التعامل مع الخوف من المجهول

انك تخاف وتقلق ده احساس عادي وبشري لكن ان الخوف يسيطر عليك اكيد ده شئ مرضي ومن خوفك علي بكره تخليه يضيع منك ويجري وتحبس نفسك في سجن مجهول وكمان عليه تبكي, اوع تنسي ان بكره بإيد الخالق مش بيدك ولا بيدي.

الخوف احساس بشري وصحي كمان لكنه زيه زي اي شئ تاني لو زاد عن حده بينقلب ضده, واحنا فى الدنيا بنشوف ناس خايفه من الموت وناس خايفه من الفقر وناس خايفه من المرض وناس تانيه بتخاف من بكره ومن الي شايله, وناس تخاف من المجهول وللأسف الحاله دي منتشره اوي عند ناس كتيره يمكن بسبب الظروف والأحداث الي بنمر بيها ازاي هنتعامل مع شعور الخوف والقلق؟؟

الخوف مشاعر فسيولوجيه مشاعر موجوده عند اي حد في الدنيا كلنا بنخاف… المشكله هو انت بتعمل ايه بالخوف او الخوف بيعمل فيك ايه ؟؟ لكن احساسك بالخوف ده شئ طبيعي جداً ممكن تكون خايف علي ولادك على صحتك على مالك, هو الخوف انه يتحول الي خوف مرضي, بمعني ان لو حد قلك ماتعملش كذا عشان معملش كذا فممكن حجات كتير جداً ترهبني عشان اخاف والطرف التاني يكسب والانسان بينطبق عليه الشعور بكافته كمثال تهديد الابن او الاخ …الخ لما بنتعرض للخوف بيحصل حاجتين مهمين جداً يا اما فايت او فلايت يعني يا اما بهرب بنزوي بخاف فعلاً يا اما بفايت او بهاجم او بقبل التحدي والفيصل بين كل واحد فينا هو انت هتنزوي ولا هتحارب او هتقاوم عشان كدا اللعب بالخوف في منتهي الخطوره, اوع تخوفني لان انت لما تخوفني يا اما هخاف يا اما هنفجر, محمود درويش كان عنده مقوله حلوه جداً بتقول ( إذا قلتها مت وإذا لم تقلها مت فقلها ومت ) الفكره ان احنا كتير جداً بنخوف الناس او بنخاف واكتر حاجه الانسان بيخاف عليها آمنه او الامان ممكن واحده تتجوز جوازه فاشله لإنها خايفه إنها تتأذي ان كان بدنياً او معنوياً, احنا مولودين بغريزة البقاء او بغريزة الدفاع عن الذات فلما بتخوفني بخاف على نفسي في الأول ولو الخوف ده تحول الي خوف مرضي هنعزل وهخاف وهفضل في الجوازه دي لإن انا خايف, لكن الخوف ده عباره عن سويتش وكل واحد علي حسب درجة تحمله يعني ممكن واحده تتجوز جوازه فاشله وتستحملها عشرين سنه وفي الآخر تقرر انها تطلق ساعتها خلاص قلبت السويتش يا اما كذا يا اما هطلق القصد ان لما الواحد بيوصل لدرجة معينة من التحمل يتحول الخوف الي إرادة تغيير وربما للعنف, وكل واحد حسب درجة تحمله يعني انا ممكن ارهبك سنه غيرك ممكن يخاف 6 شهور غيره اعلي غيره اقل وبما اننا من الشعب المصري واحنا عرفين الشعب المصري يصبر على جار السو خمسين ستين ويقول دول فكه فإحنا النقطه الحرجه عندنا بطيئه جداً, لكن انا شايف في المرحله الي احنا فيها كلنا مبقاش الناس تخاف …. خالص وده ايجابي لكن كل حاجه ليها شق سلبي, فكرة انك ماتخافش ده شئ كويس جداً لكن انك ماتخافش وتبقي متهور هي دي الخطوره, والي بيحصل دلوقتي مش مرحلة خوف دي مرحلة كراهية يعني ابقي خايف منك وبكرهك يا اما هخاف منك جداً وهبعد يا اما انا بخاف منك وبكرهك فهتحول الي انسان شرير او هتحول الي انسان عنيف وهأذيك.

فكرة اني اسمع كلام ناس ذكائهم محدود جداً اقل مني ويطلع يفتي في اي كلام والناس تصدقه لإن الناس بتخاف وهي دي لعبة الخوف, يعني انت بتخوفني بحاجه لا انا ولا انت ماسكينها ؟؟ طب اثبتلي ان انا هخش النار كمثال او شعب مصر كله مهدد بالقتل الجماعي زي ما كتير جداً بيفتو, كلام كله لا يخضع للمنطق وبالتالي لما يكون مركز التحكم بتاعي صاحي او عقلي شغال بشوف كل وجهات النظر بعدين بعقل وباخد قرار, كل ما يكون مركز التحكم بتاعك الداخلي وكل ما يكون الفرز بين الكلام الفارغ والكلام الجاد كل ما يكون ثقتك بنفسك أعلي, ثقتك بنفسك بتيجي من ايه ؟؟ بتيجي من شكلك – موضوعك – ادائك الاجتماعي بمعني شكلك حلوه ولا وحشه او حلو ولا وحش ومفيش حد وحش علي فكره كل واحد فيه جوانب كويسه وجوانب مش كويسه وربنا ما بيخلقش حد وحش الا اذا كان مهمل في نفسه زي ما ييجي حد يقلك انت عينيك حلوه شوف عينيك حدد إن كانت حلوه زي ما الناس بتقول بعدين ثق بنفسك, طيب موضوعك هو انت بتعمل ايه فحياتك فيه الي تكون ربة منزل ده دور مهم جداً ثقي بنفسك, كتير جداً يحصل خلافات بين الزوجين ممكن يكون زوجك عملي وانتي رومانسيه هو بيحبك بطريقته طب ليه ماتجربيش تحبيه بطريقته, هو لما يحب بيجيب شيكولاته ومابيجيبش ورد ايه المشكله كل واحد فينا بيعبر عن حبه بالطريقه الى هو شايفها.