ماعرف العب – غريب ال مخلص

ماهو على كيفك تجي تروح
أختار لك وحده من الثنتين
أما وصل لين المشيب يلوح
ولا فراقٍ لين يوم الدين
باب المفارق والوصل مفتوح
عاد أنت لاتدخل مع البابين
ترى الوصال يعالج المجروح
ولا المفارق جرحه بجرحين

شف لك طريقه يالطيف الروح
لاتسوي مثل سوات أبو وجهين
أن جيت تلقى الخاطر المشروح
وأن رحت مانيب أتبع المقفين
غالي ولك بين الضلوع صروح
ولك منزله تفرق عن الباقين
قلبي ماهو مثل سفينة نوح
كبير لكن مايشيل أثنين

لكن على كل حال يامملوح
كرامتي أغلا من الغالين
نفسي مثل عيني بعيدة شوح
ماتقبل اللي مايسر العين
مالي بطرد المقفيه مصلوح
لو أنها تسوى كنوز الصين
كانك تبي دايم تجي وتروح

علمني وأعلمك من ذا الحين
الحب ماهو تسليه ومزوح
وانا ماعرف اللعب على الحبلين
أما أسقني من وصلك المشحوح
وارو الكبود الضاميه يازين
والا أبتعد عن دربي ومسموح
لو أن حبك في رقبتي دين

كلمات شيلة يتغلى - غريب ال مخلص ومنصور الوايلي
كلمات شيلة يتغلى – غريب ال مخلص ومنصور الوايلي

كلمات: عيسى بن مهل
2019

شاركها.