتش ..كنفش في عينيا و وجهي بالثلج؛ لبست حوايجي الرياضة و خرجت!
أنا كنمشي وهو تابعني: وقفت طاكسي و هو ورانا!
أنا: صباح الخير ؛ غادية أ خويا الكورنيش ..
الطاكسي”مان”: صباح نور ؛ ان شاء الله
وصلت؛ بقيت نتسناه حتى يچاري طوموبيلتو!نزلت لشط لبحر.. وهو جا ورايا!!
اليوم ندبي فيه شي جريمة..😤😤
أنا:واش تصطيتي؟خرج ليك لعقل؟ وش عارف شنوو درتي؟
أشرف: هادي هي صباح الخير،كيف داير؟ أش كتعاود لباس عليك؟؟
انا:مبغيتيش نتلاقا ليك ب بوكي ديال لورد؟؟ واش كتمسخرعليا؟
أشرف:كون جيتي وخليتيني نشوفك،ما يخرجش ليا عقلي ونتصطى ثلااااااات أيام م شفتك 👊🏻😠أنا:اولا ☝🏻 آخر مرة تجي قدام دار وتكلاكصوني
تانيا:أنا مراة مطلقة،والمجتمع مغاديش يرحمني، هذا حي شعبي ماشي ،البارك
في البارك حتى حد مكعرفني مطلقة،ويلا تلاقيت مع معارفي 99 في مئة منهم في تقادة ديال عمري..
ثالثا:نمشي نبرك نطير ننزل انا ديال راسي و حرة ؛ 😤
أشرف: لا نتي ماشي حرة،😡 (وكغووووت)
حتى غرقتيني فيك ووليتي كتلعبي بيا كيف بغيتي… ودابا جاية تقولي ليا أنا حرة؟يوميا كنمشي لقهوة نبرك فيها حتى تسد،على أمل أنك تجي ومن بعد نقلب عليك فالكورنيش عل وعسى نتلاقاك، قلبك حجر انتي؟ مفهمتينيش تعلقت بيك؟؟!
😱😱😱
دوخني بهضرتو فاجأني،مكنتش كنتسنى منو يقول ليا هاذ شي كلو..
شنو كعني بتعلقت بيك ؟! غرقتيني فيك؟؟
هاذ الهضرة،عمرني سمعتها!جديدة على وذنيا؟ جفوني تقالو عليا راسي كتضرب فيه ألف حاجة و حاجة ،لساني ثقال عليا ..
أشرف: هضري دبا جاوبيني؟؟
(شادني من ذرعاني بزوج… وكدي ويجيب فيا) جاوبي يا لاه قولي شي حاجة مالكي ساكتة؟؟ وانا مفيكسية عينيه،كنحقق فيهم، ككذب ولا كي قول صراحة
أنا:ااح طلق مني وعتيني…
أشرف:سمحي ليا… مقصدتش!
بعدت منو حيدت سبرديلتي وكفطت سروالي.. وبقيت كنلعب بالمواج لصغار برجلي… وفي نفس الوقت كنحاول نفهم كل وخزة هزات ليا فقلبي
تلفت لقيتو كيشوف فيا ..
أشرف: مالكي؛ هضري قولي شي حاجة؟
أنا: معرفت ما نقوليك ..
أشرف: عندك علاقة مع شي حد؟!
أنا: الله ينجيني ..فال الله و لا فالك (الچنس الناقص)
أشرف: باقا كتبغي طليقك؟!
أنا: على حسب واش أنت باقي كتبغي هاديك اللي كنتي معاها؟؟
أشرف: لو كنت مازال كنبغيها كنت غاذي نظل سهران نفكر فيك؟! حتى طلع الصباح وجيتك؟!
(هزني من دنيا،وحطني في دنيا اخرى،سارا وياااااك تقولي ليه شي حاجة،م خصوش يعرف هادشي،من بعد ترخاصي في عينيه،ديري لراسك قيمة…)
انا:حتى انا لو كنت مازال باغية طليقي،كون راني حداه دابا،انا ماشي فحالك كنسمح في الناش اللي كنبغي…
اشرف:يالاه فهمت اللي كان بيني وبينها غيير ولف…ماشي حاجة اخرى…
انا:ماشي حاجة اخرى؟؟ يعني؟؟
اشرف:يعني ماشي فحال شنو كنحس بيه معاك،ماشي نفس شعور معرفتش شنو نسميه ..
أنا: آااه فهمت ..
أشرف: شكون الولد اللي كان معاك البارح؟!
أنا: شفتي غير الولد؛ مشفتيش الزوج بنات والولد لاخر؟!أشرف: آه؛ وايني كيفاش كنتو مقاربين وكتوشوشو بيناتكم؛ حتى صاحبتك مدرتيش معاها فحالو؟!
أنا: في2008؛ كنت درت سونتر لاجويستيك اللي في الوفا؛ و هو كان كيقرى معايا؛ وبقينا أصدقاء!!
أشرف: والبارح خليتو صحابكم ومشيتو بركتو بوحدكم… وطولتو بالنسبة لصحاب 😤
أنا: قلت ليك صديقي،أنت ماشي بابا ولا خويا غادي نخاف منك..😤 أيييهوأنت شكون هاديك لكنتي كتعنق فيها؟؟
أشرف:ختي..😈
أنا:ختك،؟؟؟ متأكد؟؟
أشرف: والله تسناي نوريك عائلتي جبد تليفونو وبدا كقلب في تصاور…
أشرف:هاذي ختي غيتة،الوالدة ثورية الوالد المهدي وهدا خويا اللي تابعني أيمن والصغير فينا يونس آخر العنقود
أنا:ماشاء الله ؛ الله اخليهم ليك ..🙈
أشرف:وأنتي،؟؟ عندك خوتك؟؟
أنا:يا ريت ؛ أنا بوحدي اللي عند والديا
اشرف:بصح؟؟
انا:هادشي اللي كتب الله…
أشرف: يالاه نفطرو فيا الموت ديال جوع..
أنا:واخا فيين؟؟
أشرف:هاديك القهوة اللي في اللخر ديال كورنيش..
أنا:آجي معايا (وجريتو من يدو)
تمشينا شوية وقفت عند واحد مول طابلة وپارصول
أنا: صباح النووووور ؛خويا نقدرو..ننن
جرني أشرف ولاحني و را ظهرو ؛ 😏وقاليه :
شي طبلة مزيانة وصحيحة عافاك بالپارصول..
مول لبارصول: هي اللولة ..
غير ركب لينا الپاراصول على شويا قرب طابلة لشط لبحر،بركت ومشى وقاليا أنا جاي…
اه حقا،عند شيحاجة سبيسيال في الفطور؟ ومرحبا باللي كنتي ناوي تبززو عليا 😁
أشرف : واش أنا خارج مع چاورية ؟! شنو سپيييسيال اللي بغيتي ؟!
أنا:مغربية وحرشة غير هنا ؛ بغيت حرشة بالفرماج وأتاي وكاس الليمون.. عافاك 😉
منطقش بكلمة طول شوفة فيا تبسم و مشى ..واقيلة كان كسجل باش مينساش 🤔
آشرف:زوج دقايق وانا راجع..☺️
وهو غادي وحد الوقيتة غير تم طالع في دروج لاكورنيش
….تلفت ، شاف فيا غمزني وضحك 🤗
رجع ؛ برك حدايا و دار فيا نفس الشوفة .. ونفس الضحكة .. ما فهمت والو 🙄
وحنا كنتسناو لفطور
بديت كنلعب برجليا في الما،باش نهرب من الشوفات ديالو ؛ ولخا مملفتاش جيهتو كنحس بعينيه عليا و مامفارقينيش ..
الجو فننننن وفطور غادي يكون رومنسي..😍
أشرف: عنداك طيحي،راه كرسيك كتزعزع بلا متحركي رجليك😱
أنا:لا متخافش علي الكرسي ميسخاش بيا وي يلوحني 😅
أشرف:لا مخايفش عليك ،خايف غ نغرم الكرسي والمشكيل م هازش معايا الفلوس بالزايد😂
أنا:لا غييير كون هاني 😡😡..ولنفترض تهرس؟نغرمو غيير بغميزة😉😉 ويلا اقتضى الأمر حتى ببوسة 😉 أشرف:ساخي عليك عمرك؟طالبة عليها؟؟ عجبك 😠
انا: صراحة مابيهش عاطي لعين 😎
أشرف: 😡
خنزر فيا ودور وجهو
أنا:غير كنضحك معاك راه أنت اللي مبيكش 😍
أشرف: اللهم نكون انا اللي ما بياش ولا هو! مقبولة منك أللي كتقطري بالزين 🙄
وأنا حابسة الضحكة ؛ حيث عجبني الحال و هو غيران 😁😁 تلفت مول الپارصولات ؛جايب لينا لفطور…
أنا:شكرا اخويا عذذذذذذ آااي ..عذبناك معانا
(أشرف عفط ليا على رجلي حتى غطسها في رملة)😡حيث مبغانيش نهضر معاه بالمرررررة 😒
انا:درت كأن شيئا لم يكن و قلت : امممم هادشي بنين
أشرف:بصحتك
أنا:مطرح ما يسري يملي
أشرف:بقات ليك غيير المصرية😏
أنا:مالك عاندتيني وطلبتي فحالي مكتعرفش توكل راسك براسك بلا متنقل مني؟؟ 😐
أشرف: هادشي اللي كنطلب انا ديما،ما كنزيد منقص..😠
أنا: كيفاش؟؟عمرني ما شفت شي حد كشرب الليمون في الفطور قبل اتاي؟؟ هاذي عادتي خاصة بيا 😤
أشرف:هانتي لقيتيه ..😬
يالاه فهمت علاش ملي قلت ليه شنو بغيت في الفطور بقا ساهي فيا😳
أشرف:غريبة جاتك؟
بقينا كنشوفو فبعضياتنا بنظرة تساول إعجاب ومستغربين فنفس اللحظة..
أشرف:علاش طلقتي أسارا؟
أنا:متفهمناش..
أشرف:اللي ما كتفهموش شهر شهرين ماشي سبع سنين زواج..
أنا:غلطنا بزوج كل واحد في حق الثاني..
أشرف:خانك؟؟
أنا:لاااا كان ولد الناس،غير ماماه مكانتش باغياني،كانت كتفضل ولدها يتزوج بنت ختها!!ودارت مشاكيل..
أشرف:مزال كتشوفيه؟؟
أنا: مرة مرة كنتلاقاه بالصدفة
أشرف:وولدو؟؟ شنو سميتوه حقا؟
أنا:لا تقطعت علاقتنا بالمرة،سميتو “امير جاد”💓
أشرف: سميتو زوينة😍 يعني مكيجيش يشوفو؟؟
أنا:لا ممنعتوش، وجاد نهار يكبر يمشي يسول عليه .. أشرف:ولد ناس زين هذا… يعني ولد الحرام عندك كيف داير؟؟
أنا:كل واحد فينا بعيوبو…
أشرف: ورغم انه خلاك وسمح في ولدو مازال كتدافعي عليه؟؟؟😡 هدا كلو حب ليه؟؟
أنا:ماشي مجرد انني مكنهضرش عليه خايب،يعني انني كنبغيه،متنساش صرف عليا وكلني وشربني لبسني و زيادة هو من فاميلتي والدم عمرو يولي ما!!
أشرف:صافي صافي… مابقيت بغيت نعرف والواا 😤أنا:أشرف،هداك محيتو من حياتي لوكان مسولتنيش منتفكروش اصلا، وملي الناس كقولو ليا:كيف داير فلان، كناخد وقت طويل باش نجاوب للانه مكجيش فبالي اصلا…
بقى ساكت وكشوف فيا،كحللني…كحاول يقرا عينيا،كيف ما كندير معاه حتى انا
أشرف:يا لاه نتمشاو شوية…
خلص الولد ومشينا!!
أشرف:شنو درتي ورا الباك،قريتي ولا بركتي؟
أنا:الباك مشدنيش😂 دخلت نقرا سياحة والفندقة فكازا
أشرف:ودابا خدامة ولا غي جالسة؟
أنا: لا غير باركة في الدار ..
أشرف: وشكون كصرف عليكم؟! يعني انتي و ولدك؟!
أنا: خالي. والدار خلاها لينا جدي الله يرحمو😥
أشرف: علاش ماماك و باباك فين هوما؟!
أنا: بابا وماما طلقو ..بابا ساكن في آسفي؛ وماما في أكادير .. قصتهم بوحدها ..هاذيك!!
أشرف: بغيت نعرف عافاك🙏
أنا: ماشي ناس كنفتخر بيهم والديا😔
أشرف: علاش كتعيطي لوالديك: نااااس؟!
أنا:حيت الوالدين مكسمحوش فكبدتهم
أشرف:سمحو فيك؟؟ كيفاش؟؟؟
أنا:كانت عندي اربعة اشهر،هداك لسميتو بابا حرق ماما
أشرف:حرقها؟؟؟ شعل فيها العافية؟؟ ما يمكنش علاش؟؟؟أنا:قصة غيرة،بابا كان جدارمي وكنا ساكنين في عين سبع،واحد نهار صحابو جاو لعندو،وماما وجدت الماكلة!تعشاو وبداو كشربو مع بعضياتهم؛والشاف ديالو قاليه الله يعطيها صحة مرتك زوينة ..
بابا مرضاش.. ملي مشاو صحابو … مشا عند ماما قاليها هذاك زين اللي عاجبك غادي نحيدو ليك وماما ستفزاتو كلمة بكلمة كان عندو في الجراج ليصونص ديال الجيپ اللي كخدمو بيها… جابو وكبو عليها! وقاليها دابا شنو؟؟ قاتليه الا سميتك راجل شعل وشعل فيها العافية و شعلات حتى فدار وانا حفظني ربي..
شفتي عاد لاطراس ديال لحريق اللي فيا(وريتو ايدي)بسبابو هو..
أشرف:ايوا وماماك ماتت؟؟
انا:لا تحرقات في وجهها وايديها داوها كلينيك بقات فيه ستة اشهر..
أشرف:وباباك؟؟
أنا:بابا الشاف ديالو مبقاش بغا يضرق عليه وأول مرة مشا يقتلها تيرا فيها جات في صاحبو..هاد المرة شافو متابش دفعو قضيتو المحكمة و تسجن!
أشرف:ماماك برات ؟؟ كيف ولات؟؟
أنا:دارت بزاااف ديال لعمليات واخا هكداك بقا باين لحريق فعنقها بزاف وايديها!
أشرف:وتفارقت مع باباك؟؟
انا: اه…رفعت عليه دعوة الطلاق!! واخا هو هددها بالقتل مبغاتش تبقى على ذمتو..
أشرف: ورجعت لدار جداك؟؟
انا: اه .. ولات كتمشي لمالطا تبقا تماك العام كامل،ترجع تبقى معانا شهر ولا زوج وتمشي حتا أنا درت أربع سنين ومشات بالمرة غبرات ؛هداك نهار عاقلة عليه فحال لبارح عمري نساه… كانت آخر مرة شفتها فيها!
صوتي بدا يتحبس.. فيا البكية و حابسها عنقني وبقا ساكت…
ماماك محاولتيش تقلبي عليها؟؟
أنا:الشرط باش تزوجت كان نقلب عليها… غير تزوجت سافرت… الناس كدوزو شهر العسل وانا كندور فالكوميسريات!من الشمال حتى الجنوب مخليت فين مشيت..البلاصة اللي كقولوليا ناس شافوها فيها كنمشي ليها … كنمشي ليها دروبا وقهاوي والناس مرحمونيش كشوفوني كنتقطع عليها وزايدين بالكذوب 😰
دموعي سبقوني ..و حتى أشرف عينيه غرغرو ودور وجهو..
وقاليا:من اليوم بغيتي ولا كرهتي لباسك ماكلتك وكلشي انتي ولدك على حسابي حتى نتجمعو،ويلا بغيتي نكري ليك دار ؟؟!
أنا : أشرف فيا الموت ديال الجوع ؛ نبيزة ديال الحرشة مشبعتنيش ؛ واااالو وتچول 🤗
أشرف:مات بضحك،بازليك😂😂
تمشينا شويا و طلعنا ؛ مشينا لريسطو في كازا ..
قبل منتغداو عيطت نسول على جاد ولد خالي خرجو معا البحر
تآنسطالينا باش ناكلو وطبعا بدلنا الموضوع
انا: وانت خدام؟
أشرف:خدام مع الوليد في شركة استيراد والتصدير والاتات المغربي.انا مكلف بالوراق وتخربيق
انا:اه مزيان
أشرف:عندك شي هوايات؟؟
انا:طبعاااا تعياب وردان الهضرة النميمة واحسنهم شريان صداع بين الناس😂
اشرف:اممم مزيان ، انا عندي وحدة نتبع الكداب حتى لباب دار
انا: بالطبع السفر والفتوغرافيا وانت؟؟
أشرف:وااااااو عزيز عليا نسافر والتنس وزغرتي معنديش مع كورة✌🏻✌🏻
انا:نوض دردك حتى انت معنديش مع الميناج 😂😂
دوزت نهار زوين دخلنا كل واحد لدارو.. وبقينا كنهضرو فالميساجات..
كنت كنوجد لطهارة ديال ولدي
وهو عارف قلت ليه كلشي..كنتفاجا ب الست ماما جاية..
تلفات بيا دنيا وكاملين في دارنا واقفين فجيهتها… سمحو ليها لحمهم ودمهم الا قصتي علمتني شي حاجة فهي هادي:ربي ما بعد عليا والديا حتى كان فيها خير ليا!!
كنت غادي نتسطى قلت ليهم الا هي تجي لهنا من حقكم. وبنتكم وختكم اما انا فمن سابع المستحيلات ..نشوفها نقدر نقتلها 😡

 

