كلمات شيلة يالوع حالي

كلمات شيلة يالوع حالي ، كلمات شيلة يالله يا مجري هماليل الأمطار ترفق بحال اللي غدا البعد عوقه

كلمات شيلة يالله يا مجري هماليل الأمطار

يالله يا مجري هماليل الأمطار
ترفق بحال اللي غدا البعد عوقه
يا واحدٍ سيلك مع القاع حدّار
برقك في قيعان القفر لاح موقه
يالله يا مسقي هزيلات الأشجار
ترفق بحال اللي همومه تسوقه
أسوق حزني وانظم القاف واختار
والنفس من طبع العذول مْحروقه
يندار فكري دورة الريح لا دار
والياس شوف العين لاحتْ بروقه
يا لوع حالي لوع من علّق وطار
الريح ضدّه والحمامة تعوقه
أقفى له صياحٍ ولا عنده خْيار
وعقب الفضا صارت قصيرة سبوقه
طب الشبك واقفى على كف صقار
ونفسه من البرقع حزينة زهوقه
الجول لا شافه تليّم ولا ذاار
هو خابر انّه مرهيٍ في لحوقه
قرناس بكرٍ كنه الملح لا ثار
اليا نطحته زاهياتٍ دقوقه
الريش من ضربه غداله تنثّار
ونفسه على المطلاع دايم تتوقه
قلبي هفا هفوة كسيرٍ وسط غار
إنبح صوته والحيايا تفوقه
ما نفعه هشّه ولا أطلعه مار
لين إنلدغ من كسره اللي يعوقه
أنا بليت بحبهم دون ما اختار
ونفسي على تالي قدرها شفوقه
ما عاد لي قلبٍ على الغبن صبّار
والروح من كثر الهموم مخنوقه

 

 

شاركها.