ثقافة عامة

ماسك الافوكادو لـ الشعر والبشره ميم بوست

السلام عليكم ورحمة الله وبركاته ،

بوست اليوم بيكون عن ماسك الافوكادو ل الشعر والبشره .. شفت طريقته عند صديقتي ريم 
المكونات سهله و الطريقه اسهل :
المكونات :
  • افوكادو ناضجه 
  • علبة روب زبادي
  • ملعقتين طعام عسل
  • ملعقة طعام زيت جوز الهند ا، اي زيت يناسب شعركم
  • اول شي الفوكادو لازم تكون ناضجه ولونها غامج من برا ولينه شوي اما اذا ماكانت ناضجه عدل خلوها يومين او ثلاثه برا الثلاجه وتنضج والبعض قالي احطها بعلبة فيها رز عيش  وتنضج < ماجربتها للامانه >
فيديو شلون تختارون الافوكادو الصح والمناسبه .
طريقة التحضير :
فيديو الي سويته بسناب > :
نقص الافوكادو ونهرسها على الخفيف ونحطها بالخلاط مع الروب والعسل عشان كل المكونات تنخلط عدل ومايصير فيها كتل او قطع 
بعد ما تنخلط ناخذ ملعقتين من الخليط ونخليه ماسك حق الوجه
الباقي من الخليط نظيف عليه الزيت ونخلطه .
طريقة وضع الماسك ع الشعر :
  • افضل شي خلو احد يساعدكم ويحط وياكم لان الي شعرهم طويل نفسي الموضوع متعب شوي *
قسمت شعري  فرق بالنص بدين كل جزء قسمته قسمين وبديت من ورا لجدام وكررت نفس الطريقه لـ الجزء الثاني
ومسكت شعري بكلبسه وحطيت شاور كاب .
المدة: خليته على شعري 1 ساعه و 20 دقيقه بالضبط وغسلته . <الماسك يفضل من ساعه لـ ساعتين لنتيجه افضل وما يزيد عن ساعتين >
طريقة الغسيل : 
اول شي تغسلونه بماي لما يروح من الشعر نهائيا وبعدها تغسلونه بشامبو وتحطون بلسم ع الاطراف
بعدين نشفته بالسشوار هوا فقط .. 
النتيجة :
ماشاء الله ماشاء الله الشعر مترطب وفيه لمعه وطايح مافيه نفشه جني مستشورته حبيته ماشاءالله ماحتجت حتى اعيد على شعري بسشوار .
والحلو فيه مكوناته طبيعية واضمن شنو فيه :* 
وتاثير ماسك الوجه حلو ويرطب :*
بالاسبوع مره لازم تحطون ماسك حق الشعر والوجه عشان يستفيدون اما تحطون بالشهر مره ماكو فايده ولا تاثير لازم استمراريه :* 

في جدول مسويته لـ روتين العناية تقدرون تحملونه وتطبعونه ويساعدكم بالالتزام والتذكير . 
احساس انج مدلعه نفسج شي جدا جدا جميل :* لـان نفسج عليها حق عليج لازم تدلعينها من الداخل والخارج عشان تكونين باحلى صوره .. وهالشي مو بس بالعنايه والاهتمام والمكياج وغيره لا ثقفي نفسج اقري تعلمي شي يديد :* مارسي هوايه تحبينها نميها وطوريها .. انا عن نفسي التدوين ومشاركتكم كل شي احبه هالشي جدا جدا يسعدني ويونسني :* والي يونسني اكثر لما احصل دعوه حلوه او تعليق حلو :*

اظهر المزيد