رجل ليس ككل الذكور 3

جمعت حوايجي ومشيت باش نشري تذكرة نرجع لفرنسا.. نهرب كيف ما درت هادي 3 سنين،حرمت عليا المغرب على قبلها ..
خديت طاكسي ،وصلت لقيت لاجونص سدات…
هزيت ولدي ومشيت الأوتيل .. معندي لا ليكوش لا ماكلة الولدي لا حتا حاجة..
تليفون كصوني اتصال ورا خوه..جاوبت على ولد خالتي
وجاتنني هستيريا ديال البكا!!
جا عندي ولد خالتي،قاليا:سارا لميييمة مسكينة كاتبكي كسحابليها مشيتي…و بغات تشوف جاد !
وخليتو خذا جاد … وقاليا عارف هاذ الشي ماشي ساهل ،بركي مع راسك وخممي مزيان راها تبقى ماماك وجاد راه موالف بيا ،هاهو معايا… وانا منقول حتى حد فينك…خودي وقتك حتى تبردي على خاطرك
أنا : عنقتو و قلت ليه واخا، وكل جاد راه مكلا والو وجيب
ليا عفاك بيجاما رجع عندي ببيجامتي وجاب ليا سندويس..
تليفوني طافي مبغيت نهضر مع حتى واحد!!
عييت ما نلين ونرطب قلبي واستغفرت ربي شي الف مرة … واالوو
شعلت تليفون،لقيت مساجات ديال أشرف..عيطت ليه
أنا: الو …
أشرف:مالكي على لعب دراري صغار؟؟؟
فينك علاش طافية تليفونك؟بلا بلا بلا خليتو حتا كمل!
أنا:صوتي باح:شوف متقلقش غدا ان شاء الله نعيط ليك عندي مشكل وما باغية نهضر مع حتى وااحد بغيت نبقى بوحدي شوية
أشرف:خمسة دقايق أنا جاي عندك نزلي
أنا:بلا متصدع راسك مكايناش في دارنا انا برا..
اشرف:الوحدة ديال ليل هاذي ؟!فينك برا؟؟معامن؟
انا:وحدي في الأوتيل
أشرف:جراو عليك ياك،؟فين هو ولدك؟؟
أنا:مع ولد خالتي ؛ جا داه مع المغرب
أشرف:سارا يرحم ليك الواليدين،ومعزت جاد عندك.. غير قولي ليا فين ؛شمن أوتيل .. قبل مانجاوبو طفا ليا لباتري…
من بعد ساعة ونص هكذاك تيليفون ديال لاشومبغ كصوني
هزيت :صوت دوزها ليا دوزها ليا
أشرف:هبطي ولا نطلع؟؟
أنا:مغربية ونت مغربي يديرو كونترول نوليو في المشاكيل 😱
أشرف:هبطي نمشيو شي بلاصة
أنا:مكرهتش ،وايني
جلابتي حامضة بتقية
خاصني نغسلها… وبيجامتي مزيرا بزاااف وقصيرة… بديت نچرد في جلابتي حتى سمعت الدقان
وجهي ولاو فيه تلاتة لوان وحالتي حالة
حليت الباب
أشرف:سارا شنو واقع؟؟؟
أنا :دموعي سابقيني…
أشرف:اجي غسلي وجهك ويالاه نخرجويضربك البرد شويا
معنديش حوايجي وجلابتي رديت عليها
لبسي لا فيست ديالي،نمشي عند ختي نجيب ليك شي حاجة!!
ختك رقيوقة ونا غلض منها بزاااف حتى حاجة متجيني…
نجيب ليك شي حاجة من عند الواليدة ..غ يالاه
و مشينا طريق كاملة وانا ساكتة،جاب ليا عباية ديال ماماه وجا مشينا.. لافاليز وبقينا واقفين
أنا:أشرف كيف درتي حتا لقيتيني؟؟
أشرف:المحمدية كاملة فيها 5 الأوتيلات… وجيتي اليوم مع ولد صغيور ساهلة…كنعرفهوم كاماين كنتعاملو معاهم
أنا: آه ، مزيان ..
أشرف:راني صبرت بزااااف و هضري
أنا :ماما جاية…باغية تحضر للطهارة ديال ولدها قالت…
أشرف: تسنااي تسناي ..لقتيها؟؟😳
أنا: آه في …2011
أشرف:علاش ما قلتي ليا والو؟؟
أنا:اش فيها ميتعاود؟؟عيب وعار
أشرف:شفتيها ولا مزال؟؟
أنا:لا من..2011 وانا محرمة المغرب…
على قبلها
أشرف:علاش فين كنتي؟
أنا: في فرنسا
أشرف:فرنسا؟؟كدرتي ليها هضري قولي؟؟
أنا:اللي كنت مزوجة بيه هو اللي داني..
أشرف: يعني تزوجتي ومشيتي لفرنسا،؟
أنا:اه.. و في2011 مابيا ما عليا،عيطات ليا عمتي قالت ليا: واحد السيدة في آسفي جارتها كتخدم في اكادير كتعرف صاحبة ماما ..عطاتني نمرتها!عيطت ليها قالت ليا نجيب ليك نمرتها وكيف ما أنا اندير فيك هاد الخيير ستريني..
عيط ليها قلت ليها فلانة قالت ليا اه… قلت ليها سمعيني حتا اللخر … عافاك متقطعيش تليفون.. انا بنت سعاد
قالت ليا:اه انا مكنعرف حتا سعاد!!
قلت ليها عفاك نعطيك ليبغيتي غير وصلي ليها هاذ الميساج:
بنتك راها مزوجة وعايشة في فرنسا وحاملة … بغات غير تهضر معاك….يرحم ليك الوالدين أخالتي…ويلا جمعتينا بغيت ربي يجمعك بولادك في الجنة…🙏🏻🙏🏻
سكتات و شوية قالت :خلي ليا واحد سيمانة حتا نقنعها
سيمانة دازت عليا كحلا، أصعب أيام حياتي ، بين الشك و اليقين ؛ ما ناكل مانشرب وليت كيف شي مسطية، التيليفون في الباتري باش ميطفاش وانا قدامو… غير وصلت سيمانة عيط ليها؛قالت ليا العشية غادي تكون عيطي!
في هاذيك العشية عيطت ليها،مبغاتش تهضر معايا…هاذي ام هاذي؟؟؟ هاذي هي ماما اللي كنت نخبي ليها نص ماكلتي بين حوايجي وأنا في عمري خمس سنين ؛ حيث كل مناسبة كوهموني باللي غاذي تجي ؟!
هاذي هي ماما اللي كنت نبات ندعي ميكون طرا ليها والو .. ؟؟! هاذي هي ماما اللي كنت محرمة عليا الأعياد و الفرحة حيث مكنتش عارفة حالها؟!
يوماين وأنا كنعيط و هي مكتجاوبش؛ حتى جاني انهيار عصبي و كنت حاملة بتوام في الشهر الرابع وطاحو ليا الولاد قلبهم سكت .. واخا هاكذاك ناعسة في الكلينيك ونعيط ..خليت ليها ألف ميساج ..وفي الاخر قالت لصاحبتها: قولي ليها كتفضل تهدر مع عائلتها ..في الأول؟ أنا ماشي منها؟!
لو ما كنتش نشبهها و فوطو كوبي منها نحلف عليها ماشي ماما!
ومع ذالك قلت ليها: واخا ميكون غير خاطرها را عائلتها موحشينها بزاف ..وباباها راه مات العام اللي يفات وامنيتو كانت يشوفها ..
دازت يومين عيطت لصحبتها والمفجأة هي اللي جاوباتني..لباس لباس عرفتها من صوتها بلا منحقق معاها…سولتني أسئلة روتينية وقطعت… وأنا فرحانة عيطت لميمة (جدة) وقلت ليها كلشي وعطيتها النمرة ديالها تعايطو بيناتهم ومشات لعندهم..
قطعت تذكرة لآخر الشهر.. حتى لواحد نهار عيطت ليها كنهضرو…سولتها من نهار دخلت لمغرب عمرك فكرتي تشوفيني وخا من بعيد؟؟
قالت ليا صراحة لا والمحمدية من نهار رجعت مشيت مرة عند صاحبتي… وانا إلى مشيت من هاديك الدار راني مكنتش مفاهمة مع خالك وكان منكدها عليل ومخلانيش نعيش حياتي 😾😾😾
غير قالت هاذ الهضرة ؛فحالا شديتي موس وبديتي تقطع فيا…17 عام وهي غايبة عليا غير باش تعيش حياتها؟؟
ما علينا صبرت وقلت الهضرة ماشي في التيليفون حتا نشوفها ونبرك معاها وفي نفس الوقت خفت نجبد معاها التفاصيل ترجع تغبر!
وأنا في الخدمة سيفطات ليا مساج: جونيماااااااار نسمع عليك هضاير الى مراعيتيش لينا حنا ،راعي لخوالك ورجال خلاتك. هانتي طلقتي من راجلك ها نتي رجعتي معاه ؛ مدراستك خلصو عليك زبابل ديال الفلوس مكنتيش تمشي ليها وزيدها البارح حطيتي تصويرتك عريانة؟! 👺
أنا ؛ عيطت ليها هاذيك الساعة ؛ غير بشوية و فهميني مفهمت والو ؟! شمن تصويرة كتهضري عليها؟!
هي: ماعرفت قالو ليا و صافي؟؟
أنا: تصويرة اللي كتهضري عليها لابسة فيها غوب عادية فوق الركبة بشوية ..موضا عادية؛ و انتي طلي على تصاورك كاملين بالميني ..
هي: هاذاك الوقت كلشي كان كلبس هاكداك بلا بلا بلا
أنا: أنا هاكذا دايرة و نلبس اللي بغيت
هي: راهم عاودو ليا عليك ديما كديري غ اللي فراسك و مكتسمعي لحتى حد؛ واش أنا ولدتك مع جاوري؟؟!
أنا: فين كنتي باش تربيني على يديك و كيف بغايتي؟! خليني بلا ما نغلط فيك و نسمعك هضرة متعجبكش بسلامة و قطعت معاها !
دخلت للدار قطعت التذكرة على جوج ..
وحلفت ما نمشي للمغرب ومن نهارها ما سولات فيا.. وكلهم عائلتي كقولو ليا سارة كبري عقلك وانا عمر شي حد مكبرو معايا،إلى هي مقلبهاش عليا حتى انا على نخليها على خاطرها…
داز الوقت:في آخر اكتوبر 2012 ولدت جاد.. وعرفت بحق الامومة…ومن هذاك نهار ونا حاقدة عليها،كفاش الام تقدر تبعد على كبدتها مستحييييييل تكون ماما،مستحيل ودابا جاية تطالب بحقوق ولدها قالت:عجبا كبدتها ولاحتها وولدي غادي تحن فيه؟؟
كحالت دنيا في عينيا،مبغيت والو منها غييير تخليني نعيش حياتي راه اللي كسولني كنقول ليه ميتة وماما هي جدة
أشرف: ساراا راه كيفما كانت كتبقى ماماك
أنا:لو كان مولدتش… ومعرفتش شناهيا الكبدة من حقدش عليها!
أشرف:راني فاهمك وحاس بيك…. وايني الله وصانا بالوالدين والرسول عليه الصلاة و السلام :قال امك ثم امك ثم امك…..ثم ابوك،يغضب عليك ربي هتكدا
أنا:ربي راه عارف كلشي،وحتى هو ما يرضاش شنو دارت فيا…
أشرف:شوفيها وقولي ليها اي حاجة في قلبك وعاد حكمي… الله يهديك
أنا:دافع عليها حتى أنت ؛ أنت اللي بقيتي في الحساب…عشتي مع ماماك متقدرش تحس بيا…. وما يحس بالمزود غييير اللي مضروب بيه
أشرف:استغفري الله وهضري معاها وقرري من بعد حتى أنتي غادي ترتاحي نفسيا..
يالاه دخلي لدار دابا ورتاحي ويصبح ويفتح
انا:الدار؟؟؟
أشرف:اه للدار متفكريش غير في راسك جداك غتكون في حالة ويلا وقعت ليها شي حاجة تندمي حياتك كاملة
أنا:والله مكدبتي وعندها السكر وطونسيو
دزنا الأوتيل خديت وراقي وجلابتي وصلني …للدار
دخلت لقيت جدة باقا فايقة..شفتها بست ليها على راسها وقلت ليها:انتي ماما… ومشيت نعست
دازت يومين وهي:تجي.. قلت شكون؟؟
هي:أنا سعاد (سميتها سعدية وكلشي كيعيطو ليها سعاد)
أنا:سديت لانطرفون ورجعت الكوزينة
مرت : خالي ؛ شكون صونا أ سارا؟!
أنا: معرت .. وكملت تقطاع الخضرة و عاطياها بظهر
مرت خالي : كيفاش معرفتش أ ويلي ؟!
أنا : إلى قاتلك الفصول سيري شوفي و متصدعيش ليا راسي .. وليت كلي كنرعد ، ضربت يدي بالموس وماحسيتس .. حتى شفت الدم
ومرت خالي مشات طلات من الشرجم وهبطت هزات معاها ڤاليزاتها..
طلعت جات نيشان الكوزينة ( كاينة أنا مرت خالي التاني وجدة )سلمات عليهم وأنا ما وصلتنيش
متلفتش فيها ..
وهي تقول ليا :هذا هو الاستقبال اللي تستاقبليني بيه؟
أنا: أوهوووووووو الست “ماما” شرفت ؟؟! لاااااا وكنت بغيتيني نتلقا ليك بالدقة العيساوية مع شوية تمر ولحليب؟؟
هي:ممربياش…
أنا: إيييه ؟؟ و فين كنتي 17 عام هادي باش تربيني؟
(وكنغوت ) لا .. و كون مقلبتش عليك وطلبتك صباح و عشية ، مكنتيش تجي…أنا مانعرفك وانتي متاعرفيني وجاد لبغيتي تشوفيه را هو ناعس في البيت
هي:أنا اللي عتقتك من العافية ؛ وخشيت راسي فيها باش نجبدكً؟!أنا اللي درت و انا اللي فعلت..
أنا:وانت اللي رميتيني لجهنم؛كون غيير خليتيني مت كان يكون حسن ليا و ليك !
درت عند مِّي شفت فيها و قلت :ميمة يا انا يا هي فهاد دار
هي:هاد الدار ديال بابا الله يرحمو
انا:قولي هكذاك جايا على قبل الورث؟؟
يووووه فكرت في كامل الاحتمالات وايني خاذي فلتات ليا .. ونسيت شنو قلت في هاديك اللحضة … اللي متأكدة منو جرحتها للعظم ..
وبدات تستفزني بقا ليك غيير ضربيني
لميمة بدات تبكي مشيت بعدت!
وتبعاتني كتغوت..كتشبهي باك فاعلة تاركة .. وكلشي دار فيا سارا نعلي شيطان.
و أنا غلي مخلانيش نسكت: خرجي من هاد الدار… معندك فيها حق الورت باااااااح كلشي فسميتي… حقك في ديور والفيرمة وكولشي كتبو ليا جدي الله يرحمو يا لاه الباب ..
مشيت لبيتي اللي هو بيت جدي الله يرحمو .. وسط الاعصاب و الغوات كلو ؛ تلفت في بلاصتو ورجعت شفتو نهار بكاها وقاليا عافاك لقاي ماماك قبل ما نموت .. يااااه يا بَّا حبيبي ؛ الحمدالله مشفتيش هاذ الحالة .. تهذنت و بديت نبكي عليه و نسيت راسي و نسيت حتى شنو يالاه طرا ..وهي مشات ..
جدة كتبكي و مابغاتش تاكل ولا تدچ لانسولين هي اللي عندي واخا كننفاعل دموعها غاليين عندي
أنا: مالكي أالبوچوشااااا ديالي
ميمة: هادشي كامل و مالي؟!
أنا: سمحت فيك وكلشي و مازال هازاها في قلبك؟!
هي: راها بنتي كبدتي واخا معرفتش شونو دير فيا، وانا العمر مابقا فيه والو اليوم ولا غذا بغيت تمشي مسامحة مع كلشي
أنا: بديت نبوس فيها؛ بغيت نموت أنا قبلك قولي ليا شنو بغيتي و نديرو و الله مانبقى نتسبب ليك فدمعك مزال
لميمة:مبقا ما يدار راها مشات وعمرها ترجع ..
فهاديك اللحظة عيطات ليا خالتي :سارا ماماك تكرفص عليها باباك وراها مزال متاترة متزيديش عليها حتى نتي .. ورا حنا كاملين درنا فيها
أنا:عارفة كلشي
خالتي:تسامحي معاها وبداو من اللول
أنا:واخا مايكون غير خاطركم غادي نافقها على وجه مِّي
خالتي:لبسي راها عند خالتك نعيمة نمشيو كاملين نجيبوها
انا:واخا اللي بغيتو ..
وهذاكالشي اللي كان ..نفاق في نفاق
عيط ليا أشرف و قاليا جبيبي ولدك نمشيو نلعبو ..
أنا: ولدي مع ولد خالتي راه ماكفرقوش
أشرف: يالاه أنتي ماباغاش تلعبي؟؟
تلاقينا ..وعاودت ليه كلشي في طريق ..
هذاك نهار كان الاربعاء ..
أنا: غذا ان شاء الله غاذي نطهر جاد
أشرف: بصح؟!
أنا: آه ونهار السبت ان شاء الله ندير حفلة صغيرة ..نيت ندردك شويا؛ شحال هادي مركزت 😂😂😂😂
أشرف: أييه جات معاك؛ متعرضيش عليا نضرب ليك القعدة راني كنعرف ليها
أنا: ههههه بابا سميتو جون دو لافونطين؟!
أشرف: الى ريسكي عليا بلاش ..😅
أنا:مكاين حتى حد غ الفاميلة وجيران غير حنا بينا را قبيلة خهه
أشرف: غادي تجيبي العابات(عادة عندنا فالمحمدية)ههه
انا:غادي نجيب العود شطح لينا ويدور كيف بغات عادتنا وولد خالتي غادي يجيب ليا الدقة المراكشية والعيساوية ولعابات باش نتعلم شوية نولي تسونامية حتى انا😆😆
أشرف:سعداتي تعلمي تعلمي كلشي ينفع ههه
أنا شنو كتقصد؟؟
أشرف :يالاه نلعبو طوموبيلات خواو مشينا نلعبو وعينيه عليا وغادي نطير بالفرحة 💗💗💗
لعبنا دورة ورجعنا لعبنا البنات غادين ياكلوه بعينيهم 😤😤😤
واحد شويا بداو دراري كتساطحو معايا…خلاني حتى درت وبلوكاني في جنب ووقف
أنا:مااالك؟؟
أشرف: الموسيقى مجهدة مكنسمعكش شنو كتقولي؟؟
أنا:خليني ندوز😁
أشرف:عجبك الحال😠؟؟
أنا:وأنت عجبك الحال؟
أشرف مغاديش نخليك…
بقيت كنضحك😀😀
هبطنا ومشينا نقلبو علاش لعبو.. او بالاحرى كقلب على بلاصة خاوية من دراري
ملقيناش … ومشينا من تماك ..
أنا: جا على بالي چلاص باااارد ديال حامض و پيسطاش و عليه شي كولي ديال شكلاط كحل ..يا ماما!
أشرف:ڤينزيا آيس؟
غ وصلنا تلاقينا مع صحابو وجه بوجه
مع طموبيل فيمي مكيبانش… قلت ليه بلا ما نهبط حتى يمشيو
أشرف:حتى حد ما دخلو فينا ،هما صحابي ونتي…
أنا:وأنا شنو مالك حبستي؟؟
أشرف:هبطي هبطي😉
وقف معاهم وأنا بقيت بعيدة هزيت راسيالسلام من بعيد!!
واحد اللحظة بداو يوشوشو بيناتهم….أمين جا لعندي،تلفت اشرف.. خلاه حتا وصل وجا
أمين:شنو كاتديري مع أشرف؟
أنا:سولو هو..
أمين:عندك إكون ضحك عليك حتا نتي … راه
وجا أشرف وهو يسكت 😠
أشرف:سي أمين مبانتش ليك معايا؟! انا معمرتش ليك عينيك؟؟؟
أمين:أشرف وهضر أصاحبي غيير بشوية وزيدون كنعرفها قبل متعرفها أنت..
أشرف: بصح كتعرفيه،،
أنا:أشرف الفضايح مكنبغيهمش
جاو كاع صحابو كجريو قبل ميدخلو فبعضياتهم …جروا امين ومشاو
مشينا دخلنا القهوة ومكشوفش فيا معصب 🙄
أنا:أنا ماشيا للحمام
أشرف:شنو نطلب ليك؟
أنا:اللي بغيتي….ومشيت!
ملي رجعت لقيتو كهضر فتليفون
غير وصلت قطع ..؟؟
أشرف:بصح كتعرفي أمين؟
أنا:جينا ناكلو چلاص ولا جغديييد؟
أشرف:أوووووف وفري عليك وجاوبي
أنا: فين بغيتيني نعرفو، صحابك كاملين كنعرفهم ويعرفوني،مرة تلاقيت بيه في الزيمر بيتش وجا سلم عليا وجاد لصق فيه وبقا كلعب معاه شي خمسة ديال دقايق ومشيت بحالي….علاش مسمعتيهش شنو قال هذاك نهار قدامك!
أشرف:لا منغير هذاك نهار؟!
أنا:جيني من اللخر وقوليا شنو في
كدور في راسك ؟!
أشرف:سارا راه هداك انا اصلا معنديش معاه ضاسر ومنبغيكش تهضري معاه
أنا:اواااااامرك باشا ؛ وقول لهاذيك اللي ، عيطات ليك تمسح نمرتك 😉
أشرف : سارا ما ففف…
أنا: مبغيت نسمع والو ✋🏻
أشرف: أوامرك سلطانة ..يالاه آجي نتصالحو
وعطاني صبعو صغير💗😂
وايني هضرت أمين بقات كتزنزن ليا في وذني😕
أشرف:امتى غ ترجعي لفرانسا؟؟
أنا: 15 فهاد شهر ان شاء الله ..
أشرف:ساارا باغياني وللا …لا؟؟
أنا:لمفروض تجيب والديك عندنا وتسولني على سنة الله ورسوله
ماشي هاذ الشي اللي كنتي غاذي الدير ولا بدلتي رأيك؟!
أشرف: آيييييه؛ وتقبلي ولا ترفضي على سنة الله و رسوله؟!😂
أنا: نسمع شروطك و اسمع شروطي و نشوفو؟! أطربني ..
أشرف: اممم ولدك ولدي؛ واللي ديالي ديالك؛ الخدمة أوهو ..صحاب دراري و العقلية ديال تچواريت حتى هيا أوهو ..ويلا بقيتي تلبسي جلالب نموت عليك غير هو وكان زيدي طولي فيها ..ماشي بحال هاذي اللي لابسة جلابة ديال دقايقية😤
أنا: اممممم واخة ..ودابا سمع شروطي:
أولا: البنات أوهو: حتى الى اضطريتي سلم من بعيد
ثانيا: ولدي ولدك وايني منبغيش تحط عليه يدك.
ثالثا: السهريات و نعسيات برات البيت على جثت مشة الجيران😆
رابعا: أنا اللي غاذي نظم عرسنا!
خامسا: المؤخر غادي ندير فيه واش بغيت! ويلا جات على خاطرك؛ شهر الكوفيتير في المالديف😇😇😇
أشرف: مواااافق؛ يالاه قراي الفاتحة😁
أنا: بالفرونسي و لا بالعربية؟!
أشرف: فكرتيني؛ فرانسا نمشيو الى بغيتي
فالڤاكونص ….وغادي نعيشو فالموغريب😎
أنا:منقدرش
أشرف:وعلااااش؟؟؟
أنا: ولفت لهيه،وولدي حتا هو
أشرف:جاد باقي صغير،دابا سيري وجيبي كاع لتحتاجي و اجي…
انا:العام جاي ناخذ الجنسية إلى بغا الله ونرجع..وكل شهرين نجي…
أشرف:لاا معندك مديري بالجنسية ولا حتى حاجة أخرى ،متحتاجي والو معايا
أنا:مستحيل خاصني نضمن لولدي مستقبلو ويلا قدر الله وتفارقنا نعرف علامن نتكي ظهري ..
أشرف:مكتيقيش فيا؟؟؟
أنا: ماشي هكداك..
أشرف:انا قلت ليك شنو،يا تقبلي يا ترفضي…خودي وقتك وياني جاوبيني قبل ماتطلعي للطيارة وأنتي تعرفي مصلحتك!
انا:كتحطني بين زوج حوايج… شنو فيها لتنازلتي؟؟؟
أشرف:فكر مزيان ..
بقينا كندردشو شوية وكل واحد فينا مرة مرة كشوف في لاخر ..
و دخلت للدار ..الليل كامل بت نفكر و تشاورت مع مرت خالي(نادية)اللي دايرة فحال صاحبتي ..قالت ليا سارا عقلتي على خالد(طليقي)شنو كان داير عليك؛ حنا لو كان قالو لينا يجي نهار و يطلقك كون حطينا ريوسنا ضمانة؛ ديري وراقيك و هاذيك الساعة رجعي للمغرب ..المهم تكون عندك رجل هنا وفي أروبا ..
عندها الصح؛ وايني حتى أنا باغياه .. حرت !
طهرت ولدي الغد ليه ..عيط ليا سول على جاد و قلت كلشي داز مزيان ..كان خايف بزااف حيث طهرتو تقليدي !
أشرف: عارف عندكم الناس و خاصك تبقاي حدا جاد؛ عافاك في العشية خرجي نشوفك غ خمسة دقايق و رجعي ..
أنا: دبا نشوف ..
في العشية مقدرتش نخلي ولدي قلت ليه ؛حتى الغذا ..ان شاء الله ..ولدي يكون ناعس نعيط ليك
أشرف: واخا ..أنا غاذي نوصل على دراري القهوة ..
أنا: تمام جانام(واخا يا روحي بالتركية)
أشرف: شنو شنو شنو؟!
أنا: قلت ليك واخا ..
أشرف : هاذي كاملة واخا؟!! تمام عرفناها وايني الأخرى شنو كتعني ؟!
أنا : جانام هي روحي !
أشرف: تيشيكر تجاناماً😁
أنا : تشوك كوميك 😂 قتلتيني بالضحك
أشرف: أييه و إنتي شكون مالف يقولها ليك؟!
أنا: هرستي الرومانسة ؛ تلاح حبيبي تلاح
أشرف : باااي
الغذ ليه ملقيتش ليه وقت مع توجاد و تقلق عليا ! 😪
نهار الحفلة حتى هو من صبحت الله وانا مشغولة…حمام مكياج ظفار تكشيطة ووو والحفلة مع السبعة وانا فايقة حتى 12
أشرف:نشوفك اليوم وربي كبير
أنا:وعد والله
أشرف:توحشتك بزاف💓
أنا:حتا…انا 💗يالاه قطع غادي نمشي نوجد راسي…
أشرف: تسنايً؛بلا متكثري الماكياج ماكجيش معاك
أنا : لا بالعكس ،خاصني نخيب راسي باش حتا حد ما يديها فيا و لا يحاشيها ليا ! 😉
أشرف: علاش كاين احتمال؟! ما نظنش 🤔🤔 إلى متزوجتش بيك أنا ، تبيري 😂😂😂
أنا: لهلا يحييك 😤 إلى متزوجتينيش أنت ياخذني أمين 💃🏻💃🏻💃🏻😈
أشرف: قطعي حسن ليك لا الطهارة تولي عزو ! 😠😠
وقطعت ليه في وجهو ؛ يستاهل ؛ تبيري قالك 😤
لبست تتقاديت انا وولدي وعائلتي… وجا العاود…والدقة ودارو ليه ركبة …🐎🐎🐎
وأنا قدام الباب وخدامة نزغرت ونسخن الركزة… ونسابنا ساكنين قدامنا… عيالاتهم معروضين ورجالاتهم معروضين فدارهم(عرضنا غير المراوات باش ناخدو راحتنا خلاتي كلهم محتجبات)
المهم قطعت الطريق وديت ليهم طبسيل ديال تمر(عمرتو بيدي)و ملي تميت راجعة وهو يوقفني أشرف قدامهم..
اختي تسمحي ليا بشي شطحة؟اووووه بغيت نقول تمرة
انا :بعدت منو حيث كان مقرب ليا بزاف، تفضل أخويا..
أشرف (وهو كتعزل في تمر،) :مالقيتي اللي يديه ليهم؟؟
انا:كززت سناني😁😁،كلهم كشوفو عافاك سير..
أشرف:ماشاء الخالق 😍😍انا عمرك فكرتي تجيني بتكشيطة😍😍😍
مشيت… وخليتو
بقينا شي نص ساعة أخرى قدام الباب وهو بارك على الكابو ديال طموبيلتو وكتفرج 💃🏻💃🏻💃🏻
طلعت لدار وزيد دردك وعاود دردك:ولدي نعس… غير بداو يحطو لعشا…وعيطت لأشرف
أنا:جنام بينيم💖💖
أشرف: ياروح جنامها💘💘
انا: جي لعندي عافاك ،وچاري قدام باب دارنا…باش غير نخرج نطلع نيشان للطموبيل…وتصرف عادي
أشرف:لااا خليني نوقف بعيد وجي مبغيتش شي حد ينعت فيك
أنا:يا الكامبو الى وقفتي بعيد غادي يشكو،اما إلى وقفتي قدام الباب..يحساب ليهم شي حد من عيلتي✌🏻✌🏻
أشرف: ده انتي تجرييبة باآاى،وايني عندك الحق😄
أنا:متعطلش..عافاك😘
هزيت العشا كامل بخبزو وبمونادتو الكيسان وطباسل وبحوايج خرا مطيحش على البال
جا وطلعت وطرنا غير فتنا دربنا ..
أشرف: علاش ناوية وشنو هازة في الڤاليزة؟؟
أنا:عشانا
أشرف:حلفي؟
أنا: و الخالق اللي جمعنا😇
أشرف: ههههه مجنونة😍😍😍
أنا: مازال ما شفتي جنوني😎
أشرف: جايبة عشانا بزوج و لا ديال درب؟!
أنا: غير أنا وياك: طيط أ طيط💏
أشرف: إييه و فين غاذي نتعشاو؟! فوق الطوموبيل؟! طمنيني درتي ساندويتشات؟!
أنا: طيط أ طيط بالساندويتشات؟! أها ممكن
سير لاكورنيش عافاكً😍 😋
أشرف: أوامرك برانسيس👰🏼😍
أشرف:جيتي كتحمقي فتكشيطة ولحمر كيجي عليك..
أنا:جاتني عادية راغير أنت عماك الهيام أما حتى الحب كنقص غيير في نظر😁
وصلنا قلبنا على مول طوابل اللي ككري لصحاب مك يا مك ضرب الشيشة وصبح منك😁😁😁
كرا لينا طابلة بكراسها.. وهزها معانا بعدنا على الناس…
أشرف:عمرني عرفت بللي انا رومانسي وكنبغي هاكذا..حييتي فيا إحساس جديد 😍😍😍
واخا كان عندي فكرة عليها 🙄
أناحليت الڤاليزة وأشرف مضارب كرسم في قلب برمل
جبدت ناپ غطيت الطابلة والكراسا (من اللي كريتهم لطهارة)
وبديت نحط لعشا كنت دايرة فبواطة سبيسيال باش يبقى سخون..
هو بقا واقف كشوف فيا بنظرة إنبهار وإعجاب بنفس الوقت وابتسامة فطرف شفايفو
وانا كنبادلو بنفس النظرة مع شوية تكبر 😬
أشرف: اممم هاذ شي ريحتو بنينة والله لو كنت عارف؛ كنت جبت شميعات ولا شي ميلو فاخر و شعلناه هنايا!
أنا: أييه و شي جوج قطبان كبدة وبدا تشوي 🤔 علمناك و بديتي تفلسف علينا؟! أجي شعلهم معايا(شمعات ليد)😇
بقا ساكت؛ فحال الى ممصدقش عينيه 😍😳 خداهم من عندي وبدا كشعل و دور بيهم الطابلة و أنا كنتفرج فيه ..
جاب ليا ما د البحر غسلت يدي؛ جر ليا الكرسي؛ برك حتى هو شعلت أغاني رومانسة ديال نانسي عجرم في التيليفون واخا مكتسمعش بجهد مع الأمواج
أشرف هز كاس كوكا و حتى أنا
أشرف: كل عام و انتي حبيبتي 💘💘💘
أنا: وانت حبيبي 💖💖💖
هانتي لا تقولي علمتيني😄
وبدينا ناكلو وندردشو و عينينا ماكتفارقوش💏
كلنا؛ كملنا وجمعنا الروينة
أشرف: ماجاكش البرد؟!
أنا: لا شويييية
أشرف أجي نتمشاو ..
وبدا كصور فيا ..وأنا كنتعوج؛ وتصورنا مع بعضياتنا ..وجهو ملاصق وجهي شميت ريحتو؛ وحسيت بوجهو وقلبي بدا يضرب في المليون ..احم احم ودوزنا الليلة ضحك ولعب ..💗💖💘💝
دخلت لدار؛ كلشي بدا يسول فين كنتي فين غبرتي ..؟؟؟!أنا : لا غير ضرني راسي مشيت تكيت في بيتي شوية .
جدة: الله على بنتي؛ غير شي عوينة هاذي😱؛ نجيب ليك تعشاي؟!
أنا: لا والله ما قادة؛ خليه ليا نتغذى بيه(كنموت على الماكلةالبايتا)ولعبتها مريضة😁
شوية د الناس اللي بقاو بداو يمشيو ؛عائلتي بقاو مجمعين وانا مشيت لفراشي و خدمت الموسيقى و بديت كنتفكر لحظة بلحظة و واحد الإحساس في قلبي يا سلاااام ونعست أسعد وحدة
💜💗💖💛💘💕💞💝💟💓❤
بقينا كنتشاوفو حتى نهار اللي غادي نمشي فيه…
تلاقيتو في قهوة آخر نهار!
وسولني..
أشرف:سارا شنو قررتي؟؟
أنا:حطيتيني بينك وبين ولدي
وباباه مغديش يسكت نخاف يتهمني بالخطف ويوليو محيدينو ليا
أشرف:وانا شنو كندير؟؟؟ والقانون مع الام
أنا: منقدرش نغامر
أشرف:نفهم من هادشي مغاديش ترجعي؟!
أنا: صبر غير عام و نص بالكثير نقاد أموري وأنا معاك
أشرف: نعطيك شهر ..
أنا: هاكدا تكون أنت اللي ختاريتي ..
أشرف: ومنين عارفة نيتك معايا علاش مازال شفتيني وبقيتي مرة على مرة كتحفري فيا بلاصتك؟!
أنا:أانا من نوع اللي كعيش اللحظة وما كنخممش في غذا ..
أشرف: هذا آخر كلامك؟!
أنا: انت تعرف ..
وقف وقال ليا: شكرا ..تهلاي في راسك 🚶🏻 ويلا بدلتي رأيك عارفة فين تلقايني و مشى ..
متبعتوش ..خديت طاكسي ومشيت للدار ..عينيا حمرين بالدموع!!
اللي كسولني كنقول ليه مساخياش بيكم غاذي نتوحشكم
طيارتي؛ كانت مع الزوج ديال الليل ..مشاو معايا عائلتي وصلوني ونا كنتوادع معاهم ..بان ليا أشرف؛ عينيه مغرغرين فحالا كيقول ليا رجعي ..مشفتش ورايا😢😓
دازت شهر و يومين توحشتو غادي نتصطى عليه،عيطت ليه:الرقم الذي تطلبونه غير موجود
لا أعرف كيف لكن كنتمنى يقراني
أحببتك وساظل احبك الى مابعد مماتي لانك ‫#‏رجل‬ ليس ككل الذكور

