ثقافة عامة

ماكينة القهوة نسبريسو – معلومات + نصايح + تفاصيل – Nespresso UMilk

السلام عليكم حبيباتي اليوم موضوعنا عن (ماكينة نسبريسو لـ القهوة )

بتكلم عن اكثر تفاصيل مهمة عن المكينة .

يلا نبدي ؟
أنا لي أكثر من سنة أبي مكينة نسبرسو  كل مره أدش المحل اسأل عن المميزات وأجرب  واطلع وما أخذها .. وكان السبب وقتها سعرها غالي وكنت طالبة  حزتها فـ حسيتها تعتبر من الكماليات في أشياء  أهم منها وخشيت فلوسي لي .. لما توظفت بعد جم شهر شريتها الحمد لله  , ( كانت عندي wish list – لستة أمنيات ) كل شهر اشتري شي بخاطري :* ( جربوها حلوه هالفكرة وتوفر عليكم :*)
ليش خذيتها ما خذيت نستله مع أنها تعتبر ارخص وكبسولاتها متوفرة بكل مكان ؟
نستله حلوه وتوافر الكبسولات بكل مكان هالشي حلو وسعرهم زين .. بس ما حسيت النكهات  قويه حيل بالنسبة لي والاهم أنا ما أحب طعم الحليب البودر بالكبسولات أفضل الحليب الفرش والي فيه رغوه .
قبل لا تشترين فكري  شنو احتياجج ؟
شنو المشروبات إلي تحبينها؟
 انا افضل اللاتيه , الكابتشينو  الأشياء إلي فيها حليب ومرات اشرب القهوة ساده , فـ على حسب تفضيلج وميزانيتج .
اما اذا بخاطرج حيل جمعي من مصروفج وتقدرين تاخذينها ان شاء الله .
نوع جهازي :
اسمها Umilk   كنت محتارة بين أكثر من نوع ووحده من متابعاتي الجميلات  اقترحتها علي وإنها مناسبة كـ حجم وأداء ولونها حلو .. ( شكراً روآن :* )
لونها cream  اوف وايت – حبيتها أكثر من اللون الأسود وتلوق مع اثاثي الأبيض ماحبيت اللون يكون شاذ > دقيقه هههههههههه
الجهاز عبارة عن مكينة القهوة +خزان الماي + جهاز الحليب .
( جهاز الحليب يسوي لكم الحليب حار او بارد بضغطة زر ) + ستاند الكوب
مع الجهاز عينات مجانية من كل نوع من أنواع الكبسولات عشان تجربون وتختارون منهم 
سعرها بـ 90 إذا ما خاب ظني – برمضان يسوون عروض لقيت مالتي 65 دك < احتريت 
الكبسولات:
البوكس فيه 10  كبسولات
تختلف حدة الكبسولة وقوتها  بعض الكبسولات قويه على الي مايشربون قهوة دايما وتسبب رقعة بالقلب لان تركيزها و الكافيين قوي ( اسألوا موظفين نسبرسو على تفاصيل أكثر)
في كبسولات دي كاف ( بدون كافييين ) تقدرون تشربونها بليل وماتسهركم
الكبسولات الي حبيتهم : كل اسم مع الوصف مقتبس من موقع نسبرسو
اربيجيو
تحميص داكن لحبات الأرابيكا النقية من جنوب ووسط أمريكا، تتمتع أربيجيو بشخصية قوية وقوام حاد، وهي معززة بإحساس الكاكاو.
فولوتو
حبات بن أرابيكا النقية، محمصة بشكل خفيف وقادمة من جنوب أمريكا لتكشف عن فولوتو بنكهة البسكويت اللذيذة والغنية، وهي معززة بحموضة خفيفة.
إن التوازن بين حبات الأرابيكا من جنوب ووسط أمريكا مشوية بشكل خفيف مع روبوستا، يعطي روما إحساساً عذباً وخشبياً ونكهة متكاملة ومديدة.
لينتزو لونغو
يتم تحضير لينيزيو لونغو من حبات الأرابيكا النقية القادمة من جنوب أميركا، إنها خلطة متجانسة من القهوة البرازيلية والكولومبية. وينتج التحميص المنفصل حبات مختمرة نموذجية لأنواع البوربون، مع المحافظة على شخصيتها المعتدلة السلسة.
الكبسولات لاتقطونها تقدرون تسون لها اعادة تدوير ويصير عندكم سنفرة قهوة خياليه :*
حرارة القهوة :

سمعت اكثر من معلومة انه حرارة القهوه ممكن تتغير بالاعدادات 
 بحثت وجربت وسالت ..وما لقيت حل لهالمشكله وهالشي من سياسة شركة نسبريسو انه القهوه تكون دفية مو حاره لحماية المستهلك من الحروق والخطر انه تنكب القهوه عليه

،هالشي يعتبر مبزه لان صارلي موقف ( الكوب طاح من ايدي والقهوه انكبت علي بس الحمدلله لانها دافية ماصار فيني شي ) 

الاهتمام بـ مكينة القهوة :
بين أكثر من استخدام لازم تتنظف عشان تتم عمر أطول معاكم . 
·       تضغطون على زر عمل القهوة بدون ما تحطون اي كبسولة راح يطلع وياكم ماي لونه بني وتتنظف من داخل
·       تنظيف جهاز الحليب : تغسلونه بماي قبل وبعد الاستخدام
·       بعد الاستخدام غسلوا بماي وحطو صابون مواعين وخلوها تتنقع شوي ( اذا ما غسلتوه لي ثاني يوم تطلع ريحه كريهة في جهاز الحليب ) >   ( علمتني عليها موظفة بـ نسبرسو )
. في محلول خاص باجهزة نسبرسو تشترونه منهم لـ تنظيف الجهاز من الداخل .
·       بالسنة مره تودونها عند الورشة ينظفونها لكم * سالو الموظفين على رقم الورشة *
رايي فيها : ممتازه كـ اداء ، انيقة ، تناسب حاجتي ، حجمها مناسب بـ اختصار وقعت بغرامها 💜
تمت ، 
اتمنى استفدتو، من البوست واكون غطيت جميع النواحي :*
 اي استفسار كتبولي بالـ تعليقات :*

اظهر المزيد