ريفيو مصفف الشعر بيبيليس
السلام عليكم يا بنات 👧
بوست النهارده ريفيو عن جهاز بيبيليس
اسمه : مصفف الشعر المتعدد 10 في 1 انفينيتيكس
الاول قبل استخدام اى جهاز بيعرض شعرك للحراره
لازم حمايه قبله عشان نقلل من اضراره
وكنت اتكلمت في بوست سابق بالتفصيل
عن طريقه حمايه الشعر من الحراره
والمنتجات المستخدمه وده الرابط بتاعه
المميـــــــزات :
1- يحتوي على اكثر من راس بتتركب فيه ممكن تعملي بيهم
اشكال كتيره , يعني مثلا فيه جزء السيراميك اللى بيفرد الشعر له
مفتاح عالجنب ممكن تغيريه بدل ما يفرد الشعر يعمله كُسر صغيره ,
و معاه ثلاث مقاسات لكيرلي 25ملم ,16 ملم و الثالثه مزدوجه ,
معاه كمان راس فرشاه بلاستيك بس من رايي ملهاش لازمه .
2- شكل التصميم بتاعه حلو لونه ابيض في بينك و فيه تفاصيل كويسه .
عيوبــــــه :
1- بياخد وقت طويــــــل في الاول لغايه ما يسخن .
2- مفتاح التشغيل فيه مستويين واحد و اثنين لكن مش مذكور واحد درجته كام و اثنين درجته كام .
3- تأثيره ضعيف ,انا شعري فيه كسر خفيه و لما بستخدمه لفردها مش بيفردها كويس ، ونفس النتيجه لو هعمل شعري كيرلي ، فبياخد وقت طويل جدا في الاستخدام ، طبعا غير المجهود ان ايدك بتفضل متعلقه طول الوقت 😖 ، و لو شعرك طويل شويه هتبقى مُعاناه 😧😥، وبعد كل التعب ده هما عشر دقايق ربع ساعه بالكتير و هتلاقي شعرك ولا كأنك عملتي اى حاجه 😱😱 لان تاثيره عالشعر مش قوي .
الخلاصه على الرغم من انه متعدد الاستخدام وتفاصيله حلوة الا اني منصحش بيه ابدا لانه هيهدر وقتك ومجهودك والحاله الوحيده اللى ممكن استخدمه فيه هو لشعر بناتي لو في مناسبه لانه هيبقى خفيف على شعرهم 👱.
تم ❤ ❤
لو عندك اى سؤال اكتبيلي بالتعليقات
او على حسابي بالانسغرام archnoka@
اذا عجبتك التدوينه او استفدتي منها
ارجو نشرها على مواقع التواصل