 

الجزء الثاني —> ~أنت لي ~

صبرت حتى صبرت و رجعت اتصلت بيه و كل مرة نعيط ليه نلقى تليفون ديالو طافي ..
علاش ؟! حيث عارف غاذي نضعف و نحاول نتاصل بيه ؟! كنتاقم مني ؟؟؟
مبقى كجيني نعاس و مابقيت كنركز في الخدمة ديالي ..و ما بقيت باغية ندير والو ؛ غير سادة عليا في داري .. و عيقت كل كرة نعيط الخدمة نقوليهم :
مريضة مريضة مريضة 🤕🤒😭
قررت نسافر ✈️ و نبعد على أي حاجة روتينية ..(كقولو السفر هو اللي كداوي الجرح )
سافرت سيمانة لإيطاليا و بالضبط ل ڤينيزيا(كانت أرخص رحلة لقيت).. وايني الوجهة ديالي اللي حتمها عليا بزطامي€ وخذيتها بدون تفكير ===> كانت غلط 😔
غلط لحقاش المبتغى ديالي كان نهرب باش ننساه لقيت راسي كل ما نهز عيني في الناس نلقى كوپل عشاق ، اللي مشادين يد في يد و اللي معانقين و اللي مع ولادهم واللي كضحكو ووووو اللي كطلبو مني ناخذ ليهم تصاور
وأنا ساهية فيهم من وحدين ل وحدين ..
و بلا مناخذ تذكرة ؛ الذاكرة خذاتني للمغرب ..لااا و حطاتني قدام القهوة ؛ <لاپلاص ڤيغت >فين شفتو أول مرة ؛ هربت منو، جرجرتو في زناقي و ساريتو مدينتو ..
وفين أول مرة جات عينيه في عينيا ..هضر معايا ،أول تبعني .. خاف عليا .. و عيب سميتي : أ ساررااا 😌
التفاصيل كلها باقية محفورة في راسي ثانية بثانية
وأنا كنسترجع الذكرايات نفس الاحساس كنرجع نحسو هذاك الاحساس اللي خلاني نتغرم فيه و نعشقو ..
كيفاش نتزال ونسمح في ولد ناس فحالو ؟!
كيفاش نتزال على شخص ماشافش فيا عيوبي (اللي ماشاء الله مككملوش)
فين نلقى واحد يبغيني لشخصي و ما هموش نكون مطلقة ولا عزبا ؟!
لااااا و باغي ولدي يكون أول ولادو؟!
واللي مخلاكش تقدري تطوي الصفحة أنه ما قال عيب؛ السيد قاد بيك و بولدك و ميسر عليه الله .. علاش مقبلتيش و خليتي الباقي على الله ؟!
سارا.. لو كان أشرف معندوش إمكانيات يجي على برا؛ كنتي غاذي تمتاحنيه و بكل الطرق باش تعرفيه واش باغيك على الحلوة و المرة و لا غير الاوراق .. وايني كيف ما يحتاجش و معندو مصلحة معاك و ما خلا ليك فين تشكي و جاك يدق من الباب و بغاك في الحلال و ما خلا ليك فين تهضري🤐
—>هو .. اللي متاحنك وبغى يعرف قدرو و معزتو عندك ..
كنتي أنانية فكرتي في راسك و مستقبالك ؛ فكرتي في غذا، غذا اللي حتى واحد فينا ماضامنو يجي ولو نديرو عليه جميع التأمينات 😥
ماشي على أساس انتي كتعيشي اللحظة و ماهامكش شنو مخبي ليك غذا ؟! و دايما تقولي كل نهار برزقو بفضلو مشاكيلو همومو وًأفراحو ؟! ياك ديما مخلياها على الله ؟!وقفات على أشرف دبا ؟! ..
كملات رحلتي و كلها عتاب تساؤلات حسرة و ندم على ذكرايات …
غير وصلت قلت والله ما نرتاح حتى نهضر معاه ..وايني كفاش نتواصل معاه و هو طافي تليفونو ؟!
آاااااه ؛ أميييييييييين ؛ أمييييييين خلا ليا نمرتو 💃🏻💃🏻💃🏻
مخليت فين قلبت عليها ؛ ملقيتهاش في تليفون و لا حتى في الارقام اللي ك نسانكرونيزي مع الايمايل ديالي ..
تفكرت .. كنت سجلتها في التيليفون اللي كانت مسلفاني بنت خالتي (تليفوني كان تسرق ليا في البحر وقتها )
عيطت لبنت خالي مريم وايني مكتجاوبنيش ؛ أكيد في المدرسة خليت ليها ميساج في الخاص و في الفايسبوك (باش نتأكد باللي قراتو ) :
و مريمتي مريمتين و يلا عتقتيني مريمااااااااا
القلب مجروح .. و بدوووووووو أشرفاااااااااااا
غير تشوفي هاذ الميساج عيطي ليا ضروووووووري ..عافاك
نهار مبغاش يدوز و انا كنتسنى فيها تعيط ليا وصلات السبعة ديال العشية و مازال ؛ عيطت ل مرت خالي ☎️
نادية : اهلا غبرتي العفريتة ؟!
أنا: توحشتك , كنعيط ليك من پورطابلي ؛ منقدرش ندردش معاك ؛ غير تشوفي مريم قولي ليها تعيط ليا ضروري ضروري
نادية: واخا ؛ مكاين باس؟!
أنا : لقيت ليها عريس
نادية : ل مريم؟!😳
أنا : بااااااي 😘
ساألوني كثييير ؛ فرشو لي عشانو الأرض حرير
و شفتي كثييير ؛ و مشفتش زي حبيبي أمير📲
📢📢مريييييييييم كتعيط ؛ نقزت من الكوزينة لبيتي
أنا : ألو مريم قولي ليا تلفونك اللي سلفتيني باقي عندك مبعتيهش؟!
مريم : خلينا من تليفون ؛ فين هو العريس ؟! 🤗
أنا : واش كتضحكي عليا العريس لقيتو تال راسي ؟! جاوبي فين هو التليفون ؟!
مريم : بنت الحرام ؛ غير قالتها ليا نادية ؛مشيت نجري عند الخياط تاويت معاه على تكاشط و درت مخطوبة في الفايسبوك ؛ والناس يباركو وانتي كتفلاي ؟؟! المشاعر ديالي تجرحو و الأهم الى كان شي حد ناوي ؛ راه هرب أحأ أحأ
أنا : نتزوج أنا بعدا و نبقى زن زن على خو راجلي حتى نلسقك فيه ؟!
مريم :خليني يا ختي نتزوج راها نوبتي ؛ نتي ديري پوز حتى يتوزجو كوزيناتك(بنات خالاتي و خالي) ويولدو عاد تجيك نوبتك هاذيك الساعة عاودي تسچية ..
أنا : بلا بلا بلا مكتساليش
مريم : آجي لهنا ؟! كيفاش تلصقيني فيه ؟ !لهلا يحييك و هاهو الضحك العكري 😡
شنو ناقصني ؟! العقل ماشاء الوهاب ؛ الزين ما شاء الخالق ؛ لاطاي بلا منقول ليك منحوثة ك الحوتة 😜😜😜
أنا : مرييييييييييم التليفون ؟؟
مريم : هو باش كنهضر معاك راه لاخور مخصر !
أنا : قلبي في ريپيرطوار على سميت أمين
مريم : تسناي ندير مكبر الصوت و نقلب
… عندي غير أمين ديالي
أنا : قلبي مزيان ؛ ولا نقوليك شوفي سميات : قمزاز ؛ شايف نفسو ؛ صاحب أشرف ؛ زيمر بيتش .. المهم شي سمية بيزاغ مريم : بلاتي صبري … أحمد جواد اسماعيل هشام جواد وووووووووووووو سمية
أنا : الحمد الله قلتي سميت بنت كنت نيست منك
مريم : كو كو كونطخولوغ كاوكاو 😳😳😳
أنا : آه آه هو رسلي ليا نمرة دبا دبا في الفايسبوك مشيت نجري حليت صفحة ديال مريم بنت خالي
لقد قامت آيرم إيمير بتحديث حالتها الاجتماعية :
⚠️<من عازبة إلى مخطوبة >⚠️
والله مكذبات هاذ المسخوطة 🙄 ونا نخلي ليها كومونطير : نتزوجو بزوج و لا نبيرو بزوج ديريها في بالك 💃🏻
ووصلني ميساج من عند مريم فيه النمرة ديال أمين
سجلتو في التليفون ؛ وترددت واش نعيط كان الوقت متأخر شوية ..
سارا خلي عليك العقلية ديال الچور و صاصفي پا و و و
تعيطي ليه حتى مع الفجر عادي ؛ مغربي و أجرك ع الله
📲 ألو أمين ؟!
أمين : وي سي موا (اييه هو انا)
أنا : ومالك متكلف كتهضر بالفغونسي مموالفاش ليك😆
أمين : بانت ليا نمرة ديال فرنسا قلت نتأقلم مع المتصلة 😁
أنا : عرفتيني ؟!
أمين : لا .. وايني راني سيليباطير ؛ بسم الله عرفيني عليك !
أنا : سارا اللي كونطروليتي ليها الكاوكاو في الصيف
أمين : أهلاااااااان ؛ أش فكرك فيا ؟!
أنا : أشرف .. كتشوفو ؟!
أمين : آاااااه ..اه مزال كنتلاقاو كاملين ؛ ماشي ديما فحال الصيف وايني زوج مرات في شهر فحال دوا ديال الچمل
أنا : تي ديچولاص 😳 لحمي بدا يقرصني .. شفت عندك واتساپ آجي نهضرو فيه و تكايس على ختك ؟! الا لبغيتيني نسيفط ليك الفاتورة في آخر شهر
أمين : هي اللولة أختي ؛ كون غ بالدرهم مايسالش .. الأورو هاذاك ؛ نبات نخلص فيها حتى لا غوطخيت
في الواتساپ ..
أمين : إيوا أش كتعاودي ؟!
أنا : والو
أمين : والو ؟؟؟ و معيطة ليا في هاذ الليل ؟! على والو ؟!
أنا : توحشت أشرف و بغيت نهضر معاه
أمين : أش بينك و بينو ؟!
أنا : كنبغيه و يبغيني ..
أمين : كتبغيه ممكن ؛ كبغيك منظنش ..
أنا : علاش متظنش ؟!
أمين : أشرف كنعرفو من أيامات الليسي ؛ و هوايتو هي البنات ؛ اللي جات عليها عينيه خاصو ياكلها ..
أنا : يمكن كان هاكذاك ؛ دبا تبدل ، كبر و دار عقلو ..
أمين : آه عندك فيها الحق .. دارو غي من وراك بشوية
ملي شفناك غبرتي سولناه عليك قالينا باللي ساكنة برا و رجعتي وووو
أنا : كيفاش دارو ورايا بشوية ؟! شنو كتقصد
أمين : كاملين تعجبنا ؛ ماشي ديالو .. ولد الحرام غفلنا و خطب وحدة ..هاذي اللي كان مخبيها للمعقول ، لاخرين و انتي كان مخبيكم لتفليا
قلبي وقف ؛ دارت بيا دنيا ..وبديت نتمتم : إمتى هاذ شي ؟!
أمين : دبا شي زوج سيمانات .. تفاجأتي؟! نسيتي نهار
قلت ليك بعدي منو .. غاذي يتفلا عليك ؟! ياخذ منك شنو بغى ويلوحك ؟! هذاك السيد عمرني تفاهمت معاه في مسألة د البنات و ديما منوضها معاه على هاذ شي..
أنا :كون هاني ؛ مطرى بيناتنا والو ؛ كان ديما محتارمني و يبعدني على الشبهات .. و عمرو ما قاسني ..
أمين : أشرررررف؟! عجبااااا مموالفاش ليه ..
أنا : زوينة ؟! أمين : صراحة آه و بجهد .. وايني مبعككة ! واخا شفتها غير من بعيد
أنا : عطيني نمرة ديالو عافاكأمين : سمحي ليا منقدرش ؛ القضية فيها المدام و مشاكل كبار ؛ وايني ايلا بغيتي نقدر نعطيه نمرتك ؟؟!
أنا : لا عافاك و متجيب خباري لحتى واحد 🙏🏻الميم عافاك
و شكرا بزاف أمين .. خاصني نقطع نرجع نسول فيك مرة آخرى
أمين : خليت ليك الراحة واخا هاذ شي غاذي يبرزطك .. تصبحي على خير ..
أنا : وانت من اهلو ..
منين جاني الخير ؟! زعمة كلشي هاذ شي اللي عشت معاه كذوب ؟! متعطلش ؟! فيساع خطب ؟! ولا كيف قال أمين .. كان باغي يتفلى ؟!
نعاس مدانيش .. والليل كامل و انا كنقلب على تذكرة للمغرب .. أرخص وحدة لقيت مليون .. أنا وولدي غالية 😔
في صباح ديت جاد للحضانة و أنا مازال مناعساش ؛ ومشيت لاجونص ديال الطيران نقلب على تذكرة .. كلشي غالي و كثر من الثمن اللي لقيت في الانتيرنيت !
وأخيرا لقيتها ..؟؟ —> الكار ؛ واخا كتعطل ؛ المهم نوصل المغرب يا ربي ..
قطعت التذكرة ؛جمعت حوايجي ؛ الكار غاذي من بعد يوم .. ثلاث ايام ديال طريق ..
خديت الكار ؛ بعد يومين ديال طريق وصلنا ل “طاريفا” الاسپانية ؛منها طلعت للباطو .. كنشوف المغرب من بعيد ؛ عمرني ما كنت مشوقة نوصل لبلادي ؛ بالعكس نفس الشوق حسيتو و نا هاجراها لاوروبا ؛ للمستقبل احسن و عيشة چاورية .. تقلبات الآية، و لقيت اللي حببني كثر في تراب بلادي <أشرف> ..
من بعد تامارة و محنة ديال طريق ؛ من طنجة خديت القطار للمحمدية ..
وصلت لدارنا .. لقيت غير جدة و مرت خالي
جدة : حبيبة ديالي ؛ سارا ؟؟؟؟ خبار الخير ؟! مالكي رجعتي بالزربة ؟!
أنا : لا راني توحشتكم و نيت عندي عطلة و التذكرة لقيتها رخيصة مع هاذ البرد ؛ قلت نجي و نديرها ليكم مفاجأة .. 😁
درت الصواب بركت شوية و أنا على أحر من الجمر .. عليا غير امتى نمشي نوشوفو !!
خليت معاهم جاد قلت ليهم غاذية نستلم الطوموبيل اللي كريت .. بينما دخلو نيت ؛ اللي في الخدمة (العائلة) !!
كريت طوموبيل ؛ ومن تماك مشيت لقدام باب دارهم ..
طوموبيلتو مكايناش تسنيت شوية والو ..
شريت كارطة ديال التيليفون و عيطت لأمين ..
ألو أمين .. أنا سارا
أمين : جيتيييي؟؟؟؟
أنا: آه نقدر نشوفك ؟!
أمين : يحصل ليا شرف ..
أنا : من هنا لنص ساعة نتلاقاك في قهوة” إيصپاص آدم”
اللي في لا كورنيش ؟؟!
أمين : واخا ؛ نقدر نتعطل شوية غير نكمل شي وراق تحت إيدي و أنا عندك ..
غير قطعت معاه مشيت لا كورنيش ؛ وأنا في طريقي كنتفكر چاع البلايص اللي دزت منهم و أنا معاه ؛ و الدروبا اللي تودرت ليه فيهم .. 😌😌😌 ميمكنش هاذ شي كامل اللي عشت أنا و ياه يكون كذوب ؟! ميمكنش
وصلت القهوة .. كطل على البحر ونا ساهية في المواج .. شتا و البرد !!
ها هو أمين .. جا !
سلم عليا و سلمت عليه .. و الابتسامة عريييضة !
أنا : جيتي من الخدمة ؟! نيشان ؟!
أمين : اه و ما كملتش حتى الوراق اللي في ايدي ؛ وايني ما يسالش على وجهك ..
ونا كنتطلع في أمين ؛ في نفس الوقت كهظر ليا على تمارة ديال الخدمة ديالو : لاحظت باللي “الجيل “ديال شعرو باقي مناشفش ؟؟ و الكول ديال القميجة اللي لابس تحت طريكو ؛ فحالا يالاه مصلوح ما مكمش ما معوج ؛ الريحة ضربت فيا قبل يوصلني : اممممم ؛ نكمل شي وراااق و نجيك ؟؟ فهمت!!
أنا: أمين عرفتي علاش عيطت ليك ؟!
أمين : يعني ..
سمعني حتى الآخر .. عاودت ليه قصتي و شي تفاصيل عشتها مع أشرف !
أمين : منكرش باللي كتعجبيني ؛ وايني عمرني فكرت باللي أشرف كان كتعامل معاك هاكذا 😳 ؛ وملي شفتك معاه زدت بغيتك قلت ها ي دجاجة و بكامونها .. علاش لا !
أنا : كلنا كنغلطو و نلعبو ونتفلاو .. وايني غير نلقاو فردت رجلينا ؛ كنوليو ناس جداد و نتبراو من الماضي ديالنا !
أمين : ها. الايامات كاملة؛ لاحظت باللي ديما شارد و بالو ممعاناش .. واخا خطب ؟!
أنا : نطلب منك ؛ ومتردهاش في وجهي عافاك ؛ خوذني فحال ختك ..
أمين : ختي كون دفنتها 😂✋🏻 قولي باش نقدر نساعدك؟!
أنا : غاذي تجيب أشرف حتى لعندي “كوت كو كوت”
أمين : لا لا لا ؛ أنا وياه واخا صحاب راه ما شي شي صحاااب ديال الدم .. صعيبة
أنا : أمـــين .. شكرا بزاف ؛ أنا غاذية نخلص و شكرا عذبتك معايا . و نضت !
أمين : سارا ..
تلفت ليه : شنو ؟!
أمين : شوية ؟!
أنا : كيفاش شوية
أمين : صعيبة شوية ؛ وايني ممكن ! بركي اللرض !✋🏻
أنا : تستاهل ؛ بوسة وايني ماشي خويا 😂✋🏻
أمين 📱 كعيط لصحابو واحد واحد ؛ ويقول ليهم نفس الهضرة
الى عيط ليكم أشرف وچاليكم جيوني قوليه انت بعيد نشرح ليك من بعد ..
آخر اتصال لأشرف كصوني ..
أشرف : ألو ؛ أمين نعاود نعيط ليك راني ممساليش في الخدمة ..
أمين : ولا أ صاحبي ؛ راني واحل وحلة خايبة و دراري كاملين عيطت ليهم ميقدروش بقيتي ليا غير انت ؟!!
أشرف : مالك أ خويا مكاين باس ؟!
أمين : شفرو ليا البزطام و ملقيت باش نخلص ؛ وراني في القهوة و معايا واحد البنت ؛ حشمة أ صاحبي راني بعدت باش نهضر معاك ..
أشرف : أشمن قهوة انت دبا ؟!
أمين : إيسپاص آدم اللي في الكورنيش ..
أشرف : يا خويا مالقيتي غير لا كورنيش منقدرش نجي تماك ؛ غاذي نعيط ل خويا يجيك !!
أمين : لا لا راها البنت بغات تمشي زرب أخويا عمري نساها ليك ..
أشرف ؛ أنا جاي ..
وأنا نهز عيني في أمين .. نظرة شكر عمييييييق !
وبقيت أنا و ياه كندرشو .. ونهضرو على السياسة و البلاد و التغيرات ووووو الهضرة اللي مكتجيب نفع !
ومن بعد خمسطاش دقيقة .. ها هو جايي ؛ دخلت لداخل ديال القهوة حتى برك أشرف و جيت !
غير برك في ثواني جيت لعندو ..
شافني ..تلون بدو يتفتق 😔😔😔
أنا : السلام أشرف
تجاهلني ووقف ..
أشرف —> أمين : إنت ماشي راجل ؛ لعب دراري صغار هذا 😡
أمين —>أشرف : خليك غ انت راجل و اسمع للبنت اللي ضربات الاف الكيلومترات باش تهضر معاك !
أشرف تلفت فيا و حل عينيه كبار و قاليا : مكنعرفهاش هاذ الأخت ؛ ورجع دار في أمين و انت حسابك معايا بوحدو .. أاااا ولد الحاج 👿👿👿
و مشى و خلا راسي ب راس أمين .. تنهد و قاليا : أول مرة نشوفو كرعد فحال هاكدا .. دبا بقيتي على خاطرك ؟؟ أنا حاس مغاذي تهناي حتى تنوضي الچيررا عاد تبردي
أنا : أمين ؛ حد ما ضربك على يدك قبلتي بخاطر خاطرك ؛ و ملاحظات ديالك احتافظ بيهم مناقساكش حتى انت 😡✋🏻
أمين : أيواااااا دير خير ما يطرا باس أ لالة ؟؟ العفو و ناض مشى !!
آخررر همي أمين و الملاحظات ديالو .. عقلي كلو مع أشرف 😔 نستاهل شنو دار فيا !!
وايني غاذي يكون غالط الى فكر هذا هو آخر كلامي ..
دخلت للدار ؛ جمعت معاهم شويا ؛ دوشت و مشيت لبيتي تكيت بيما طيبو العشا !
خدمت الموسيقى :
🎧🎧🎧
هجرني و روح غيب و قلي هايدا النصيب
وا حكي عني غريب و خلي قلبك حجر
فكر انت بحالك و اتركني للقدر
كفي بدوني حياتك ؛ عادي قلبي انكسر …
حتى داني نعاس ..
في صباح فقت ؛ وكيف كل مرة كطيحو عليا أفكار جهنمية !
يا أنا ؛ يا هو .. غسلت وجهي طليت من الشرجم الجو غزال شوية د البرد وايني شميشة كتطل علينا
هزيت تليفوني و رسلت ميساج لأمين .. بردتي و لا مازال ؟!🤒
أمين : على حساب واش غاذي تعتاذري و طلبي سماحي و رضايا 🙄
أنا : ده بعددددددك .. صباحك تفاح و بنان و ليمون ؛ تقديتهم ليك البارح ونا داخلة للدار .. (الستة د العشية)
آخر ما بقى عند الخضار —>يعني خاااااامجين 😂
أمين : مناكلوش بوحدي 😶 ضروري تشاركيه معايا 🙃
هابطة في الدروج من الطابق الثاني للأول ؛ فين كنتجمعو زوج درجات بزوج درجات –> هيهووووو مبروكا علينا هاذي البداية و مازال مازال ؛ ضروري ندير الهيصة في الدار باش نبرزطهم و يعرفرني فقت .. راشقة ليا بزااااف ؛ اللي شافني ميشكش نعست و خاطري مكسورة 🤓🤓
الميمة : صباح الخير ؛جاد كفطر معايا ؛ آجي تفطري حتى انتي ..
أنا : فقت شبعانة .. غاذي نمشي نصايب شعكوكتي و جاية !
كملت شعري .. لبست و خرجت و قلت لدارنا ميتسناونيش للغذا ؛ مشيت عند صاحبتي لبنى ؛ تعاودنا و فضفضنا لبعضياتنا .. وبالضبط شنو وقع مع أشرف و بالتفاصيل المملة ..
لبنى: الى بغيتي الصراحة ؛ قليل شنو دار فيك 😎
أنا : كتشفاي فيا دبا ؛ وايني غاذي نعجبك فيه و تقلبي ڤيستك ✌🏻️
لبنى : متبدلتيش .. انتي هي انتي ! وايني تقبليها هاذ المرة جا اللي يطيح ليك نيفك للارض 😁
أنا: شنو درتي للغذا ؟! جبتي ليا الجوع ..
لبنى : مرقة بدجاج تسناي نسخنها ليك .. نيت بوركابي عندي مغدي عند مغميتو 😏
أنا : طاحو كواريك .. بقيتي كتفششي عليه حتى طفشتي السيد من الدار ! خليك هازة زنافرك و حالة فمك في المسلسلات التركية ؛ حتى تولي تغني ؛ تزوج ما قالها ليا 😆😆😆
لبنى : طفريه غ انتي .. وفكي حريرتك ! هاوا جابها بوقوووووصة و لاطاي و يعلم الله شنو آخر .. أنا : قلنا ليك سخني المرقة ماشي مرارتي .. و أصلا فين عمر القلوب تشدو بالزين ؟؟؟ بصح أنا دبدوبة ؛ وايني ميتشبعش مني سكرة 😇يا يكون الواحد مزيان ونحلي ليه ايامو يا عوج نطلع ليه الضغط و ندير ليه السكر مع الملح ..
لبنى : خرجو عليك أ بنتي الچور ؛ بقاي غير حالة فمك و تحنجري حتا يوليو فيك جوج : وحدة لأشرف و وحدة لأمين كولي كولي !
نغسل مكافشي ونا جاية ..
اممم الله يعطيك الصحة أحسن حاجة فيك كتعرفي طيبي .. الماكلة والمشكل حتى الخاطر😆 مفهمتش علاش مصاحبة معاك و انتي ديما ضدي 😏
لبنى : و دبا شنو كتفكري ديري ؟!
أنا : نخرج مع أمين 🙃
لبنى : آوييييلي على الدرية تصطات
أنا : بلا متخرجي فيا عينيك ؛ و تبداي تنوحي 🙄 عندك شي حل آخر ؟!
لبنى : صراحة ؟ لا وايني ؛ كيفاش بغيتيه يرجع معاك و انتي غاذي تخرجي ليه مع صاحبو ؟؟ هاذيك الساعة زواج غير نسايه
أنا : ماشي نخرج معاه بصح بصح .. غير نقلي ليه دمو ؟ نشوفو وقيتها واش غاذي يولي يعرفني و لا لا ..
لبنى : تسلييييم منك يا ختي تسلييم
أنا : ودبا فكري معايا كيفاش نقنع هاذاك العچوبة ديال أمين ؟؟ وانتي كتفكري زيديني شوية د المرقة و كتري زيتون عافاك !
لبنى : وايلي .. زعمة هاذي وحلتي فيها ؟! وهميه باللي كيعجبك و ارتاحيتي ليه و بلا منوريك 🙃
أنا : هذا كسميوه التلاعب بالمشاعر .. كيفاش بغيتي ربي يكمل ليا و أنا كنلعب بولاد الناس؟؟؟؟
لبنى : كتقتليني غير بالايمان و الموعظة 😲 فكريني هاذ الشي اللي كتديري فيه فاشمن حديث نبوي مذكور؟! أنا : يالاه نخليك .. مواااااح و شكرا على المرقة كانت بنينة ! المهم عولي على راسك غاذي نجيب ليك بواطة صغيورة فين تولي تخلي ليا حقي 😋😋
لبنى : لا جيبي نيت چميلة ؛ راك ضربتي تبارك الله جوج طباسل ؛ كانو سادين عليك ؟؟
أنا : باااااااي
لبنى : عيطي ليا مني دخلي للدار
أنا : غاذي نبيپي عليك و عيطي ليا معنديش بزاف صولد ؛ تلاحي !
مشيت للمدينة نتسارا شويا ؛ من بعد عيطت لأمين 📲
أمين : آش بغيتي ؟!
أنا : عرفت باللي كليتي الديسير خامج ؛ وبغيت نعطيك لي زونتي بيوتيك ✌🏻️
أمين : مع السبعة .. نفس البلاصة ! تلاحي !
أنا : يخليك لميمتك .. أ توطالوغ ✋🏻
دخلت للدار دوزت العشية مع ولدي والعائلة .. غير قربت السبعة خرجت من الدار وأنا في طريقي عندو دزت للقيصارية بالزربة خذيت كوك ديال التيليفون 📱 ديال البارصة
زوج دقايق وراها وصلت للقهوة ؛ تلاقيتو !
أهلاااااااان ؛ كيف داير ؟!
أمين : اللي يسمعك يقول توحشتيني و فرحانة بشوفتي يالمصلاحجية 😁✋🏻
أنا : غير ظلمتيني ..
أمين : آش تشربي ؟!
أنا : نص نص 😂
أمين : من نيتك؟! 😳
أنا : نص شيبة و نص نعناع ! يكون خفيف !
أمين : الناس كطلبو كوكتيل ؛ أو ميلك تشايك ويلا بغاو يتأقلمو مع الجو كاپوتشينو و انتي طالبة براد د آتاي؟!!😲
أنا : هاذاك القزبر كامل طالع ليا فراسي ؛ أتاي مشبشب عافاك .. و نزيدك انت ماشي حبيبي اللي غاذي نتبوزق عليك ✌🏻️أ خويا 😁
أمين : كون كنتي ختي كون دفنتك شحال هاذي ؛ نجاك الله
أنا : ويعلم الللله شنو كتدير ختك 🙄
أمين : هناني الله معنديش خواتات ؛ كاملين دراري
وعيط–> سيرڤور : خويا شي براد د أتاي صغير !
أمين : لاش بغيتيني؟! چري ؟!
أنا : باش نتصالح معاك ؛ و الدليل جبت ليك جلدة 😂 هاك شوف
أمين : أوهوووه ؛ والبارصة من الفوق 😍 باش عرفتيني بارصاوي ؟!
أنا : لو كان كنتو بيناتكم دراري كتهضرو بشوية ؛ كون چاعمة تطليت هاد طلية 🤓
أمين : شكرا بزاف .. شنو هي المهمة هاذ المرة ؟! آنونص لا كولوغ
بغيت نعرف كلشيييييي عليكم و بالخصوص خطيبت أشرف !
بخصوص خطيبتو ؛ منقدرش نفيدك بزاف ؛ علىًما سمعت هي بنت الوفا ؛كتقرا الماناجمنت في كازا وكان كعرفها من شحال هاذي ! هاذ شي اللي عارف ؛ لا أقل و لا أكثر !
و أنا وياه و عماد(الولد سمر اللي كتشوفي معانا ) كنا كنقراو مع بعضياتنا في الليسي تيكنيك و بقينا على تواصل من هاذيك الايامات ؛ عبد العالي خدام معاه في الشركة ديال الحاج (باباه) و مروان ولد دربهم ؛ من كثرت ما كنتصادفو معاهم عندو حتى ولينا كاملين صحاب ..
أنا : خلينا من خطيبتو ؛ كيفاش هي علاقتك مع أشرف ! صراحة حسيت بشي حاجة ماشي تلهيه بيناتكم ؟؟؟
أمين : إحساسك في محلو .. ديما كنا كنسهرو مجموعين ؛ و واحد نهار كنا في عيدميلاد واحد صاحبنا ؛ (فكرتيني ؛ قربات الحفلة ديالو ؛ خاصني نشري ليه الكادو)
كانت واحد البنت كتعجبني و دراري كاملين عارفين ؛ ناض هو بدا كتقرب منها ضد فيا ؟! علاش ما فهمتش !
صافي تصاحبت معاه يومين ؛ حصلاتو مع وحدة أخرى و قربلوها ! وايني أنا متسرطاتش ليا
أنا : كنتي كتبغيها ؟!
أمين : لا ماشي كنبغيها وايني معششة ليا في راسي !
ونهار طاحت في إيدي الفرصة رديت ليه الصرف 👊🏻
أنا : كيفاش
أمين : واحد المرة وقف واحد البنت و خذا نمرتها ؛ حفظت النمرة وعيطت ليها هاذيك الساعة و شفتها في نهارها ! و مخليت ما درت ليها أشمن كادويات و شمن عراضات !
عمرت ليها عينيها سدات عليه و مبقاتش كتجاوبو !
كان مقصر مع الولاد دوزتها من حداه غير باللتي هي أحسن ؛ شافني ! رسلت البنت و بركت في الطابلة معاه كأن شيئا لم يكن ؛ معجبوش الحال و بدا يغوت انت فاعل انت تارك !
فكرتو بشنو دار قلت ليه دبا التعادل و هو يسكت ؛ ومن نهار دار معايا هذاك الفلاش وحنا جامعينا غير الصحاب لاخرين ! أنا وياه من بعيد لبعيد .. هانتي عرفتي كلشي؟! فاش غاذي ينفعك دبا؟!
أنا : ويلا عطيتك الفرصة ؛ تربحو؟!
أمين : لا منقدرش ؛ سمحي ليا ؛ هو هاذاك نهار غير شافك بدا يرعد ؟! تماك فهمت سيد مقصح 💔
أنا : أنا كنبغيه و مغاذيش نسمح لشي حد يآذيه خصوصا بيا ؛ غير بغيت نستفزو حتى يولي هو يقلب يهضر معايا 😞
أمين : أييه و أنا تسيفطيني القبر ولا الحبس ؟! بيناتكم أ بيضاوا ✋🏻
أنا : وملي بيناتنا ؛ لاش قبلتي تجي تشوفني من بعد ما فهمتي باللي هو كبغيني؟!
أمين : والو غير فضول .. و قلت نشوفك ندردش معاك شوية !
أنا : امممممم و أنا ثيقتك ! المهم فكر و باش ما كان رد عليا ؛ ودير في بالك مغاذيش تآذيه بقدر مغاذي تعاوني و تعاونو !
أنا ما بقيت باغية لا وراق لا فرنسا لا يحزنون ! رجعت وأنا مقررة نرجعو ؛ أشرف “ليا ” و متهنا بيه حتى وحدة 👋🏻 أنا مجنونة و معندي حدود !
أمين : وملي كتبغيه حتى لهاذ درجة علاش ما بقيتيش معاه وفرطتي فيه؟!
أنا : مكانتش عندي و مكنتش نقدر نثيق فيه ؛ دبا تغيرت و عرفت باللي هو اللي كنت كنتسنى من شحال هاذي !
أمين : غاذي ندوي مع دراري ؛ حيث أنا كنت ديما نقوليهم ما دخلني في مغامراتو و ما باغي نعرف عليه والو من غير هذاك الشي اللي كتچال قدامي في الطبلة نعرف منهم القصة و نتاصل بيك !
يالاه نخليك ؛ نتلاها شويا بولدي راني هملتو شوية
شكرا بزاف .. واخا كتبغي تلعبها صعيب و قبيح ؟!
انت حنين و طيب و ولد ناس .. الله يلاقيك مع اللي حسن منك 🙏🏻 بسلامة
وأنا غاذية وقفني و قاليا :–> مرة سمعتو كقول لدراري :ما ينسينك في المراة غير مراة بحالها ! جيت و حبس الهضرة ! كنظن كان قصدو انتي ..
أنا : بيناتنا تليفون !
رجعت للدار روتينيات: ماكلة شريب تقرقيب الناب ضحك وجا وقت النعاس ..غ دخلت لبيتي پيپيت على لبنى عيطات ليا و عاودت ليها كلشي اللي طرا وقالت ليا غاذي تقول البنات باللي جيت و نتشاوفو كاملات ..
ميساج من أمين : شكرا على الكوك 👍🏻
دازت ثلاث ايام ؛ نهار الجمعة مع الستة غاذي نتلاقى مع البنات .. ناكلو بيتزا في الريسطورو ديال خو صحبتنا نسرين يوپيييي
ميساج –>أمين : باقين كتلاقاو في لاپلاص ڤيغت ؟؟
أمين –> لا ؛ ستيلا مارينا ! كنكونو لداخل ! ورا العشا كيف ديما !
وصلت قبل البنات لپيدزيريا اللي في شارع الجيش الملكي ” پاسطا پيدزا” .. خذيت سپرايت و بقيت نبقشش في تليفوني حتى وصلو
—> غير دخلو : الخيبة 👏🏼
أنا : أهلا بصديقاتي و سهلا بالذنوب 💃🏻
نميمة تايم 🤓
البنات كل و حدة كتعاود ليا على حبيبها ؛ هاللي باقية معاه هاللي بدلاتو !
نسرين : البنات شوفو شنو تاكلو وايني تكايسو ؛ اليوم خويا يخرجني في الدوزييم 😁
كل وحدة و شنو كوموندات ؛ سالات الماكلة و سالات الهضرة ونا نجبد ليهم المعقول !
عقلتو البنات على دراري ديال الصيف؟!
البنات : آااااااه مازال عاقلة ؟!
أنا : اليوم نفكروهم فينا وعاودت ليهم كلشي قبل ما نوصلو للقهوة 😷 بالاختصار المفيد “علاش رجعت”
وصلنا غير دخلنا و مع تبارك الله داخلين ساكتات ؛ كلشي تلفت فينا أو بالأخص المقزبة اللي معانا 👯
أمين هز راسو ؛ السلام
وانا عيني مشاو نيشان لأشرف ؛شاف فيا و دور راسو ؛ غاذي و كزيان 😍
بركنا برا ملقيناش بلاصة للداخل و مرة مرة كنتلف فيه .. وايني مكشوفش فيا !
والبنات حاضيين معايا ؛ سارا سارا كقلب عليك بعينيه
أنا : وااااا عيالات حميدة الفرشة ؛ ثقلو أ ويلي غاذين افضحونا !
جا سيرڤور كونصومينا للمظاهر و حنا غادين نتطرطقو ؛ ما خلينا البلاصة لحتى شي حاجة ؛ عراضة فابور و ما تدير !
عيطت لسيرڤور ✋🏻 خويا تقدر تحط أغنية نانسي عجرم “إحساس جديد ” ؟!!
واخا دبا نسول الپاطرون هو اللي عندو الپيسي !
شكرا ..
بدات ؛ نفس الأغنية اللي تعشينا عليها في البحر .. ولآخر مرة 😢
كنقلب عليه المواجع 😑 وعليا حتى أنا ☹️
البنات كهضرو و ضاحكين و أنا عقلي بعييييد ؛ مرة كتهزني الذكرايات و مرة كتردني لعندو ! المهم معاه و البنات ناسياهم و معارفاهم علاش داويين !
ضاقت بيا خاطري ؛ هادشي اللي كندير فيه مجايبش معاه الفايدة . .
أنا: البنات اللي بغاتني نوصلها معايا في طريقي ؛ أنا غاذي ندخل للدار ..
البنات : لا ختي غ محلات البركة ..مالكي جاتك الحالة عاودتاني ؟؟
أنا : لا راه فقت اليوم بكري ؛ نتشاوفو غذا ان شاء الله
البنات : زعما غاذي تدخلي تنعسي ؟!! بركي بركي
نقزات وحدة من البنات ؛ السيدة مزيزة و مزيرة ؛ راها مرندڤة مع شي حد ؛ ومبغاتش تدينا معاها !
أنا : ويلي سكتي الناس كسمعو ..عرضتو عليا اليوم كملو صوابكم و خلصو معاكم كاسي ✌🏻️
وأنا خارجة من القهوة ؛ كنسمع شي حد كغوت : سارا تسناي
تلفت ؛ أمين .. غير وصل عندي درت عن البنات درت فيهم شوفة ديال السم و في نفس اللحظة اللي درتها و انا مدورة وجهي عند امين عيني وقفو عند أشرف ؛ مربع يديه و كشوف فينا ..حسيت بيه كبخ الدم ؛ فحال هاذوك اللي كسخن ليهم وجهم يحمارو و يصفرو وذنيهم !
المهم : أمين كهظر ؛ سارا معايا ؟! هوهووووو سارا
أنا : آه اه معاك
أمين : يعني جاية ؟!
أنا : فين ؟!
أمين : من صباح و أنا كنهضر فين هو عقلك ؟!
أنا : سمحليا مع صداع ديال الكلاكصون مسمعتش شنو قلتي ؟؟؟
قرب مني وجهو و قاليا : غذا عيد ميلاد ديال عماد غاذي يدير حفلة في أوتيل أڤانتي اللي على البحر ..
أنا : وأنا مالي ؟!
أمين : واش متبعة معايا و لا لا ؛ غاذين تكون الكليكة كاملة ؛ الى بغيتي تنتاهزي الفرصة و تهضري مع أشرف
أنا : العيد ميلاد ديالك .. ؟! ديال عماد ؛ البلايص اللي ممعروضاش فيهم منرضاش نمشي ليهم !
أمين : هاني عرضت عليك !!
أنا : لا خاص عماد يعرض عليا و لا منقدرش !!
أمين : فين چاريتي الطوموبيل ؟!
وريتو فين و قاليا نسبقو و نتسناه
شوية جا لعندي و معاه السميمر ديال عماد .. سلم عليا كيف دايرة أ ختي لباس ؟!
لباس الحمدالله ؛ المهم منطولش عليك ؛ شرفينا غذا الحفلة ديالي ؛ مرحبا بيك ويلا بغيتي تجيبي معاك شي حد خوذي راحتك ؛ ومكرهتش تجيبي معاك شي بوچوصة من هاذوك اللي كنتي باركة معاهم ؛ باش متحسيش راسك وحدك
أمين شاف فيا و قال : راه عارف كلشي ؛ كوني هانية
أنا : شكرا بزاف عماد 👍🏻 غاذي نحاول الى قدرت ! بسلامة
أمين مشى و رجع لعندي قاليا : غير ديري في بالك خطيبتو معروضة ! و ما باغي فضيحة ؛ راني عارفك عيشورية 😬
أنا : علاش بدلتي رأيك ؟!
أمين : مبدلتش رأيي و مغاذيش ندخل معاك في هاذ الشي ؛ عاونك باللي قدرت أ بنت الناس ! عطيني سميتك باش غدا يخليوك تدخلي
عطيتها ليه و قاليا : تلاحي دبا
ممشيتش للدار ؛ عيطت للبنات في التيليفون خرجو بغيتكم ضروري !
جاو لعندي بقينا واقفين ؛ حتى عاودت ليهم كلشي ..
البنات : ايوا دبا علاش عوالة ؟!
أنا : مستحيل نمشي بوحدي؛ كتعرفو شي بوقوص ؟! مچلضم و زوين ؟! من هاذوك اللي عاجبينهم راسهم ؟!
البنات : كشوفو في بعضياتهم ! لا حنا كنعرفو ؛ غير اللي الكونت بونكير عندو عامر و كرشو مدلية .. 😂
أنا : معلينا ؛ مجبتش معايا كساويا ؛ و معندي منلبس🤔
البنات : عينا فيك ديري ريجيم أ صحبتي ؛ كاملات كنلبسو قل منك ؛ الا لبغات شي وحدة ضحي بكسوتها ليك طرطقيها ليها 😆
أنا : زدتو فيه عندي غير شوية تاع لي أونش و الفخاظ ؛ المهم الكرش مكايناش 🤓
البنات : غيييييير شوية هاهاهاهاهاهاهاهاهاهاها
أنا : بلاش من هاذ المشية ..( وكنتدلل عليهم )☹
نسرين : كاينة واحد الخياطة كتكري الى بغيتي نوريها ليك ؛ وايني غذا سبت معرفت واش تلقاي
أنا : غذا ندوز عندك مع العشرة ديني عندها
نسرين : العشرة أ ختي مالنا في العسكر ؛ أنا عزيز عليا نخمر ..
الغذ ليه ؛ فقت بكري تحمحمت و مشيت لعند نسرين ؛ داتني عند واحد خايتي فيها بزاف ديال التبوزيق : أووووف ؛ هاذ الموديل صايبتو من تصميمي و ما زال حتى وحدة ملبساتو
و هذا حرير حقيقي و هذا منبث بالحجر و هذا قفطان كسوة و و و
أنا : ختي بغيت غير شي سامپل و كتلمع بلا متكون مشارجية و من الأحسن يكون كحل حمر ولا غوز
الخياطة : آجي نوريك وحدة تقدر تعجبك ؛ وايني خضرا
أنا : وريني ؟!
وااااااو فنة ؛ أخضر ملكي (إيمرود)
قلت ليها مكعجبنيش هاذ اللون ؛ و سامپل بزاف وانا راني عريضة من لتحت مغاذيش ندخل فيها ؟؟؟ بينت ليها معجباتنيش
الخياطة : لا راني غير مزيراها على المانكان ؛ تسناي نجبدها ليك تقيصيها ..
حمقاتني ؛ كسوة بالكمام طويلة ظهر شوية عريان وايني معليش شعري طويل ؛ فتحة للركبة ؛ منسدلة و ممزيراش بزاف و الاهم كلها كتلالي ؛ في الليل غاذي تبان روعة
وأنا كنشوف في الكسوة و أنا كنضعاف و أنا نرجع نشوف كنزيد نضعاف حتى لا طاي ديالي تقادات فيها 😁
جبداتها ليا مقيستهاش ؛ قلت ليها غاذي نكريها من عندك تاويت معاها خلصتها و مشيت نقلب على صندالة 🤔
دزت القيصارية ؛ چاع صنادل قيستهم ؛ الا عجبني الموديل اللون لا أو العكس ؛ وأنا مصرة على اللون الذهبي ؛ حالفة حتى نضوي في الحفلة
وأخيرا لقيتها ودزت شريت عدسات في القهوي غامق قريب لون ديالي ؛ غير باش يوساعو عينيا و حلقات ذوغي (پلاكيور) و هيد باند (سنسلة تحطيها على الراس أو الجبهة ) كلو حجر ؛ صايبت ضفاري و درت بوسة كبيييييرة ل نسرين اللي سخسختها معايا
و مشيت عند مرت خالي للصالون تصايب ليا شعري ..
كملت .. و أناكنقيس في الكسوة (تفاديا للصدمات ) ؛ تفكرت عبد العظيم؛ الصديق ديالي اللي كنت تلاقيتو بالصدفة في الپارك ؛ تكونكطيت على الفايسبوك وطلبت منو يجي معايا ! و بالفرحات عليه سهرة في أوتيل أڤانتي أكيد قبل !
و دبا عليا امتى يوصل الوقت يالاه تلاثة د العشية ! و مباغياش ناكل خفت كرشي تنفخ ليا !
ويلييييييييييييي ؛ نسيت مخذيت للولد كادو ؟! عيطت لأمين باش نعرف الذوق ديال صاحبو !!
نصحني ب ستيلو ؛ السيد مهووس بالپريستيج و ما يرضى يكتب غير بستيلو ماركة !
مشيت لواحد المكتبة حدانا ؛ ومن حسن الحظ لقيت عندهم ستيلويات من ماركت پاركر 👏🏼
المشكيل الأثمنة غالية بزاف و ستيلو اللي عجبني لقيت فيه تخفيض لانه آخر واحد بقى ليه .. عشرين ألف ريال ؛ بقيت معاه حتى خلاه ليا ب سطاشرالف ! هداني معاه ساسي ديال الكادويات أحمر ( كبر على الپاپيي كادو)
المهم .. كنتسنى امتى نوجد راسي ونتمكيج ..
بقيت كنلعب مع جاد بما وصل الوقت و. نمشي العرس ..
آه العرس ؛ الكذبة اللي قلت لدارنا 😁✌🏻️
وجدت راسي في صالون مرت خالي ؛درت فوق عيني باج يلمع و آي لاينر رقيق باش يندمج مع شفاري ويبانو وكحلت عويناتي؛ بلوش و شفايفي بالاحمر في لون ظفاري
غير وقفت و شافوني الكليانات ديالها ؟! ماشااااء الرحمن تبارك الله ..
بصح من نيتكم ؟؟ لي أونش ديالي ممعيقينش ؟!
السيدة ١ : لا والله اللي يشوف في وجهك ينسى يقلب على ديفوات اللي فيك
السيدة ٢ : بالعكس جاو مهاك فنيني و رجال كحماقو عليهم
السيدة ٣ : انا لو كنت ماماك منخليكش تخرجي هاكذا ؛ نخاف على بنتي من العين : قراي اية الكرسي و المعوذتين طلعو ليا المعناويات ديالي و الثقة في راسي كون زادو كلمة اخرى نتغر و نتكبر ..😍
ديماريت مشيت عند عبد العظيم ؛ باش نهزو من حدا دارهم ؛لابس قميجة بلو ماغين بلا چرافاطا و فوق منها ڤيستا چري محلولة مع دجيت سبرديلة بيضا واااااااااااو غزال اللبسة زادت عرضات ليه كتافو و جا عاطي العين😍 اليوم شي ناس غادي نطرطق ليها المرارة💃🏻💃🏻💃🏻
عبد العظيم : وااااااو فين كنتي مخبيا هاذ تبوچيصا ؟؟! 😍
أنا : في عويناتك الغزالين ؛ وأنت فين كنتي مخبي هاذ الكلاسنس ؟؟؟ 😍
عبد العظيم : مجبور ؛ عارفة شكون كمشي ل أڤانتي ؟! غير صحاب مامي و پاپي منبغيهمش يتشفاو فيا 😎
أنا : ومع ذلك كتموت علىيهم ؛ 😆 يالاه مشينا ..
وصلنا قدام الباب عيطت على أمين ؛ قاليا دخلي واخا يبان ليك كبير را حنا كاملين بينا شي ثلاثين واحد !
ماماتش .. وصلت تميت نازلة في دروج و شاد فيا عبدالعظيم و حيث عارفين البرچاچة كحنزو بدينا كنضحكو ؛ كلشي تلفت فينا .. حنا آخر وحدين جينا معطلين شوية !
وصلنا لتحت ؛ بقينا واقفين معرفنا منين نبداو لا شنو نديرو ؛ عبد العظيم بداو كبانو ليه ناس كعرفهم ؛ وكسمي ليا كل واحد ؛ وقاليا المحمدية صغيرة بزاف ؛ حفظ الله مكاينش الواليد هنا 😂😆
وأنا كنقلب السبة علاش نضحك واخا خايفة نشوفو مع وحدة زوينة بجهد كيف قاليا أمين

 

 

أنت لي 2

المهم الحفلة فيها ولاد و بنات أغلبهم لابسين قصير ؛ يعني قصيييييييير و زوينات ؛ هاذي الشوفة الأولى من تم ما بقيت هزيت عيني في شي حد ؛ غير في عبد العظيم ؛ منها من نتهرب باش ميتبدلش لون و جهي و منها نعطي عليا نظرة ” وااااثقة من راسي ” و قررت منشوفش و منقلبش على أشرف بعيني .. بالمرررررررة 🙄
جا أمين : أوووووو هاذي انتي ؟! سارا ؟؟؟ والله معرفتك 😍
وتلفت في عبد العظيم 🤔
أنا—> أمين : نقدم ليك ؛ الحبيب الأولي عبد العظيم ! و اللي بعد ما شافني بهاذ اللباس قرر يرجع يقنعني بيه (أمين دار ضحكة صفرا)
أنا —> عبد العظيم :(لقيتو كدير فيا شيييي شوفات استغراب 😳) نقدم ليك أمين : اللي حتى أنا مزال مكنعرفوش 😂😆
وكلنا ضحكنا ..
أمين : ها هو البيفي قدامكم ؛ متحشموش !
شنو تشربي سارا ؟! كاين كلشي ؛ شامپانيا صودا كوكتيل ريد بول ؟!
أنا مكرهتش شي كاس اتاي مشبشب 😆😆😆
أمين : ويلي حي ويلي حي ؛ تحضري شوية !
أنا : پينا كولادا (كوكتيل) عافاك
أمين : و انت الأخ ؟!
عبد العظيم : شمپانيا ! شكرا
جاب لينا المشروبات و جا !
أمين –> قوليا أ عبد العظيم : ولد المحمدية انت ؟!
عبد العظيم : آه ؛ الحرية بالضبط
أمين : متشرفين ؛ وجهك مغريبش عيا فين خدام الاخ ؟!
عبد العظيم : كوتش سپورتيڤ في لايدي فيتنس (سمية ديال لاصال ) وانت ؟؟
أمين : اه هادشي علاش تبارك الله شاد في راسك .. أنا تقني معلوميات و صداع الراس !
بلا بلا بلا
أمين : نمشي نعيط على عماد
عبد العظيم —> سارا علاش كتقلبي ؟! بين أمسية و ضحاها وليت الحبيب الأولي ؟؟ جديدة هاذي !!
أنا : ضحك زير سنانك الى بغيتي تهضر ؛ نفسر ليك من بعد ..
عبد العظيم : دبا أنا غاذي تبقاي لاصقة فيا السهرة كاملة ؟! خليني أ ختي ندبر على راسي ؟؟
أنا : نهضرو من بعد .. ها هوما جايين 😱
عماد : مرحبا خويا ، مرحبا ؛ بالپرانسيسة سارا ؛ اللي يشوفك يقول الحفلة تدارت على قبلك ؟! صراحة بجلابة كنتي كتباني متبلدنة ههههه
أنا : وانت الكوستيم جا عليك ؛ سيرڤيطات غير فرقهم عليك ؛ كتولي تبان فحال قاسم نهار الحد 😁😁😁
عماد : شكون هاذ قاسم ؟! 😳
أنا : مول الحانوت اللي في راس دربنا 😂😂😂
عماد: الله يمسخك ؛ شوقتيني نشوفو كيف داير ؟؟
عرفيني على الأخ .. ؟؟
أنا : عبد العظيم ؛ عماد
عماد ؛ عبد العظيم ! نخليكم تعرفو على بعضياتكم ؛ انا راجعة دقيقة
مشيت و جريت أمين ؛ قوليا انت ؟!
أشرف و خطيبتو جاو ؟!
أمين : وايلي زعمة مشفتيهمش ؟؟
أنا : لا ؛ مبغيتش
أمين : خليك مباغياش و متسولينيش ؛ حيث وراك قد قد
أنا : بصح ؟! شافني و هي عارفاني ؟!
أمين : ومازال كبحصصو فيك ؛ أشرف مني دخلتي و هو كمسح في وجهو .. وهي سولات عماد عليك ؛ و ما لقاتو غير من العاچزين ؛ قاليها هاذي طليقة أشرف 😁✋🏻أشرف كان غاذي يتيري فيه !
أنا : بصح؟!
أمين : صراحة حتى واحد فينا معندو معاها ؛ حدودية بزاف و كتهظر غي من لتحت ؛ وديما بابا بابا و بالخصوص عماد ..
أنا : طمنتيني الله يطمنك ! يعني نحسبك انت و عماد معايا؟!
أمين : آجي انتي ؛ شنو قصة الحبيب الاولي ؟!
أنا : ماشي من حقي يكون عندي حبيب ؛ دورها في راسك مزيان تفهمها .. آجي نرجعو عند الولاد !
عماد عبد العظيم و بنت اول مرة نشوفها ؛
عماد : نقدم ليك الكوزين ديالي فاطمة
متشرفين أ ختي ..
أنا سارا ؛ تتشرف بيك الجنة
فاطمة –>عماد كتوشوش ليه في وذنيه : شكون هاذي .. مسمعتش الرد ديالو😟
بقينا داويين بلا بلا بلا !
من بعد عماد قاليا ؛ نخليكم و الحفلة حفلتكم ! و مرحبا ب لالة سارا و سيدي عبد العظيم !
أنا : عماد عماد عطيتو الهدية ديالو ! كل عام و انت بالف خير ؛ طولت العمر الصحة و رزق ؛و وشوشت ليه في وذنيه تعيد و تعاود تعرض على مرت صحايبك المستقبلية🤓
عماد : شكراااا بزاف مرت خويا
أمين : حل خلينا نشوفو الكادو ؛ باش نشوف واش نعرض عليها لعيد ميلادي و لا لا ؟؟؟
عماد :ممكن سارا ؟!
أنا : خوذ راحتك ولا بين يديك !
حلو و فرح بزااااف ؛ أووووف ستيلو پاركر ؟! لاااا باش عرفتي ذوقي؟!
مجاملنيش بانت في عينيه !
عبد العظيم : متشكش في هاذي ؛ الى كان على الذوق ذواااقة ؛ هذاك شي علاش غلاضت 😂😂😂
وكلهم بداو يضحكو..

أمين قاليا في وذني ؛ قلت ليه حلو و ندمت خفتك تكوني شريتي ليه قلم رصاص هاش پي دو 😂😂 وايني بصراحة ؛ استغربت كتعرفي هاذ الماركة✌🏻️ وايني بيني و بينك تقبتي جيبك ؛ يعوضك الله 😆😆😆
عماد : شكرا بزاف ؛ نقدر نبصم ليك بالعشرة ؛ هذا أحسن كادو يكون جاني الليلة ! نرجع ليكم من بعد !
بقينا كندردشو و اللي ك شطح ك شطح و السي عبد العظيم بدا يسكر ! و فاطمة حدايا هي و امين !
الديدجي : لايديييز اند جانتل مان ؛ من دبا شويا نبداو كاراووكي ( الغناء ) ..
كلكم تاخذو كورة من فيها رقم ؛ رقم فيه مقطع من أغنية عربية مشهورة ؛ اللي أنا وحدي عارفها؛ عندكم صوت زوين ؛ لا بأس به و لا كسرونة المهم المشاركة✌🏻️ نبداو برقم أزرق ؛ (ولد) قربو عافاكم كاملين قربو للپوديوم ؛ الكلمات غاذيين يبانو ليكم على الشاشة .. ليتس چووووو👏🏼
من بعد بدا يعيط على الأرقام ؛
رقم 21 : ولد جات فيه أغنية : مغيارة ديال لطيفة رأفت ؛ وهو يقول في الميكرو ؛ الى وليت مغيارة غ الله يحفظ 😂 الموت ديال الضحك ..
رقم 3 ; تتقدم ؛ بنت –> أغنية : حسبني طماع = صوتها فيه بحة زوين !
دازو الأرقام : حتى وصلو للخطيبت أشرف = جات فيها : صافي ديال أسماء المنور ؛ منقدرش نقول ليكم واش صوتها زوين و لا لا ؛ كنكرهها واخا مدارت ليا والو ؛ وأنا راسمة ضحكة كبيرة و نسفق كنديطايي كل جزء منها؛ عل و عسى نفهم شنو اللي قنعو فيها 😔
جا دور عبد العظيم ؛ (كان سكران شويا) أغنية انت باغية واحد ؛ طلع باش يغني خذا المايك وتلفت لديدجي قاليه خويا نقدر ناخذ مايك آخر ؟؟ بغيت شي حد يعاوني فيها ؟!
مشى عماد عطاه ليه ؛ و هو يقول ليا ليوما نمسخرك قدامهم كاملين 😂✋🏻
فينك يا حبيبتي الأولية ؟!
أنا : دبا نشوفو ( هاذ الاغنية بالظبط دارت أونبييونس كبيرة في القاعة ) وقفت حداه هو يغني و يشوفيا و نا كندير في حركات و نهز كتافي 💃🏻 و جاوبتو ( البنات بداو يغوتو) و دراري هو هووووووووو و مازال شادة راسي من شوفش في أشرف !
هبطت حتى وصل الدور ديالي ؛ جات فيا أغنية بوس الواوا
😂😂😂
ملي كمل كلشي اللي أشرف مكانش بيناتهم 🤔
خذا عماد المايك و بعد ما شكرنا كاملين ؛ وقال:
قبل منمشيو نقطعو الچاطو ؛ بغيت سارا ؟! هزات بنت يديها : قاليها لا ماشي انتي ؛ سارا پاركر 😁 (نسبة لستيلو اللي جبت ليه)
هزيت يدي ؛ قاليا طلعي حدايا ! طلعت لعندو و مازال في ايديه المايك ! قاليا سمعت باللي كتغني التركية ؟ وبغيت غير مقطع صغير ؛ عيد ميلادي اليوم متقدرسش ترفضي !
وفي الوقيتة اللي كان كلشي كشجع فيا و يصفرو (أغلبهم دراري ) كتبت لعماد الأغنية في تلفونو ووشوت ليه في وذنية ؛ باش يحط غير الريتم بلا ترجمة !
وبدات الموسيقى : (توفانا توركاي: أرا ني أولورصون= عافاك اتصل)
كبوليت .. أونوتامادن 👇🏻
غير قبل مقدرتيش تنساني ..
بريميهيتش دولدورامادن 👇🏻
و لا قدرتي تعمر مكاني
چوروروندان أرايامادن 👇🏻
عزت نفسك مخلاتكش تتصل 👇🏻
أرا ني أولورصوووووووون
زمان چتشيرـــس چتسين 👇🏻
زمان الى بغى يمشي غير يمشي
هيپ إن چوزال يريمدسين 👇🏻
انت احلى بلاصة عندي
سن بنيم هيرشييم سن 👇🏻
دن ني أولورصون 👇🏻
عافاك اتصل …
دن ني أولورصون دن ني اولورصون !
كلشي اندمج معايا ؛كتف على كتف و بداو يميلو ..
وأنا فلتات ليا دمعة من عيني ..
كملت صفقو ليا ؛ حطيت المايك
شد في ايدي أمين نزلني ( حس باللي فيا البكية )
طلبت منو يوصل معاك عبد العظيم ؛ أنا غاذية !
قاليا ؛ نجي معاك ؟؟ قلت ليه لا بغيت نبقى بوحدي !
خليتهم في حلوتهم و مشيت .. أصلا حتى واحد ما حس بشي حاجة غير أمين !

خليت طوموبيل ؛و تمشيت حتى بلاصتي ؛ لا كورنيش (الأوتيل ؛ على البحر )
مخايفاش و ما هامنيش و تمنيت كون ما شفتهاش .. زوينة كيف قالو عليها ؛ حسدتها و مكرهتش نكون في بلاصتها !!
وحاجة فيا كتقول كايبغيني أنا و يموت عليا وايني ملي شفتها ؛ كلشي ليها زوين ؛ ضعيفة لا طاي عندها مقادة و قارية ؛ شنو فيها مايتحبش؟!
حتى أنا شفت بعيد ووهمت راسي .. وايني شوفتها رجعتني الواقع ..
وأنا كنتمشى ضايعة وسط كل أفكاري ،و تسا ؤلاتي
شوية ؛ نفس اليد شداتني ..نفس الريحة ضرباتني .. نفس الاحساس غمرني قبل منتلفت فيه ونهز فيه عيني ..
آه هو أشرف مكنتوهمش ؛ والله هو !
أشرف : باقة مبغاش تديري عقلك؟! خارجة في هاذ الليل بكسوة الكورنيش ؟! واش مخايفاش شي حد يتعدى عليك ؟! متفكريش غ فراسك فكري في ولدك و في.. حبس و مكملش
بغى يقول فيا 😍
هو كغوت و انا كنشوف في حروفو و زين ديالو و لباسو الكلاس اللي خلاه في عيني أجمل واحد ..
أشرف : والميكي ديالك ماهاموش ؛ كيشطح ليه معا راسو 😡 يالاه زيدي نوصلك هزي خرشاشتك و دخلي لداركم !
أنا : سمح ليا الاخ ؟! شكون انت؟! طلق من إيدي و نثرتها
نفس اللقطة تعاودات ؛ كأن القدر كعطيني فرصة نرجع نكتب قصة عشقي من جديد 🙏🏻🙏🏻🙏🏻
أشرف : أنا أنا .. ملقى ما يقول !
أنا : شفتي ؟! مكتعرفنيش ؟! .. راني شبهت ليك لشي وحدة 🙄 بعد مني
أشرف : قلت ليك غاذي تزيدي دخلي لداركم
شدني من يدي و كجر فيا .. خفت نتعكل بالطالون و بقيت تابعاه

و أنا كنتمشى بجران و كن نچرز عليه : أنا حرة و ندير اللي بغيت و عارفة مصلاحتي إنت ماشي سوقك فيا ..
أشرف : آه مصلحتك مع الڤاندام اللي ما عارفك حتى فين كاينة ..
أنا : علاش ؛ عظم الطيو اللي كنتي معاها ؛ عارفة فينك دبا ؟!
أشرف : وقفني وقاليا ؛ ياك سمحتي فيا ؛ علاش رجعتي علااااااااااااااااااااااش ؟؟؟؟ باغياني ليك وقت ما بغيتي و في نفس الوقت ما باغياش تكوني ليا ؟! باغية تفلاي ومعامن تدوزي الڤاكونص ديالك بينما رجعتي ؟!!!
أنا : رجعت ؛ حيت تخنقت بلا بيك و مقدرتش نكمل حياتي كأن شيئا لم يكن ؛ مدرتش كنبغييييييييييييييك !
أشرف : كتبغيني قالت .. 😆👉🏻 طلق ايدي و بدا كزرب في المشية ..
أنا : سمحت في فرنسا و في الوراق 🖕🏻🖕🏻🖕🏻
رجعت ليك انت ؛ و أنا مفكرة أن هاذ المستقبل ميستاهلش نضيع على قبلو واحد بغاني في الحلال و احتارمني و سكني قلبو ؛وعشت معاه أجمل لحظات حياتي ؛ مكنتش كنتصور هذا دور لعبتيه بإتقان باش “يمكن ” توصل شي نهار لفراشي ؛ ؟؟؟
طلع الميستر عندو حب على الفصول الاربعة = في الصيف حب وفي الشتا حب جديد ؛ تبارك الله كلشي عندك منظم 👍🏻
أشرف : فراشك ؟! جديدة هاذي ؟؟ نفكرك انتي اللي قلبك حجر ؛ عطاتك خاطرك تطلعي للطيارة و طويتي صفحتي ؟! وعلاش ؟! على قبل زوج ورقات ؟! سمحتي فيا و طلعت للطيارة و مهامكش ف آش من حالة خليتيني ؟!
أنا : حتى أنا مكنتش فرحانة و مهنية ؛ حاولت نتاصل بيك الف مرة ؛ تليفونك كان ديما طافي !
أشرف : وايني أمين عرفتي تواصلي معاه ؟!لااااا و عندك نمرتو وكتلاقاو و تعرضو على بعضياتكم ووووو واش كتميزي على زوج نوامر ؟! اللي تشد ليك الاول ؟؟
أنا : الديفو ديالك متسرع .. مكتعطيش الفرصة نفسر ليك ..
و في نفس اللحظة خرجات خطيبتو قدام الاوتيل ؛ كانت كتقلب عليه ! وتمات جاية عندنا !
أشرف : بون كونتينياسيو !
خطيبتو : أشرف ؟! شنو كتدير مع فحال هاذ الانواع؟!
أنا : دورت وجهي و ضحكت ضحكة صفرة ! و مجاوبتهاش
أشرف –>خطيبتو : سيري دخلي أنا جاي !
خطيبتو : لا رجلي على رجليك 😡 عماد كتسنانا بغا يقطع الحلوة !!
أشرف : قلت ليك سيري أنا جاي !
خطيبتو : كتجري عليا و علا قبل هاذ الفصالة ؟! وتمات غاذية
أنا : متنسايش تقولي لعماد يعطيك حقي من الحلوة ؛ عل و عسى ليلة الدخلة يلقى فين يشد 😡😡
أشرف : 😳😳😳
رجعات و قالت ليا : المهم ياك أنا اللي غاذي يدخل علياأشرف 🤓
أنا : و شكون قاليك قصدت أشرف ؟! 😉😁😂 وقلت في خاطري (سلعة البون أوكازيو) 🙄
خطيبتو –> أشرف : متعطلش أ الحبيب ديالي ومشات
متعطلش أ الحبيب ديالي ..نانانانانا وكنعيب فيها 😏
أشرف : كبري عقلك ..سارا 😉
فيساع بغيتي وحدة و فيساع خطبتيها ؟! الواحد كتديپريما ك حزن كغضب كزعف كنتحر ..
أشرف : دبا بغيتي تقلبيها عليا؟!!!
خليني نكمل هضرتي .. ✋🏻
وليت كيف المذلولة معاك ؛ سمحت في كلشي و جيتك ؛ وتبعتك من بلاصة لبلاصة على الله تعطيني فرصة نفسر ليك ☹ وانت مهامكش كنتعذب مهامكش شنو كنحس و لا حتى حاجة ؛ أناني ! أي واحد فينا كغلط و أي واحد فينا عندو الحق في فرصة ثانية .. دبا جاوبني على سؤال واحد : كتبغيها؟!!
خرج عينيه فيا وقاليا :آه و باغي نكمل معاها حياتي ..
أنا : فهمت .. منبقاش نوريك وجهي ! الله يكمل
أشرف : سارا تسناي
مشيت نجري طلعت في طموبيلتي و بقيت غير سايچة درت المحمدية درب درب مخليت فين مشيت ؛ ودموعي مبغاوش يوقفو .. دخلت للدار مع ستة ديال صباح طليت على ولدي تخشيت حداه و نعست !!
دازت سيمانة ..دوزتها كاملة سادة عليا في الدار ..
شعلت تليفون أنا : المساجات بداو كوصلو: لبنى نسرين حنان .. صحاباتي كاملات : سارا واش رجعتي لفرنسا بلا متسلمي علينا ؟! ملي تشوفي الميساج هنا و لا في الفايسبوك عيطي علينا .. كل و طريقتها وايني المضمون واحد !
عبد العظيم : ١ مالكي أ ختي طرتي و خليتيني بوحدي ؟!
٢ : قلقتك في شي حاجة ؟!
أمين : سارا اتصلي بيا عفاك ضروري ..
رقم مجهول : لقد توصلتم ب 64 مكالمة من هذا الرقم ؛ دون أن يترك رسالة ..
ومن وراها بنفس الرقم :الرسالة ١: عافاك اتصل ؟! اتصلت وايني حتى واحد مكاين اللي يستقبل اتصالي ؟؟؟
٢:عيطي ليا ملي تشوفي مساجاتي ؛ عافاك سارا .. أشرف

كيفاش أشرف ؟! كنعيط ليه : إن رصيدكم غير كاف لإجراء هذه المكالمة المرجو ..
أووووف كملات ليا روشارج ..مشيت نجري شارجيت تليفون ؛ و كأنها جات في وقتها هاد تعطيلة اللي رجعات ليا عقلي لبلاصتو !
كيفاش ؟! مخليت شنو درت عليه و فين دورت عليه و تبعتو من بلاصة بلاصة باش في الآخر نسمع منو شنو اللي مكنتش كنتوقعو؟! كبغيها و دبا لاش جايني ؟؟ لاش ؟! باش يدوز بيا وقتو ولا حيث محسش معاها شنو حس معايا؟!
تليفوني غاذي يبقى شاعل و مغاذيش نجاوبو ; خليه يحس باش حسيت و يذوق من الكاس اللي شربت منو 😤
دخلت للدار .. و التليفون مسكتش ؛ درتو ؛ سايلنت و خليتو يطنطن على خاطرو ..
رجعت هزيتو .. و عيطت لأمين قلت ليه نتلاقاك الى كنتي مسالي .. وبالفعل تلاقينا !
أمين : شنو هاذ الحالة ؟! مال وجهك ؟! مكتنعسيش؟!
أنا : ومنين شفت نعاس ..خلي هذاك جمل راقد ..
أمين : المهم مزيان ملي عيطتي ليا ؛ بغيت نقوليك باللي جا عندي أشرف للدار دبا خمس يام ؛ و بغا يعرف كلشي من أ حتى ل زيد ! و قلت ليه و طلبني نعيط ليك و و ووو .. ودبا راه لداخل في القهوة ..
أنا : جيت نرتاح و نفضفض معاك ماشي نكيل الهم 😡
أمين : انتي ملي جيتي عندي و طلبتيني درت معاك هاكدا و من مصلحتكم تهضرو و تخويو اللي في قلبكم ..
أنا : نضت مشيت كنجري ..
أشرف تبعني ووقفني .. وأنا دموعي خيط من عينيا !!
أشرف :سامحيني 🙏🏻 غلطت زربت و حكمت عليك ..
أنا : هاذ الشي اللي نستاهل منك ؟!! رخيصة عندك حتى لهاذ الدرجة ؟؟
أشرف :سمعيني .. ( جرني عندو و عنقتنيييي و أنا كنتنخصص 😭😭😭 )
وقاليا : هزي عينيك فيا 😪و سجلي شنو غاذي نقول ليك حرف حرف ..
كيفاش الهبيلة قدرتي تشكي في حبي ليك ؟!وقدرتي ثيقي باللي بغيت عليك ؟! انتي عمري و حياتي كلها ؛ محاولتش نبدلك و لا نقلب على فحالك ؟! حاولت غ ندير فحال الى مكان والو و نكمل حياتي عادي ..باش حتى واحد ما يشمت فيا ؛ ويقولي سارا سمحات فيك على قبل الوراق .. كنتي انتي وحدك اللي على لساني ؛ وكانو كقولو ليا جات لي جمعات ليك الفايت و جديد و كنقول ليهم اه وًمن بعد .. من نهار مشيتي الدنيا ظلامت عليا ! كذبت كذبة على راسي و بغيت نصدقها ومقدرتش 🤒 مقدرتش ننساك ! انتي مرضي و انتي دوايا صراحة أنا اللي كنت شاك فيك و قلت مكتبغينيش بالقدر اللي كنبغيها بيه ؛ ودبا عطيتيني الدليل اللي كان ناقصني .. وحطيت راسي في بلاصتك و فهمت باللي ماشي أنانية منك ؛ وايني حس الأمومة ديالك هو اللي حكم فيك و فضلتي جاد على راسك و عليا ؛ وعندك كل الحق ؛ أنا نواعدك قدام اللي خلقني و خلقك عمري نفرط فيك ؛ مهما تكون الظروف ! غاذي تقولي ليا هاذ الكلمة فايت سمعتيها من طليقك و موفاش بيها ؛ هو الى تزوج بيك حيث صغر منو ؛ و حيث شاف فيك زينك و ما أي حاجة ناقصاه ف أنا هاذ شي كامل مهامنيش ؛ أنا لحد لآن معارفش شنو اللي خلاني نبغيك و نموت فيك هاكدا ..
أنا : اللي كنت بغيت نقولو ليك قلتيه .. اللي نقدر نزيد على هاذ الهضرة هو :
—>👈🏻 أنت ليا و ديالي 👉🏻😻😻😻
أشرف : كنبغييييييك كنحمااااااق علييييك و انتي اللي ليا و انتي اللي ديالييييي انتي و جاد !
أنا : عندك كلينيكس ؛ نمسح وجهي 🤗
أشرف : قولي باش تمسخي خنونتك اللي نصها مسحتيه ليا في تريكو !
أنا : سررررك ؛ 😄😄😄 دبا عطيني !
أشرف : كاين في الطوموبيل ؛ يالاه ؛ وايني هاذ تريكو غاذي تصبنيه انتي كحل و خنونة و دموع !
أنا ؛ نصلو عطيني نديرو لك في كادر و علقو في بيتك ؛ باش عمرك تعاود 😂✋🏻
أشرف : توحشتك ..
وأنا كثر ..
دخلي جيبي جاد نمشيو لكازا نديه يلعب .. مكرهتش نشوفو
أنا : واخا يالاه .. وصلني لطوموبيلتي ..مشينا يد في اليد ؛ وًملي وصلنا للطوموبيل مقدرناش نتفارقو .. قلنا نمشيو لا فاليز يضربنا البرد !
مشيناو في طريق .. بغيت نعرف شنو طرا مع عظم الطيو ديالك..
أشرف : حتى تقولي ليا انتي ؛ هاذاك ڤاندام اللي كنتي معاه شكون و شنو طرا معاه؟!
أنا : لا انت اللي تجاوب الاول ..
أشرف : بدينا الحكام من دبا ؛ واخا أ لالة ؛ جاتك ؛ هاذيك البنت تعرفت عليها شحال هاذي و بقينا على تواصل ؛ و ديما كتبين ليا باللي معجبة بيا خرجت معاها و ملي شافت صاحب بابا ضحوكي و لباس عليه ؛ خذات ليا نمرة من تيليفون و اتصلت بيه ؛ و يعلم الله ؛ هو عيط و قالها ليا ؛ هو بو عيالات و ايني ميقربش جيهت حبابو ؛ و من تماك عرفت باللي بنت ما فحالهاش و دارهم مساكن ناس دراوش وهي وصولية .. وخارجة ليهم من جنب !
أنا : قاليا أمين باللي ..
أشرف : لا هاذيك خالتها مزوجة بواحد لباس عليه و كتكذب على كلشي تقوليهم بابا !
أنا : اللي ما فيه خير لأصلو عمرو يكون فيه الخير .. اييه و انت علاش خطبتيها؟!
أشرف : ماشي بصح .. غير ملي سولوني قلت ليهم خطيبتي باش متكترش الهضرة راك عارفة ..
أنا : أ الحبيبة ديالي نانانانا و كتبعكك ؛ حول صحابك متصرطاتش ليهم !!
أشرف : ايه و انتي ؟! شكون هذاك ..
أنا : عبد العظيم كان كقرا مع بنت خالتي و مفاوج معايا في الليسي ؛ كان حشومي و كان كعجبني.. كانو البنات كحماقو عليه ؛ و ملي كان كجي يسولني على بنت خالتي هاجر كنت كنحشم و نتزنچ 🤗👉🏻 و بقات بيناتنا السلام السلام ؛ وملي طلقت درت فايسبوك و ناس توصلك لناس ؛ ومن نهارها وانا وياه كنهضرو كأصدقاء ؛ و ملي عرفتك غاذي تكون مع عظم الطيو قلت حتى انا منجيش بيديا خاويين 😁✌🏻️
أشرف : امممممم كأصدقاء .. 🤔
أنا : ماشي أنا اللي خطبتو ؟؟😒
أشرف : بدينا ..
أنا : سالينا ..
( و دوزنا العشية كاملة تناچير كيف مالفين )
دخلت للدار هزيت جاد و مشينا لماكدونالدز و من بعد للپارك
دوزنا ليلة غزالة .. 😍😍😍
الغذ ليه عيط ليا و قاليا باللي هضر مع ماماه و باباه باش يجيو يطلبو ايدي من عند خالي .. و قاليا نعطيه نمرة تيليفون يتصل بيه باش يحددو نهار ! عطيتها ليه و مشيت نجريييييي نعاود لمرت خالي كلشي ..
جدة مكانتش موافقة وخايفة عليا بزاف لنرتكب غلطت عمري .. وايني هضرت معاها و اقنعتها .. و تمنات ليا السعادة و الخير ؛ أنا : مواااااااح و (عنقتها)انت اطيب جدة بالعالم ؛ وخا منساهاش ليك ؛ كني كتدعي عليا و انا صغيرة ..
جدة : أنا ؟!
أنا : لا أنا ..
جدة : انتي بنتي اللي مولدتهاش و ندعي عليك أ الهبيلة ؟! (كتقول ليا الهبيلة فحال أشرف ؛ عرفت باللي الناس اللي كبغيوني بزااااف كتطلع معاهم غ هاذ الكلمة )
أنا : عقلتي ؛ ياك ديما كنتي كتقولي ليا : سارااااااااا و كنجاوبك : نعاااااام و كتقولي ليا يعطيك ضرعام ؟! كتدعي ليا بالجنة مثلا ؟!! راه ضر يضر ضراااا
جدة : ندعي عليك في الوقت اللي نكون معصبة و نوض وراها ملي نصلي صباح و ليل ندعي معاك أ بنتي يا ضو عينيا !
أنا : يالاه هاذ الدعوة هي اللي غاذي تخيط ليك قفطان تحضري بيه الخطوبتي ؛ نوضي معايا نمشيو ياخذ عليك العبار
جدة : وراهم عندي كركور كاين اللي عمري لبستو
أنا : لا بغيتك تلبسي بحالي ..
جدة : خلي ماماك تلبس فحالك أنا كبرت على هذاك الشي ..
أنا : انتي ماما واش بغيتيني نغووووووووت باش تسمعيها ؟!
عنقتنييييييي و قالت ليا الله يهديك
داز شهر .. دخلنا للسنة للجديدة لبداية جديدة .. اليوم ديالي أنا و أشرف ! اليوم يتربط مصيري بمصيرو ؛ اليوم هو نهار اللي غاذي نقطع فيهم صفحات الماضي السوداء ؛ اللي شريت فيه دفتر جديد ومن هاذ اليوم قررت نبدى فيه القدر “خيره” ..
وصلو للدار .. دخلو و ضايفناهم كنا بينا غير عائلتي و عائلتو المقربين ..
هذا أشرف ؛ حبيبي و ظلي .. ونفسي اللي كان مقطوع أجمل رجل شافتو عينيا وماتو في عيني چاع رجال ؛ وأكيد أنا عميت ليه عينيه على أي وحدة زوينة ! اكتفيت بيه و اكتفى بيا ؛ اختارني و قبلتو
عائلاتنا كهضرو وحتى هو معاهم ؛ غير أنا اللي ساكتة و عيني مفارقاتوش ؛ كنقلب على كلمة جوتيم ؛ نشقمها ليه من فمو و لا نجبدها ليه من عينيه ..
شفت فيه الرجل الرجل ؛ الواعي و الجدي و الاجتماعي .. و حتى هو شاف فيا البنت البريئة الخجولة .. عائلتي كاملين فرحانين بيه ؛ و عائلتو كاملين فرحانين بيا و غير توافقو بيناتهم هز ايدو لسما و بدا يقول في دعاء 🙏🏻
لبسنا الخواتم اللي أنا ختاريتهم .. ديالي محفور فيه اسمو و ديالي فيه اسمي لبسو ليا و لبست ليه و بداو زغاريت و الحلوة تدور من يد ليد ..
بعدها جات البنت اللي تحني ليا و زغاريت مسكتوش في الدار .. كلشي فرحان ليا فرحة متفرحاتش من قبل ليتيمة الحيين ..
قررنا نتزوجو و نديرو العرس في يونيو .. شهر ستة ! و خاصنا نبداو نوجدو للعرس من دبا ؛ بقا ليه خمس اشهر ؛ خمس شهر يكتمل الحلم ديالنا و نتجمعو و نكونو واحد 🙏🏻 بإذن الله !
أشرف : سارا .. أحبكي و كل عام و أنتي حبيبتي😍😍
و هو داخل لدارهم ..
أنا : أشرف أشرف ..أنت لي .. 😘😘

 

الجزء الثالث ~ هزمتني يا قدري

الأرض ما هازانيش بكثرة الفرحة .. اليوم غاذي نشوف حبيبي اللي سيمانة مشفتو !!
عيطت لأشرف
أنا : حبيبو فين وصلتي ؟! واش قربتي ؟!

أشرف : غير نوصل ان شاء الله للمحمدية .. نجي عندك انتي اللولى راه حتى أنا توحششششششتك
ونزيدك مشيت لأكادير على قبل الخدمة بالحق كنت نقدر نرسل شي حد في بلاصتي وايني بغيت نوقف شخصيا على الهدية اللي جايب ليك معايا ؛ هي مية في المية صنع أكاديري وًمليون في المية تصميم حبيبك وهذا على قبلك !
و جاد و جداك حتى هوما مانييتهمش .. نشريهم باش ديما يعاونوني عليك ..قولي ليا دبا ؛انا شنو نستاهل يالاه ؟!

أنا : تستاهل غير توصل ننزل فيك ضرب بالبوس موااح مواااااح هاكدا هاكدا .. و تعنييييقة طويلة و نرجع نسلخك مواح مواح مواح حتى تخنق مني ؟! و نشكيك للقاضي بتهمة التحرش المعنوي و الجنسي بما لا ينص عليه ضهير المخطوبين .. و نطلب منو تكتب ليا قلبك في سميتي.. شنو رأيك !

أشرف : يرى سيدي القاضي العقوبة المطلوبة من المدعية على المدعى عليه مناسبة للجاني لما ارتكبه من جرائم متعددة بحق حبيبتة و زوجته المستقبلية الأبدية وذلك طبقا للمادة 20 لقانون الخطوبة رقم 01 لسنة 2015 وعلاوة على ذلك لها كل الحق في حجز عقله استملاك قلبه و تكثير نسله و ذلك لمدة لا منتهية أبدية ؛ و المدعى عليه الذي هو أنا موافق على ما تم الحكم به من طرف سيدي القاضي جاد !
أنا : رفعت الجلسة .. !
أشرف : وغلقت السماعة ..تيت تيت
الكلاكصون ديال الطوموبيل ..
وصل وصل وصل العمر ديالي .. هبطت كنجري من الدار نقزت ثلاثةدرجات بثلاثة ! تلاحيت عليه عنقتو ..
وقال ليا في وذني .. الاوكسيجين ديالي ؛ نزل ضغطي و ضاق نفسي كون تعطلت ثانية اخرى كنت ندخل في غيبوبة ؛ و انتي سبابي !
أنا : كون تعطلتي جزء من الثانية و حدا آخر .. تلقاني انتاحرت بدانون مسوس و پيريمي اها ! و ندخل للغيبوبة نتلاقى معاك !
أشرف : امتى نبداو الضرب و السلخ العمد ؟!
أنا : عيييييب عيييييب الدار عامرة !!
أشرف : بلا متفاولبيني .. وتنفذي فيا الحكم باطل !
جدة : على سلامتك أ ولدي طلع ؛ هذيك الهبيلة ما تفرق بين المسافر من اللي هداتو طريق ؛ طلع أ ولدي ارتاح ..
أنا وشىوشت :هو سافر و انا اللي تهديت ..
أشرف : واييه الميمة شاهدة عليها ياك ؛ غير وصلت قالت ليا يالاه خرجني ..
أنا : ياك الكذاب ..
أشرف : الحكم الحكم .. ولا اليوم نشريها ليك معاهم كاملين
أنا : تسنى حتى ننفرد بيك و تشوف بلاتي
طلعي وجدي لحبيبك شي كاس ديال أتاي ب فليو .. أنا نهز الكادويات و جاي ..
أنا : كلشي واجد غير متعطلش ..
أشرف : أوامرك سيدتي ..
جا أشرف و في إديه ؛ طوموبيل إلكترونية كبيرة
هاذي باينة لجاد أنا منتخشاش فيها و خا مكرهتش
و في إيديه الثانية هاز ساشي ..
جاد غير شافو تلاح عليه .. طونطو طونطو
وبقى معاه في المرح كيلعب معاه حتى حطينا الطابلة ؛
غير دخلنا لصالون نشربو اتاي ؛بقى كهضر مع جدة على أكادير و جو أكادير ؛ شوية حل الساشي و جبد منو تسابيح فضة و بواطة ديال الفضة و سطها قرآن
أنا : لاااا انت ماشي غير عروبي ؛ عروبي و ذواااق ؛ هاذي ما فيهاش شك ..
أشرف وشوش ليا ؛ الدليل بغيتك..انتي تعرفي فين تبلاصي نيتك .. كتبقاي آخر اختياراتي
أنا : طبعا ذوااااق
جدة : علاش أولدي ؛ عذبتي راسك
أنا : إلى مبغيتيهش ناخذو أنا ؛ راني ناوية نسلم ✋
جدة : علاش انتي شنو هي ديانتك ؟!
أنا : أنا والله معرفت ؛ ديما كتعيطي ليا ليهودية
جدة : ياك ؟!
أشرف : متديش عليها ؛ را غارت منك ..
وبدينا كنضحكو ..
أنا : أييه و الكادو ديالي اللي مشيتي على قبلو ؟! أشرف : طلعت حطيتو في بيتك .. و وشوش ليا حتى تخلصي ضريبة
أنا : غاذي نطلع نشوفو ..
أشرف : بلا متعذبي راسك ؛ سورت االبيت و معايا الساروت
أنا : يالاه شرب شرب أتاي بالزربة ..
جدة : كوني تحشمي خلي الولد يرتاح ..
أنا : ولا نقول ليك .. الصينية مغاذيش تطير ؛ أتاي إلى برد نسخنوه .. أنا إلى بديت نول ول مغاديش نسكت ؛ ختار ؟!
أشرف : نسخنو أتاي طبعا
جريتو من يدو و طلعنا لبيتي ..
يالاه حل .. فيساع !
أشرف : باقي نستاهل الضرب و الجرح ؟!
أنا : على حساب الكادو كيف داير ..
حل البيت و غمض ليا عيني .. وقال ليا في وذني :
بغيتك تعرفي أن كل حرف منحوث فيها جاي من قلبي و الله شاهد ..
حليت عيني ؛ لقيت قدامي مرايا على شكل نافذة كلها فضة ومدورة الحجر كيلمع .. واااااو قربت و حليتها! الفدريش الليمن منحوث فيه :

” قولي لها يا مرآاااة : أنها أجمل امرأة رأتها عيناي
وعشقي لها كل يوم يزيد ”

الفدريش الليسر :

ذكريها يا مرآاااة : “حتى لو ركعن أمامي كل نساء العالم
فلن أكون لغيرها حبيب ”

وتحتهم منهم قلب صغير فيه: من أشرف لزوجته سارا

عيني غرغرو بدموع و أنا كنشوف فيه منها و هو معنقني ورايا ..
قاليا : متقولي والو .. لمعة عينيك كافياني ..
ضحكة و بكية تخلطت و قلت ليه كنبغييييك ونزلت عليه بالضرب مواح مواح
متسناوش مني نقول ليكم التفاصيل .. عيب عيب
دازت ثلاث أيام ..مشينا نحجزو القاعة في كازا ؛ في طريقناا وحنا راجعين ..
أشرف :عذا ان شاء الله نكشي نشوف الحجز ديال السفر ؛ أنا : دوز عندي نمشي معاك نعطيهم شي تفاصيل ..
أشرف : لاااا مبغيتكش تعرفي فين غاذين نمشيو ..
أنا : هنييية ..
أشرف : هاذي هي شكرااا حبيبي ؟!!
أنا : قوليا ؛؟ شحال كنتي كتجيب في الاجتماعيات ؟!
أشرف : يا عباد الله شهدو ؛. كنهضر ليها على الرومانسية و الحب و العشق و هي كتدور بيا فيا الليسي ؟؟!
أنا : ما قلتي عيب وايني حتى أنا غير بغيت نتأكد غاذي تختلر شي بلاصة زوينة من النقطة اللي كنتي كتجيب في الجغرافيا بالضبط
أشرف : سيدة جابت جوج شمعات ديال الپيل و طبسيل بسطيلة وبركاتنا على كراسي مالين شيشة و لات تشوف راسها ملكة الرومانسية ✋
أنا : دبا نشوفو مول الپيل فين غاذي يخرجنا ✌️
أشرف : سارا نعلمك ؛ بغيت ثلاثة د البنات و زوج ولاد ؛ وهذا غير قابل للجدال ؟!
أنا : خمسة ؟! قنية أنا ! زوج منفوتش زوج ؟!
أشرف : اللي يسمعك يقول انتي اللي غاذي تولديهم بوحدك ؟! راني أنا غادي نولدهم حياتي كاملة ؟!
أنا : لا والله جات معاك تهضر .. مشات بشرط كل مرة تدخل معايا نولد ؟! ونشوفو واش غاذي تقدر تعاود ؟!
أشرف : واخا ؛ مشات .. انتي ولدي وربي و أنا نسمي ونوكل
أنا : كلشي الا الأسامي .. أنا نسمي !
أشرف : لا أنا
أنا : نديرو حل ؛ النص بالنص !
أشرف : ثلاثة ثلاثة
أنا : من خمسة و لينا في ستة ؟!
أشرف : سميتي جاد زيدي جوج سميات باراكا
أنا : أنا نسمي البنات و أنت الولاد ؛ يعني جوج
أشرف : لا أنا نسمي البنات و انتي الولاد ..
أنا: اهاااااه باش چاااااع بناتي تعطيهم سميات صحايباتك القدام ؟! أوهووووو ثم أوهووووو ! تسنت ؟!
أشرف : واخا نسمي دراري أنا !
أنا : شنو غاذي تسميهم ؟!
أشرف : الولد الأول على سميت جدي المعطي .. و الثاني المهيدي على سميت بابا بالتدليع
أنا : أييه و نزيدك بنت من الچروپ ديالي فابور غ سميها التايكة ورجعنا و جع التراب
أشرف : غ كنضحك غاذي نعطيهم زوج سميات فحال أمير جاد !
الولد الأول : ليث إيليان
والثاني ..اممم من هنا لتم نكون لقيتو
أنا : أوووووووووو موافقة ! ليث إيليان ؛ صراحة من بعد الكادويات ى هاذ سمية ؛ بديت كنقتنع بالأوريجينالتي ديالك
أشرف : وانتي شنو تسمي البنات ؟!
أنا : الأولى يارا و لاخرين مازال مفكرتش
أشرف : زوينة
أنا : غاذي نتوحشك حبيبو ؛متنساش بعد غذا طيارتي ؛
أشرف : لا ماناسيش غير انتي متعطليش ؛ عافاك
أنا : حتى أنا عليا امتى نمشي ؛ نجيب وراقي و حوايجي و نجي .. نبقى في وجه حبيبي صباح عشيا نكدها عليه
أشرف : دعوة الله واش حنا داخلين على زواج و لا على الرابح الأكبر ؟! خاصك تقولي نجي حدا حبيبي نبقى مقابلاه واخا منشبعش شوفة منو .. باينة عليك كنتي عيانة في التعبيري
أنا : يا ربي تخليك ديما ضاحك كنموت عليك
أشرف : أنا كنحيى بيك
غير وصلنا للمحمدية ؛ وصلني للدار و قاليا سيري جيبي المرايا بينما سلمت على الميمة ؛غاذي ناخذك شي بلاصة ..
أنا : المرايا ؟!!! لااا الكادو مكترجعش .. ديالي أنا وعلى قبلي تدارت ..
أشرف : الله يهديك شكون قاليك رجعيها .. غير سيري جيبيها وًصبري حتى تفهمي ..
أنا ؛ أوامرك باشا ؛ وايني متبقاش تلكلك بزاف ؛ دير صواب ويالاه ..
خرجنا و حنا في طريق ..
أنا : يالاه قوليا فين غاذين ؟!
أشرف : بلا متحاولي .. الصبر ثم الصبر !
أنا : اممممم عطيني غير تلميح ! ما نجي فين نوصلو حتى نكون طرطقت بالفضول ..
شوية ..
أشرف : ها حنا وصلنا .. وصلنا باش تحطي المرايا في بلاصتها ..
أنا : لااااااا ؟!!! دارنا ؟! أشرررررررف
أشرف : دارنا و فيها نكبرو وليداتنا ان شاء الله
أشرف هز المرايا و أنا خرجت بلهفة من الطوموبيل ؛ دخلت لداري إحساس رائع مع إنسان أكثر من رائع ..
الابتسامة مفارقاتش وجهي و حتى أشرف ؛ عينيه كلهم فخر و كلمعو كيف أول مرة شفتو
الديكور غزااااااال واخا خاصو شوية حجر و تلميع “عزيز عليا الضواو ”
هاذي دارنا و هاذي الخلوة ؛ فيها غاذي نتقاسمو المرة و الحلوة .. هز ايدو للسما وقال يا رب يا رب تجمع بيناتنا في الخير و ترزقنا الذرية الصالحة يا رب ..
عرفتي أ سارا ؛ نهار تولدي ليا نهار غاذي تحطي تاج الاميرة و تلبسي ديال ملكة .. ملكتي
أنا : أنت سلطاني …قوليا ؟!علاش كتبغيني لهاذ الدرجة ؟!
أشرف : سولت قلبي شحال من مرة و معرفش يجاوبني .. نهار يلقى الجواب نهار غاذي يكون مبقاش يبغيك ..
أنا : لا لا مبغيتش نعرف و متبقاش تسولو صافي .. ✋
أشرف : الهبيلة ديالي ؛ هاكي المرايا علقيها في بلاصتها !
أنا : نعلقها في بيتنا و لا في الحمام ؟!
أشرف : أنا عليا علقيها في الخرجة ديال الباب ؛ باش تكون آخر حاجة شفتي وانتي خارجة من الدار و تبقا لاصقة ليك بين عينيك .. و بالمرة متزاحمينيش في الحمام ملي تكوني باغية تقادي راسك
أنا : آه فكرة مزيانة .. واخا الفكرة الثانية هي اللي قنعتني أكثر
أشرف : واخة يا أم أمير جاد و ليث إيليان
هذا حبيبي .. كل يوم كنزيد نشوف فيه جانب رائع واحد ينسيني في الآخر ؟! شنو درت باش نستاهلو ؟!
الغذ ليه وصلني للمطار وتفارقنا بدموع ..
وصلت لداري في فرنسا .. أول حاجة درت عيطت لحبيبي ..
أنا : سِني تشوك أوزلِديم
أشرف : فهمت حتى الدارجة ديالك بقى ليا غير التركية ؟؟!
أنا : توحشتك بزاااااااف
أشرف : حتى أنا أ عمارت قلبي
أنا : فكرتيني ؛ كيفاش عرفتي الترجمة ديال الأغنية اللي غنيت في الكاراووكي ..
أشرف : حسيت بيك متأثرة بيها ؛عرفتك قصدتيني ؛ و طلبت من عماد يعطيني اسم الأغنية و الله يخلف على عمي يوتيوب
أنا : امممم .. مطور مع راسك ؛المهم أنا وصلت الحمدالله على خير .. نخليك أ حبيبو نمشي نجري نتقدى ل اليوم نبات بلا عشا ..
أشرف : يالاه سيري و متسلمي لا على دڤيد لا على جورج انتي دبا مزوجة ✋
أنا : فاطمة و ايمان و كوثر و نجلاء حتى هوما عطيهم النخال ؛ لنعلفو ليك
أشرف : عيني عليك و خا بعيدة ..
أنا : باااااااي
حليت ڤاليزتي بدلت حوايجي و مشيت جبت العشا ؛ وبديت نتعشا قدام التلفازة ..
واحد شوية لاحظت التيليفون فيكس ك كلينيوطي ؛ الرسائل الصوتية ..
نضت نشوف لقيت أكثر من عشرين رسالة ؛ أوووف ً
بديت نسمع ليهم وحدة بوحدة ..
الرسائل الخمسة الاولى : من الاصدقاء اللي تخلعو عليا و الخدمة .. عادي حيث غبرت و معلمت حد !!
من بعد رسائل الأصدقاء ؛ هاذي رسالة من رقم ممسجلش عندي ؟!!؟
صوت مغريبش عليا ؟! شكون هذا ؟!
ولكنة ديالو فرنسية صحيحة
الرقم المجهول : مرحبا سيدة سارا ؛ حاولت نتصل بيك على الپورطابل ؛ مع الأسف كنلقاه مسدود ؛ عافاك رجعي اتصلي بيا .. ضروري ؛ المسألة في غاية الأهمية
قلبي بدا كدق ؛ خبار الخير يا ربي ..
رسالة من نفس الرقم المجهول : سمحي ليا مخليتش ليك الاسم ديالي ؛ أنا الدكتور جو ليونيل باچو ..
آااااااه الدكتور اللي ديالي واللي دار ليا أنا و جاد الكشف العام ..
مجانيش نعاس حتى وصلت الثمانية ديال صباح و مشيت لعندو العيادة ..
غير وصلت قالو ليا خاصني ناخذ موعد ؛ أصريت حتى هضرو مع الدكتور و قاليهم نتسناه حتى يكمل ..
الثانية و لات عندي نهار .. خفت غير ولدي تكون فيه شي حاجة ؟! حتى أنا كيفاش نسيت موعد المراجعة معاه .. أوووووف
غير دخلت ؛ تقلق مني مكنتش نجاوب على الاتصالات ديالو ..
الدكتور : عيطت ليك على قبل نتائج الفحوصات اللي وصلتني ؟!
أنا : قولي يا دكتور باللي جاد معندو والو عافاك كلشي الا جاد .. قوليا باللي أخيرا قررتي تحيد ليا الغذة الدرقية ؟!
الدكتور : سمعيني ؛ و تهدني ؛ لكل داء دواء ..
أنا : أنا هادية غير قوليا شنو كاين ؟؟
الدكتور : مع الأسف انتي حاملة لمرض
أنا : نحمدك يا ربي جاد ما بيه والو ! آشمن مرض؟!
الدكتور : السرطان ..
أنا : السرطان ؟! و محسيت و مكنحس بوالو؟!
الدكتور : آه ؛ شيء طبيعي ؛ لأنه سرطان صامت ..
أنا : ؟؟؟ في جسمي كامل؟!
الدكتور : هاذ الساعة الأشعة بينات غير الرحم !! خاصنا نعاودوهم .. غاذي نكتب ليك هاذ الفحوصات و خاصك تديريهم بأقرب وقت ؛ عليهم نقدرو نشوفو العلاج المناسب ..
أنا : واخا شكرا ! يعني محكوم عليا نموت ؟!
الدكتور : لحسن حظك تكتاشف مبكر ؛ و نفضل منتسرعوش في الحكم ! ديرهم و من بعد نشوفو .. مع السلامة !
خرجت من عندو و تلقات بيا الدنيا ؛ معرفتش فاش نفكر ؛ كل همي جاد ؛ الا مت لمن نخليه ؟!
لا أشرف لا دارنا قلت ليهم شي حاجة ..كنهضر معاهم عادي واخا صوتي كخوني ؛ كنقوليهم الجو تبدل عليا ..
درت الاشعة و رسلوهم للطبيب ديالي ؛ من بعد يومين غاذي نشوفو ..
هاذ اليومين مقدرتش نصبر فيها .. غير شادة ولدي في ايدي و معنقاه .. كنحاول اللي في جهدي نشبع منو ؛ قبل من الموت ..
وصل الموعد ديالي مع طبيب ..
الدكتور : عندي ليك زوج الأخبار ؛ واحد زوين واحد خايب ..
أنا : بدا بزوين ..
الدكتور : السرطان عندك غير في الرحم .. مدايعش ليك في كامل الجسم
أنا :والخبر الثاني ؟!
الدكتور : الرحم خاصنا نتخلصو منو قبل يعادي ليك مناطق أخرى !
أنا : يعني ؛ منبقاش نجيب ولاد ؟!
الدكتور : مع الأسف ؛ وايني خوذي الأشياء بإيجابية ؛ عندك ابنك جاد!!
وليث إيليان و يارا ؟! حلم أشرف ؟! صافي كلشي مشى ؟!
ياااا الله تحرمت من الطفولة و دبا حتى المستقبل؟؟! شنو درت يخليك مترضاش عليا ؟! تسد في وجهي ألف باب و أنا رضيت ؛ والباب اللي تسنيتو كل عمري ؛ غير تفتح رجع تسد ؟! يا اللللللله يا اللللله
شنو غادي نقول لأشرف ؟! و باش من وجه نواجهو ؟! وكيفاش نقدر نعيش بلا بيه ؟!
دوزت الأيام كاملة بكى حتى نشفو دموعي و بح صوتي .. و تفكير في أشرف ..و قررت نرجع المغرب ونواجه الواقع ؛ الى مكتاب عليا نعيش تعيسة ف مستحيل نتسبب فيها لأغلى أحبابي .. مستحيييل
رجعت المغرب و حالتي حالة ؛ لا مكياج خبى الهلات اللي ولاو عندي لا العيا و لا الحزن اللي مرسوم على وجهي ..
شوفت أشرف وجعتني كثر ما فرحتني .. هذا حبيبي ؛ هذا أغلى ناس قدروني و حطوني فوق راسهم !
أشرف : صافي ؛ بعتي طوموبيلتكً؟! حوايجك عطيتيهم ؟! وليتي لباس عليكً
أنا : كثر ما تتصور يا حبيبي ..
أشرف : وا دوري معايا أ سقرامة ؟! ولا عرضي عليا راه مازال متغذيت
أنا : هي اللولا .. وايني أنا موحشة ماكلة الدار ..

أشرف : والله حتى أنا ؛ هاد الأيامات كنتغذي غير في المطعم ديال الشركة ! الشيف معرفتش منين ضبرو عليه ؛ كطيب برجليه ولا بزز منو
أنا : ماماك في الدار ؟! شنو دارت لغذا ؟!
أشرف : واااقيلة كسكسو ..تسناي نعيط ليها !
الواليدة ويا الوليدة ؛ أش درتي لغذا ؟!
مامات أشرف : فرحان مع راسك ؛ متكون غير سارا جات ؟!
أشرف : اه باش عرفتيها !
ماماه : من نبرة صوتك ؛ الله يخليكم لبعضياتكم ! جيو راني دايرة كسكسو ..
مشينا لعندها .. ورحبات بيا كيف العادة ؛ وصلنا مع الغذا قد قد .. غسلنا إيدينا و تجمعنا مع مالين الدار على الطابلة ..
بابات أشرف : على سلامتك أبنتي .. هناك الله من الغربة
أنا : آااه أ عمي ..
أشرف : وشوش ليا في وذني ؛ أول مرة نشوفك مؤدبة هههه
أنا : تعلمت منك .. انت سبابي !
مبقيتش عارفة نضحك و لا نلقا جواب حتى السلام ! لساني تقال عليا ؛ نخاف نهضر يفضحوني دموعي .. كلشي كان غاذي مزيان ؛ حتى خانتني صحتي ..
أشرف : سارا بغيتيني نوصلك معايا لداركم ؟!
أنا : لا غي سير انت للخدمة ؛ أنا غاذي نبقى شويا مع خالتي ؛ الى معندها حتى شي مانع ؟!
ماماه: انت راك بنتي و الدار داركم .. و آخر مرة تعيطي ليا خالتي ؛ نبغي نسمع غير ماما
هاذ الناس كاملين غاذي نتسبب ليهم في حزنهم؟! علاش جات بإيدي أنا علاش ؟!
مشى أشرف و باباه و خوتو .. بقيت غير أنا و ماماه ..
ماماه : مالكي أ بنتي طايح عليك الضيم ؟! قلقك أشرف في شي حاجة ؛ غير قوليها ليا و حسابي معاه ..
أنا : أشرف ؟! عمرو قلقني ؛ أشرف تاج راسي .. يا ريتني متعرفتش عليه و يا ريتني مت قبل نشوفو .. (سبقوني دموعي)
ماماه: (عنقتني ..) انتي في عار الله أ بنتي ربي يحفظك وينجيك .. قولي ليا مالكي!
أنا : وعديني بالأول متجيبي لسيرة لحد ..
ماماه : لواه أ بنتي .. متحتاجيش توصيتي أنا فحال ماماك
أنا : لا وعديني قدام ربي ؛ متجيبي حد هاذ الهضرة !
ماماه : نوعدك يا بنيتي ؛ غير قولي ليا راك شوشتيني عليكم ؟؟
أنا : مشيت لفرنسا ولقيت رسالة من طبيب ديالي قاليا نعيط ليه ضروري
ماماه : خبار الخير يا مولانا ..
أنا : وملي شفتو قاليا و أكد ليا باللي عندي ااكونصير ديال الوالدة
ماماه (الدموع خيط من عينيها ) : لا حول ولا قوة إلا بالله ؛ قدر الله و ما شاء فعل ؛ قدر الله و ماشاء فعل .. أشرف عارف؟؟
أنا : لا ؛ ومبغيتوش يعرف ؛ حيث ديما كهضر ليا علا الولاد ؛ ودبا غاذين يحيدو ليا الوالدة بمرة ؛ مبقات صالحة لوالو
ماماه : خلي أمرك لله وصلي و دعي ربي يسهل ليك أمورك !
أنا : فين ما جيت نصلح حاجة كنعورها ؛ بغيت نسعد أشرف ؛ أنا غاذي نكون همو .. الولاد اللي حلم بيهم معايا ؛ عمرهم يكونو ..
ماماه : هضري مع أشرف و يحلها ألف حلال أ بنتي ..
أنا : أشرف ولدك قبل يكون ولدي وبابا و حبيبي وراجلي .. كتعرفيه كثر مني ؛ غاذي يبقى معاها فين ما وصلات ؛ وشكون عرف هاذ المرض يجرجرو معايا لسنين طويلة و يحرمو من أبسط حقوقو .. معايا عمرو يحلم بالولاد .. قولي بيا انتي ؛ انا عارفة اشرف كتعزيه كثر من خوتو ؛ وهو عينيك اللي كتشوفي بيهم ؛ متبغيش تشوفي وليداتو ؟!
ماماه : ويلا كان أ بنتي هذا المقدر عليكم شنو بغيتي تديري ..
أنا : يكون مقدر علينا الى كنت أنانية و بقيت معاه ؛ اللهم يبكيني شهر شهرين عام و لا عامين و يتزوج ببنت الناس اللي تجيب ليه ولاد و لا يبكي طول حياتو .. ديما كهضر ليا على الولاد ؛ جاد عمرو يحسسو شنو هو ولد من صلبو ..
نتوما كاملين ما شفت منكم غير الخير ؛ علاش نردو ليكم بالشر ؟! أنا غاذي نكون غير شر عليكم و شر على نسل هاذ العيلة ..
ماماه : معرفت ما نقول ليك أ بنتي .. حسن منك فين نلقاها ؟! غير قولي ليا ونخليك تمشي
أنا : بنات الناس عطاهم الله ؛ واخا متأكدة ميلقاش وحدة تبغيه كثر مني .. أنا اللي نطلب منك غير توقفي معاه ؛ وتنسيه فيا ! إلا عرفني مريضة و مشيت ؛ وجعو غاذي يكون كبير .. أما إلى عرفني مقدرتش نتنازل على فرنسا غاذي يحقد عليا وينساني فيساع .. عافاك أ خالتي ..
ماماه : ربي يعاونك في محنتك و عمري ننساك في صلاتي .. نوعدك أ بنتي ..
أنا : عمري ننساليك خيرك ؛ بغيت غير نبقى نعيط ليك و عطيني خبارو ؛ حتى ربي ياخذ أمانتو .. عمري نشوف مازال في شي واحد غيرو .. أشرف هو حياتي أ ماما ؛ هو كلشي بالنسبة ليا
ماماه ؛ نواعدك أ بنتي ..
أنا : بسلامة ؛ معرفتش واس غاذي نشوفك مرة أخرى ولا لا ؛ غاذي نرجع لفرنسا اليوم بالليل .. ان شاء الله متنسايش تعطيه هاذ الرسالة !
ماماه : واخا أ بنتي طريق السلامة ..
مشيت عند أشرف للخدمة ؛ شفتو لآخر مرة .. باش نرسمو في عقلي و نحفرو فيه
أنا : حبيب ديالي ؛ زوين وانت كتخدم !
أشرف : أووو حولني كنقول علاش الشركة منورة ؛ نورات بيك ؛ آجي بركي ..
أنا : جيت غير نشوفك قبل نمشي للدار ؛ واحد السيد قريب لينا مات البارح من بنسليمان ؛ غاذية مع الدار نعزيو فيه .. غذا نرجعو ..
أشرف : اللله يا ربي ترحمو و توسع عليه..
أنا : سمح ليا ..(قصدت بيها شنو غاذي نتسبب ليه فيه )
أشرف : لا حبيبة معذورة (وهو مسكين ما فاهمش علاش ..)
أنا : بسلامة ؛ تهلى في راسك
أشرف : حتى انتي ؛ كنبغييييك ساراااا كنمووووت عليك
كانت آخر حاجة اسمعت منو ..
عائلتي فضلت منشوفهمش خفت دموعي يغلبوني ؛ عيطت ليهم و قلت ليهم ؛ مبقيتش غاذي نتزوج أنا و أشرف .. و مغاذيش نجي ..
وأنا في طريقي للمطار ؛ الكلمات اللي كتبت ليه في الرسالة ؛ مبغاوش يتفرقو على عينيا و أنا كنسمع في وذني صوت أشرف كرددهم :
أشرف ؛
ملي رجعت لفرنسا ؛ جاني تأنيب ضمير ؛ و لقيت راسي أنانية مع جاد ولدي ؛ وكيف فضلت نعيش حياتي ونغامر بالمستقبل ديالو على أنني نكرس وقتي كلو ليه .. وخفت نهار نولد ليك ؛ متبقاش تهتم بيه كيف الأول و تهملو .. وميكونش بإيدي ندير ليه شي حاجة !
هاذشي علاش ؛ فضلت نعيش حياتي أنا وولدي ؛
وانت ألف بنت تتمناك ؛ والله يلاقيك مع بنت الناس اللي تبغيك و تحطك في عينيها !
هاذا مكعنيش أن كل كلمة سمعتيها مني و لا لحظة عشتيها معايا كانت كذوب .. لا ؛ غير فضلت جاد عليك و عليا !
نتمنى ليك السعادة من كل قلبي .. سامحني .
سارا
عل وعسى الكلمات الباردة اللي في الرسالة ؛ تخليه يفكر أنني عمري بغيتو .. ويا رب تسهليه أمرو و ينساني ..
طلعت للطيارة و في آخر اللحظات اللي غاذي تبعدني على أشرف ؛ استنشقت آخر مرة الهوى اللي داير بيه ..
نعم أنا مطلقة ؛ حالة إجتماعية ؛ و نعم أنا مطلقة سعادة ..
راوغتك و استقويت عليك يا مكتوبي ؛لكن ..
هزمتني يا قدري

 

فستان بألوان القدر

الجزء الرابع و الأخير

وصلت لداري ..

دازت ستة د شهر؛ ستة د شهر اللي كنتضارب فيها مع الوقت و صحتي ؛ ..تابعت فيها حياتي بزز مني و بنفس الروتينيات و كرست فيها وقتي للعلاج و الوقت لاخر كلو مع ولدي .. والليل كنقلب فيه صفحات من الماضي القريب ؛ صفحات كتبتها أنا و أشرف ..اللي رغم المرض و الوقت اللي فات مقدرتش ننساه و مغابش على عينيا حتى دقيقة ..

كيف داير ؟! قدر ينساني ؟! باقي كبغيني ؟! كفكر فيا ؟! كحلم بيا كيف كنشوفو في منامي ؟! الدار باعها ؟! المرايا هرسها ؟! تعرف على شي بنت أخرى ؟! ولا فضل يحتفظ بيا كلي واخا مشيت؟!

حتى واحد ما يقدر يجاوبني على هاذ الأسئلة كاملة غير ماما ثريا (سبحان الله باقا كنقول ليها ماما 😔) ..

هزيت تليفوني و عيطت ليها 📲

أنا : السلام ماما

ثريا(مامات أشرف) :و عليكم السلام أ بنتي ؟؟ سمحي ليا معرفتكش ؟!

أنا : سارا

ثريا :(طريقة تنفسها تبدلات ولات كتنهج ) ويلي يا الحبيبة ديالي ؟! علاش مسولتيش فيا ؟! خلعتيني عليك و نمرتك عيطت لك فيها مليون مرة ديما مسدودة؟؟؟

أنا : ضيعت تليفوني و النمرة مكانتش مسجلة مقدرتش نرجعها ! سامحيني الدنيا و المرض خداوني منك

ثريا : ميهمش مادامك بخير ؛ قولي ليا كيف بقيتي و جاد كيف داير لباس عليه ؟!

أنا : انتي الوحيدة اللي عارفة و مغاذيش نكذب عليك .. انا مرة هاكذا و مرة هاكذاولله الحمد ؛ واخا حيدو ليا الرحم و المرض داع ليا في مناطق أخرى .. دعواتكم نغسل ذنوبي في الدنيا ونلقى وجه ربي بالخير !

ثريا :(كتنخسس بالبكى ) متخافيش أ بنتي ، ربي كبير و ان شاء الله ربي يعافيك .. ويشافيك !

أنا : آمين ؛ يسمع من فمك ربي 🙏🏻 أشرف كيف داير ؟! لباس عليه ، توحشتو أ ماما ، عييت ما نتناساه ونصبر في راسي ؛مقدرتش

ثريا : أش غاذي نقول ليك أ بنتي ؛ حالتو حالة و مبقى يهضر مع حتى واحد غير من الخدمة ل بيتو و حتى الماكلة و الله مكنعرفو فين كياكل ..

أنا : كون غي ربي خداني قبل نتعرف عليه .. ونتسبب ليه و ليكم في هاذ شي

ثريا :ربيً يحفظكً و ينجيك ؛ الحق عليا أنا يا بنتي اللي غلطت وطاوعتك و كنت أنانية و خبيت على ولدي ؛ ولدي يا سارا كضيع من بين يدي .. راه نهار عطيتو الورقة قاليا ليا ميمكنش و سارا كنعرفها حسن من راسها ؛ ميمكنش تلعب بيا ميمكنش أ ماما وضرب في يديه مع الحيط حتى شبع ؛من هذاك نهار مبقى عطاني وجه من غير السلام !؟

أنا : حبيبي يا أشرف ؛ ثيقيني هاكذا حسن ليه متقولي ليه والو .. عافاك خوذي ليه تصويرة جديدة و رسليها ليا في الايميل

ثريا : واخا ابنتي ربي يكون معاك غير الانتيرنيت راني مكنعرفش ليه رسلي ليا العنوان نرسلها ليك اليوم باذن الله ؛ وقولي ليا ل خاصك شي حاجة نرسلها ل بنتي ؟؟!

أنا : ربي يخليك تاج فوق راسو و تشوفيه كيف بغيتي يا رب ؛ نرسل ليك العنوان في ميساج دبا ان شاء الله !

ثريا : ايوا چولي ليا شنو بغيتي ثاني نرسل ليك ؟! شي جليليبة من هاذو اللي خرجو جداد ؟!

أنا : ههههه الصراحة تشهيت حلوة د اللوز ☺️

ثريا : ما يكون غير خاطرك ؛ دبا نمشي نتقدا ليك من المنزه أنا : ربي يخليك 😘

ثريا : بنتي خوذي برأيي و عيطي لعائلتك و قوليها ليهم ؛ ودخلي للمغرب

أنا : الى قلتها ليهم جدة تمشي فيها ؛ و زايد هاذ الشي العلاج هنا احسن و مكنخلص والو ؛ في المغرب غاذي يخصني نخلي دين ورايا باش نتعالج .

ثريا : الى كانت غير قضية الفلوس انا نتكلف بيه ؛ اما من ناحية أحسن عندك الحق أ بنتي تماك حسن من هنا .. وايني واخا هكذاك شوفي كيفاش تمهدي ليهم ؛ واخا مكنبغيش نهدر في هاذ شي ؛ لا قدر الله ووقعات ليك شي حاجة يدفنوك بين ليهود و نصارى؟!

أنا : كوني هااانية فكرت في كلشي و خديت تأمين في البنك الشعبي الى طرات شي حاجة هوما يتكلفو بكلشي

ثريا : وجاد وليدك؟؟

أنا : كتبت وصية عند المحامي ؛ ياخذو باباه،ويلا مبغاش عندي خالتي و بنات خالتي هنا يتكلفو بيه الى قبلو حتى يدير ثمنطاش سنة و بعدها ربي وكيلو ؛ اليتيم غالي عند الله و ربي يدير ليه تاويل يا رب!

ثريا : معرفت من قوليك أبنتي .. ربي يطول في عمرك و تشوفيه عريس و يبقى هاذ الشي غير هضرة

أنا : آمين يا رب ؛ كنت بغيت نقوليك سلمي على أشرف ؛ وايني هبيلة أنا ، نخليك دبا تهلاي في راسك بزااااااااف بزاف 😘

ثريا : في حماية ربي أ بنتي انتي و ولدك و الى بغى الله راني نعيط ليك مرة مرة نسول في بنتي !

غير قطعت معاها قلت مع راسي ويلي أنا مسطية علاش نرسل ليها العنوان ؟؟ ويلا طاح في يد أشرف و فهم باللي في القضية شي حاجة ويلا ماماه عطاتو ليه وقالت ليه سير شوفها ؟! على أي حسيت بيها تنادم معاها الحال .. لا غاذي نسد تليفوني و منعيطش ليها .. عيطت لدارنا سولت فيهم كاملين واحد واحد و سديت تليفوني !

واخا بعدها هضرت مع فاميلتي كاملة ؛ حاجة وحدة بقات في بالي ؛ الهضرة اللي قال أشرف لماماه ..سارا ميمكنش تلعب بيا ميمكنش ؛ ياربي تصبرو و تقويه و ياربي ميحقدش عليا و يطوي صفحتي .. ياااا رب

وفي لحظة تهزيت من الماضي و رجعت واقع آلام المرض و حصص الشيميو ؛ قدر الله و ما شاء فعل ..كل دقيقة كتدوز الا و جاد بين ايديا .. دموعي كغلبوني ملي كنفكر النقص اللي غاذي يقدر يعيش بيه طول حياتو .. واش غاذي يتهلاو فيه ؟!؛ و لا غاذي يتلاوح بين ليدين حتى يكبر ؟! أستغفر الله ربي يتولى أمرو ..

من بعد زوج سيمانات ؛جوايه التسعة و نص ديال الصباح ؛ كنت كنلبس باش نخرج نمشي ل كلينيك .. موعد ديالي مع الشيميو ؛ وكنسمع صونيت ديال الدار ؛ عاوتاني شي حد بغاني نحل ليه للباب ..أوووووف ؛ خلصوني و ندير ليكم عساسة أنا چاع😤

أنا :وويييييي؟! شكون؟!

في الآنتير فون : عافاك تقدري تحلي ليا الباب ؛ نسيت المفاتيح دياولي !!

أنا : واخا .. وعافاك المرة جاية جرب حظك مع شي جار آخر ؛ راني عييت ؟! السلام .

ورجعت نقاد حالتي .. مبقاش ليا الوقت !

ترررررن ترررررررن الصونيت ديال بابي 🤔🤔

أووووووووف “آبلا “عاوتاني ؛ نعناااااع مبقاش وا مبقاااااش كملتييييه 😤😤😤

مشيت نجري نحل الباب على أساس أنها جارتي التركية .. اللي ديما كتجي تاخذ من عندي النعناع ؛ من نهار تزوجات مغربي و أنا كنتصخر ليهم على نعناع ! كنت شاهدة على زواجكم ماشي على أتاي 😤

إييييييڤيت ؟؟؟؟!

حليت الباب و بقيت مصدومة ؛ معرفتش واش الشمش ديال صباح اللي چلباتني و لا عقلي لاعب ماتش ضدي ؟!

أنا : أ أ أشرررف؟!!

أشرف : غاذي تخليني واقف قدام الباب ؟! يا كما جيت فشي وقت ما شي هو هذاك ؟؟

أنا : لا لا دخل ..

دخل و بقينا كنشوفو في بعضياتنا ؛ ضعاف و دار اللحية 👨🏽 سلمت عليه في الدخلة ديال الباب .. مبقيتش لقيت كلامي .. معرفت شنو نچول ليه !

أشرف : نبقى واقف هنا؟! الى مديرونجيك نتلاقاو برا !!

أنا ؛ أ ويلي متچولش هاكذا ، غير تفاجأت .. دخل دخل برك في الصالون !

أشرف : كاس ديال الما عافاك راني شحفانً؟؟

أنا : دقيقة و أنا معاك خود راحتك ؛ شنو تشرب؟! فطرتي و لا مازال ؟!

أشرف : لا فطرت ؛ بغيت غير كاس د الما و آجي بغيت نهضر معاك !

أنا : واخا ..

مشيت للكوزينة و كنتفتف ؛ بقدرت ما فرحت خفت .. خفت من المواجهة معاه .. و الكاس مبقيتش عارفة فين حاطاه ؛ ثلاجة من تلخبيطة مبقاتش كتبان ليا..

هزيت ليه كاس د الما و الكاس كقرقب في الپلاطو .. بالرعدة ؛ غير وصلت للصالون بغيت نحطو قدامو فوق الطابلة ؛ قلبتو بكثرة ما كنتفتف ..

أشرف :سارا ؛ سارا .. تهدني ؛ مكاين والو .. غير بشوية عليك !

أنا : سمحليا ؛ أنا غاذي نجيب ليك واحد آخر ..

أشرف : لا غير بركي أنا غاذي نوض نجيبو !

مشى و خلاني في الصالون مع نفسي .. معرفت فاش نفكر لا منين نبدا .. أشرف ؟؟. أشرف جا؟!

ويلييييي مشى للكوزينة كتشطح بالماعن ؟! يوووووووووو 🙄 شرب في الكوزينة و جاب ليا معاه كاس و جا برك حدايا ..

أنا : إييييه ؛ جيتي خدمة ؟! ولا غير سياحة ؟؟

أشرف: لا هاذي لا ذيك .. جيت على قبلك !!

هضرتو .. كيف ديما نيشان مكعرفش يراوغ !

أنا : ممم مزيان ؛ و كيفاش عرفتي العنوان ؟؟

أشرف : فاتحة معايا تحقيق ؟؟ مفرحتيش ب جيتي؟!

أنا : أكيد ؛ على سلامتك .. غير باقية تحت الصدمة ، متديرهاش مني قلت صواب ..

أشرف : ماشي انتي سارا اللي عرفت ؟؟ التكلفات و الپروطوكولات؟؟ متحتاجيش معايا أنا ماشي عدوك ؟؟

أنا : لا عيب تقول هاكذا ..

قرب مني شد ليا من إيدي و كمل : أنا ماشي عدوك و ارتاحي مغاذي نعاتبك على والو ..

الصونيت ديال تيليفون قاطعت هضرتو ؛ بنص عاين ؛ الدكتور ديالي .. عندي معاه موعد كيفاش ندير يا ربي ..

أشرف : جاوبيً..

هزيت التيليفون جاوبت و كنتمتم و غنلغز في الهضرة .. خذيت تيليفون و بعدت ..

الدكتور : مدام سارا ؛ الحصة ديال اليوم مهمة و خاصك ضروري تجي .. كنتفهم أنك يمكن بدلتي رأيك و قررتي تنازلي .. لكن الأمل كاين ..و

أنا : لا دكتور ماشي هاكذاك ..

الدكتور : خليني نكمل ؛ ديما عرفتك قوية .. عافاك ؛ كملي العلاج ديالك مخاصرة والو .. فكري في ولدك .. عندك نصف ساعة باش تكوني في العيادةً نتسناك !

أنا : واخا أنا جاية دكتور شكرا، و قطعت !

تلفت لقيت أشرف ورا ظهري .. ناري سمعني عل و عسى ميكونش فهم !

أأأأ .. أشرف ؟!!

أشرف : آش كتسناي سربي لبسي صباطك خلينا نمشيو ! يالاه يالاه !

بقيت مفيكسيا ليه عينيه كنحاول نفهم منو ..

أشرف : راني عارف كلشي .. معنديش الخبار بالتفاصيل ملي نرجعو تفهميني وحدة وحدة..

تلاحيت عليه و عنقتو و بديت نبكي ..

دفعني بجهد وشدني من ذراعي بزوج و داني و جابني ؛ وقابلني معاه ..

أشرف : سارا شوفي فيا انتي امراة مؤمنة بالله و قدره خيره و شره و زيادة على هاذ الشي قوية بزاف ! ويد في يد حتى نتجاوزو هاذ المحنة .. أنا وياك ماشي بوحدك فهمتي؟!!

أنا : أشرف ؛ سمح ل…

أشرف : مبغيت نسمع والو .. طلقي راسك غاذيين نتعطلو ..

مشينا لأول مرة من بعد ماتفارقنا حسيت بواحد الاحساس غريب ..شنو من خير درت و وقف معايا حتى تلاقيت بانسان فحالو ؟! شكون اللي تقبلات دعوتو ليا يلاقيني ب مع ما حسن مني ؟! ما غضب عليا ما عاتبني على شنو خليتو عاش .. ومن الفوق جاني حتى الباب داري و ها هو غاذي معايا ؟؟؟؟؟ حچااا كيفاش عرف العنوان ؟!

أنا : أشرف كيفاش..

قاطعني ..

أشرف: اللي عندو لسانو عمرو يتلف ! عقلتي نهار قلت ليك عاودي ليا كللللللشي اللي كتديريه تماك بالتفاصيل و على صحابك و البلايص اللي كتجمعي فيهم ؟؟

أنا: آه عاقلة و ايني عمرني قلت ليك العنوان ؟؟؟

أشرف: لا وايني قلتي ليا ؛ ساكنة في بلاصة كتحمل نفس اسم العالية في المحمدية ؟؟؟! وبالضبط الحجرة العالية

كاينة ولا لا ؟! ونهار قلتي ليا : غاذي تشدني سكتة قلبية الى تعطلتي عليا كون غير كنت بعدة في فرنسا السبيطار قدامي ..يقدرو يعتقوني اما هنا نموت و ميعتقونيش؟!! ونهار قلتي ليا كبنيو في جامع حدا دارك نسيتي مدرتيش ليهم تبرع؟؟

سارا أنا منسيتش ضمة على الحروف اللي سمعتهم منك .. فما بالك ننسى هاذ شي كامل ؟!

أنا : اااااه وايني متقولش ليا دقيتي على ديور الدرب كاملين؟! باش لقيتيني ؟؟

أشرف : كون ملقيتش كفاش كنت غاذي نديرها ..سولت واحد جماعة ديال الولاد و قالو ليا على ليموبل اللي كتسكني فيه و قلبت على كنيتك في الآنتيرفون .. وانتي اللي حليتي ليا الباب..

أنا : منستغربهاش منك .. شحال و انت هنا ؟!

أشرف : دبا شي اربع ايام .. ومناويش نرجع غير باش متحاوليش تفكي مني !!

أنا : لا حاشى .. غير الخدمة ديالك ؟!

أشرف : الخدمة ديالي نقدر نحلها غير بسكايپ والى اقتضى الأمر شي اجتماع و لا راه كاين الواليد ! يعني كوني متؤكدة مية في المية أنني غاذي نكون في وجهك صباح ظهر و عشية ..حتى تبراي ان شاء الله ويلا بغيتي تفكي مني وقتها مووووصيبة ؛ غاذي نكون فرخت انا وياك ! الى تقبلي النصيحة مني ؛ غير بداي تولفي عقلك على وحودي الدائم ✌🏻️

أنا : معرفتش باش من وجه نشوف فيك ..

أشرف : مبغيت نسمع والو من هاذ الخزعبيلات ديالك .. يالاه نزلي حتى انا غاذي نتخشى معاك في سكانير عل و عسى يلقاو فيا شي حاجة فحالك ونتوانسو في الشيميو .. مالكي سبيطار فحال الاوتيل .. وفابور من الفوق

أنا : فال الله ولا فالك ربي ينجيك و يحفظك .. وبديت نضرب فيه ؛ بكية و ضحكة في نفس الوقت !

أشرف: مسمومة حتى شيميو حسدتيني عليه ..يا العفريتة راني سولت و قالو ليا هذاك شي كدوخ بحالا شارب قرعة ديال الڤودكا 😂😂😂بصح ؟؟؟

أنا : لا زدتي فيه غير فحالا واكل شي سطل ديال سلو ومكترين فيه الچوزة .. غير كتهلوس شويا و صافي و كتبدا تچر 😂😂

أشرف : لا صافي بلاش هاذ شي فيه الچران ..بلاش ! آجي الهنا فايتة سايطة في شي سطل على قدو ديال سفوف؟؟ 😂

أنا : اشمن سطولة ديال سفوف و اشمن سطولة ديال شباكية و الحلوة ؟!!! الله يسمح ليا كنت كناكل حق العائلة كاملة ندوز بيه آخر حلقة الكواسر في رمضان 😂

رجعت ليا روحي دخلنا اليد في اليد ؛ فحالا عمرني آذيتو .. ولا هجرتو

استقبلنا طبيب وعرفتو على أشرف وهضرنا شوية و من بعد بديت حصة الشيميو تحت نظرات اشرف ؛ الممرضة وجدات ليا المصل اللي غاذي ندير ..تكيت وعطيتها ايديا ..روتين أسبوعي ..لكن هاذ السيمانة غير كل السيمانات اللي دازو ؛ فرحانة وممثيقاش باللي حبيبي جا لعندي 😍

أشرف كشوف فيا بتمعن وايني كنحاول منبينش ليه الخوف ديالي .. ودايرة فحال غير حاطة سيروم و صافي ..

أشرف : حبيبة نخليك خمسة دقايق وانا جاي ..

أنا : فين غاذي ؟! دبا تودر هنا ..

أشرف : لا غاذي غير نجيب قهوة و ندوز الحمام واني معاك !!

أنا : سير و متعطلش عليا عافاك .. عنداك يبانو ليك شهبات و تبقى حال فيهم عينيك ؟! أشرف 🙄

أشرف : عندك الصح .. عندهم الزين الواحد خاصو يخاف !

أنا : أشرررررررررف 😡😡😡

أشرف : صافي فهمت ها أنا .. غاذي نشوف في الارض منهزش راسي حتى يبان ليا دخلت في شي شهيبة بالغلط ؟! وقتها ميكونش غير شوفان غاذي يكون حتى التماس 😈هاذ شي اللي بغيتي ؟!!

أنا : 😡😡😡 لا صافي غ هز راسك وايني شوف بديطيكتور ؛ شوف غير ضبابة بلا متحنزز و دور وجهك لا حسيتي بشي وحدة جاية قبالتك .. راهم صوبيصات عزيز عليهم ينبشو الواحد .. 😤

أشرف : هاااااا إلى نبشاتني معندي مندير ليك ..

أنا : لا معندك متدير وايني غاذي تربع حدايا و ما غاذي فين .. شوف را بدا يطلع ليا الضغط و المكينة غاذي تصوني و نجمعهم عليك غير الپوچوص على خوه !

أشرف : الى بغيتيني نخشيك في هاذاك الفران بلا عطرية ديريها 😡😡😡انا غاذي

أنا : انت تختار .. يالاه تحرك ومتعطلش !

أووووووه شحال توحشت نتناوش معاه😍😍😍 هو بوحدو كقدر يخدم فيا هاد المود .. طيارة وايني الويفي أكتيڤي 😂

بقيت متكية ودوا كدوز .. داز الوقت و أشرف مازال م رجع ؟! فين غير هذا ..

أنا –>للفرمليا : ختي ؛ حبسي هاذ شي انا جاية

الفرمليا: لا متقدريش تنوضي ؟!

أنا : راني تزيرت بغيت نمشي للحمام

الفرملية : تسناي نجيب ليك فاش تقضي حاجتك !

أنا : امممممم ؛ لا صافي ؛ شوفي ليا غير خطيبي فين هو عافاك وقولي ليه يجي ..

الفرملية : دغيا توحشتيه .. 🤗

أنا : 😬😬😬

وهو يدخل .. أشرف و انا دورت وجهي .. ومكشرة و عاقدة حجباني و مغمضة عينيا

أشرف : حبيبة .. نعستي؟!

أنا : لا

أشرف : راني تعطلت حيث عيطت ل ماما وبقيت كنهضر معاها على برا .. حيث ممنوع تليفون في الكولوار🤓

معرفتش علاش حسيتو ككذب ..

أنا : عيط ليها نيت نهضر معاها ..

أشرف : امممم راني خليتها غاذي تمشي الحمام حتى ندخلو للدار ونعيطو ليها

أنا : اممممم واخا ! شربتي قهوة ؟!

أشرف : قلبت حتى عييت و مبانتش ليا المكينة ديال القهوة !

أنا : واخا ؛ الحمام لقيتيه بعدة ؟!

أشرف : وايلي ضروري .. كون جيتك سورالي فازچ 😂

أنا : امممممم ؛ كجاوك الشهبات؟!

أشرف : تچولي غير عزافات(شطابة ديال صقف والقنات)

أنا : ههههههه صبغني صبغني ! بقينا شي عشرين دقيقة حتى كملت و دازت ملها مناچرة .. غير باش منفتحش معاه تفاصيل المرض حتى رجعنا للدار ؛ عيت منحاول نخبي العيا اللي شدني .. وايني غلبني..

غير وصلت للدار ..

أنا : أشرف خوذ معاك سوارت ديال الدار ؛ وسجل ليا نمرتك عافاك في تليفوني .. ولا بيپي هلى راسك من عندي ،جيب حوايجك من الأوتيل و آجي .. عااافاك متعطلش ☺️

أشرف : واخا غير ارتاحي انتي .. جاد معاش غاذي يجي ؟؟

أنا : جاد متجيبو ليا النونو حتى الستة ؛الايامات الاخرى كتجيبو مع الربعة !

شافني جارة ليزاري خذاه من يدي و فرش ليا فوق الكناپي مقابلة مع تلفزة تسرحت حتى داني نعاس !

ملي ؛ فقت ؛ طليت على الساعة :سبعة نيشان .. 😳😳

جاد ولدي ، ناري البنت محليتش ليها الباب كوراها صونات حتى عيات ؟؟؟؟؟ آش هاد الراحة اللي أنا فيها ؟!!!

نضت كنجري .. غير وصلت الكولوار سمعت ضحك ديال جاد و أشرف جاي من الحمام !

أشرف بصح جا ؟! مكنتش كنحلم؟؟؟ مشيت نجري حليت باب الحمام .. لقيتو مسدود !

أشرف: مبقيتيش كتحشمي باغية تحلي الباب على الرجالة ؟!

لاا سمح ليا حساب ليا جاد بوحدو .. شنو كاتديرو ؟!

أشرف : كيحك ليا جاد ظهري ؟! عندك شي مشكل؟!

أنا : لا لا كون غير فيقتيني نحكو ليك نيت أنا بلا ما تستعبد ليا ولدي ؟! 😈

أشرف : حكانك هذاك اللي مكبردش القلب .. جاد حار عليك !!

بصحتكووووووووووم مسبقا ؛ حك ليا ولدي مزيان وخرجو جديد عافاك 😂✌🏻️

مشيت الكوزينة .. باش نشوف ما نطيب العشا ..

ويليييي ؛ غسل الكركور ديال الماعن اللي كان 😁😁😍 و جمعها .. و كرطونة كبيرة فوق الطابلة ماشي أنا اللي جبتها ؛ غاذي تكون غير الحلوة ..قربت ؛ حليتها لقيت فيها بسطيلة ديال دجاج اممممممم .. منين جابها هاذ جن؟!

و حليت الثلاجة لقيت فيها تقدية جديدة 😍😍😍

وجدت شلاظة و ديسير بالفرماج حلو و الفواكه ..قاديت الطابلة و زوقتها شميعات من هنا و وريدات من لهيه ؛ بدلت حوايجي .. درت البسطيلة تسخن على خاطرها وبقيت قدام تلفازة ..

كنسمع تكهكيه هاذو معوالينش يخرجو ؟! راني مت بجوع ؟

مشيت ليهم : خرجووووو باراكا عليكم الما غاذي يجيني غالي 😤😤 يالاه خرجوووو

أشرف :صافي كنلبسوا علينا .. الا لبغيتينا نخرجو عندك فحال الهنود ؟!

أنا : أشررررررف

أشرف : صافي أ حنا جايين .. دقيقة

مجنون هذا .. نخرجو عندك فحال الهنود .. خرج شكون حبسك 😳😂😂

طفيت الفران على البسطيلة وخليتها فيه باش تبقى سخون ..

أشرف : أوهوووووووووو ؛ الرومانسية عاود ثاني ؟؟ 😍😍

أنا : بصحتكم ؛ جادووووو حبيبي ؛ ماماتي وليدي أنا ..دقيقة نجيب البسطيلة طيلة طيلة 😍

أشرف : بركي اللرض أنا اللي صايبتها أنا اللي نجيبها !!

أنا : صايبتيها ؛ ان شاء الله مخلصتيش بزاف ؟! متأكد انت ليك غير اربع ايام هنا ؟!

أشرف : اليوم الخامس بالظبط .. راه صحيبتي اللي صايبتها غير بردي ؟!

أنا : كون غير علمتيني نقول حتى أنا ل صحيبي يجيب لينا باش ندوزوها .. شي عرق السوس .. والله باباها دجاجة حتى تنوض من البسطيلة تشطح على الدبكة 😈😈😈

أشرف : ساراااااا 😡😡😡

أنا : يالاه طلق راسك راني سخفت و شدني فقر الدم بجوع و ولدي مسكين خرجتيه صفر تقول غير دوشتي ليه بالما بارد؟؟

أشرف : جادوووو بصح بابا ؟!

جاد : نو نو نو پاپا 🤗🤗

بابا ؟!!! فيساع ؟! 😳😳😳 معرفت ما نقول 🤐

أشرف : بسم الله .. يالاه بداو قبل يبرد .. بنين هاذ شي أ جاد ؟! الله يعطيها الصحة

أنا : راه غير فيك جوع .. باسلة حاسلة .. وكثرة فيها السكر تقول قلب اللوز ماشي بسطيلة ؟!

أشرف: باااااز ؛ شنو هاذ قلب اللوز ؟؟

أنا : واحد الحلوة جزائرية دايرة فحال الحرشة مسقية بالعسل بنيييينة ! غذا ان شاء الله نجيبها !

أشرف : امممم واخا ؛ زوينة بيجامتك ..

أنا : حتى پيجامتك جات معاك تقول غ فريد الأطرش ..

كملنا عشانا على نظرات الشوق المتبادلة ..ونعست جاد في بيتو .. وجيت بركت حدا أشرف !

أنا : غاذي تكون عيان .. راك غسلتي سطوك ديال الماعن ؟؟؟! شكرااا

أشرف : إيوا غاذيين يبقاو يتسناوك الحادچة ؟!

أنا : لا راه موصلتش ليهم راه دوا اللي كنشرب .. 😥😥

أشرف : لا والله مقصدت غير بغيت نصحك معاك معرفتش كيفاش تزبقت ليا ..

أنا : عارفة فير باش تتأقلم شوية مع الوضع ..

أشرف : نستاهل نوض نغسل الماعن منخليهمش يباتو .. آجي ونسيني ..

أنا : واخا انت غسل و أنا نشلل ..

أشرف : مشات

درنا فيهم دقيقة ؛ عمرت براد أتاي و تجمعنا عليه في الصالون ..

أشرف : سارا بلا متزيري على هذاك الكاس .. مغاذيش نعاتبك فاهم كلشي و عمري شكيت دقيقة في حبك ليا !

أنا : قالتها ليك ماماك؟!

أشرف : آه عاودات ليا كلشي ..وملي طفيتي التليفون آخر تخلعات بزاف !

أنا : دبا فات الوقت غذاان شاء الله تعيط ليها نعتذر منها

أشرف : غذا مغاذيش نساليو .. غادين نجمعو الاوراق باش نتزوجو ..

أنا : نتزوجووووو ؟؟ كيفاش و فين ؟!

أشرف : بصح كنت ضد نجي نعيش هنا ؛ لكن العلاج حتمها علينا .. كيف قلت ليك أنا مراجعش المغرب ! يالاه تبداي توجدي ليا في دهازي راني مجبتش حويجي من دارنا

أنا : أشرف راني ..

أشرف : جيتي حتى لعندك فهماتك بزاف د الحوايج و الموضوع هذا مباغيش نهضر فيه .. أنا ما بغيت لا ولاد لا والو بغيتك انتي و جاد .. و هاذي هي الفرصة باش نتقربو منها انا وياك لربي !

أنا : بشرط ؛ دارنا ميعرفوش أنني مريضة ؟!

أشرف : مكرهتش يعرفو و نديرو عرسنا كيف حلمناو معاهم

أنا : حالتي مكتسمحش ليا نبعد و لا نستحمل التقاليد ديال العرس😔

أشرف : غاذي نديرو عرس أنا و ياك بطبيعت الحال نعلمو والدينا و نهضر مع ماما يديرو عشى و يتجمعو عليه و نقولو ليهم منقدروش نجيو على حساب طليقك منعك تخرجي بحاد خارج فرنسا

أنا : والله فكرة زوينة 😘😘 بعد المرات كنحير فيك

أشرف : شحال غاذي تعطيني في صداق

أنا : قصدك انت شحال تعطيني في صداقي ؟!!

أشرف : دهاز و صداق كشطيني انت و خليني على الظص ..شحال؟!!

أنا : عشرة د المليون و مكنديرش الكريدي 😤

أشرف : شحااال ؟؟ عشرررررة ؟؟ مجوج ب كريستيانو انا ؟! اما حتى انجلينا راها مشات لدارها فابور

أنا : لا حبيبي مييييسي ميسيييي و ميزي بلا تسقريم

أشرف : أيييه و دهاز ؟!

أنا : بغيت غير حاجة من الحاجة ..سبيبيط لوبوتان ؛ كسيوة ديوغ مونطو شانيل و ساك لوي ڤيتو و الأهم كسيوة د العرس من تصميم إلي صعب .. صافي😳😳😳

أشرف : صاااااااافي ؟! هذا مكان غير حاجة من الحاجة ؟؟

أنا : آه ؛ مانيش جيعانة نقوليك سبعة و لا عشرة ! واحدتون فقط 😬

أشرف : أييه زيدي ؟؟! و العرس فين بغيتيه ؟!

أنا : في نيس .. على البحر .. غير انا وياك و شهود .. على الطريقة الأوروپية ! المهم نديرو غير حاجة خفيفة ؛ يكفيني حضورك و فخامة الفستان ؛ بسطيلة ها هي كليناها دبا 😂😂😂

أشرف : وايني مقيرسة مع راسك .. القضية غاذي تكون ماشي غير حامضة عليا وايني مپومپلوموسية

أنا : غير ارتاح الكوسطار ديالك و الخاتم ديالك على حسابي 😬 انت تكلف بالخاتم ديالي ..

أشرف : والخاتم كيف بغيتيه حتى هو ..

أنا : پلاتين حجرة زمرد و داير بالألماس .. الموديل راني عارفاه كيف داير و فين كاين .. نااااري وتشوفو تحماق عليه .. وغاذي نحفر فيه سميتك 😁😁😁

أشرف : پلاتين يا ربي و إيمرود ؟؟؟؟؟؟ خلينا غير في ذهب سارا

أنا : صافي بلا متبكي .. حتى الخاتم اللي غاذي نشري ليك پلاتين و زمرد غزااااااال و كبير ؛ باش يعرفوك مزوج من بعييييييد 😤

أشرف : دبا نعيط الواليد نقوليه يبيع الشركة و الدار .. 😡😡😡

أنا : صافي ؛ مونطو شانيل مبغيتوش الكسوة ديوغ و حتى سباط لوبوتا وأصلا مغاذينش نديرو عرس و هيلالا 😁 راك اقتاصدتي دبا 🤗

أشرف : صداق عشرة د المليون زيدي عليها واحد العشرة أخرى ديال فستان الي صعب و زيدي عليها الخاتم القليلة شي جوج و نص والله يستر من الموديل اللي عجبك و زيدي عليها الساك ب شي جوج حتى هو و الحفلة على البحر ؟! ها حنا و صلنا لربعين 😤😤😤

أنا : صافي كون كنتي في المغرب كون النچافة و العرس و تريتور و الحلاوي و المشاوي و الاوركسترا و عاد ما تعلق .. كون فتي ستة وستين 😁😁

أشرف : لا كون فت ستة و ثلاتين ولا خيمت فيه .. قلت ليك متبقايش تفرجي في الأفلام اللي كيكملو بالعراسات في الاخر .. تبعي غير فيلم اللي كيموت فيهم شي واحد ؛ باكية كلينيكس بجوج دراهم من حدا الجامع البيض تحرد ليك نيوفك و تماركيك عمرك تفكري في زواج 😤😤