ثقافة عامة

Erin Condren Life Planner منظم ارن كوندرن وتجربتي وياه =)

السلام عليكم :, 
اليوم موضوعنا راح يكون عن البلانر او بلغتنا المنظم وايد وصلتني اسئله عليه 
شنو اهو ؟ شنو فكرته ؟ من وين ؟ بجم ؟
بالبدايه .. المنظم في انواع شهري وسنوي ويومي  , في منظمات فقط للمواعيد والتواريخ المهمه خلال الشهور والسنه ..
 انا عن نفسي ما احب هالنوع احب التفصيل بشكل اكبر يعني احب المنظم اليومي كل يوم بيومه وانظم اسبوع كامل بصفحتين يبين عندي شنو بسوي خلال هالاسبوع كله وشنو مواعيدي والاشياء المهمه .
ف بعد تجربه لعدة انواع من البلانرز (المنظمات )  قررت اخذ بلانر من
 ( Erin Condren ) وخلاص اخترت وجذي .. فاجاتني انسانه غاليه ويابتها لي هديه مشكوره :** 
اكثر شي حمسني اني اخذها من اليوتيوبرز الاجانب حيل يشوقون واهما يستخدمونها ويبدعون !! والي عجبني فيها انه في مساحه اكتب كل شي !! يعني اليوم الواحد مقسم لثلاث اقسام :
فترة الصبح
فترة الظهر
فترة الليل
واكتب بكل جزء شنو ابي ومخططه اسويه .. 
وبجذي تبرمجت انه لما ابطلها اي حزه اشوف الجزء الي بهالوقت يعني اليوم مايكون عايم على بعضه !
وادوخ مادري وين اطالع .
حيل ارتحت عليها ونظمت الاسبوع عندي بشكل فعال ومريح ..
كوالتي الورق ممتاز والغلاف قوي ومغلف تغليف حراري يتحمل الكرف 🙂 
كل شهر له لون معين وعباره تشجعيه ومحفزه غير عن الشهر الي قبله .. وبنهاية البلانر في ستكرز + نوت منفصل صغير تقدرون تاخذون معاكم بالجنطه او تخلونه بنهاية البلانر .
موقع طلب البلانر :
مسوين خصم على البلانرز لحقوو =)
لازم عندكم فيزا الكترونيه + عنوان شحن امريكي
الموقع عنده شحن دولي بس البريد الامريكي اضمن =) 
واذا ماتعرفون تطلبون تقدرون تكلمون اي احد يطلبلكم وياخذون عموله ع الطلب اعتقد في ناس 
بالــ instsgram  يوفرون هالخدمه 🙂
هذي المقدمه عن البلانر  ومن وين تطلبونها وشنو اقسامها ..
الجزء الثاني عن (( الستكرز والتزيين ))
هالشي يعتمد على ذوقكم الشخصي وشنو تحبون ستايل البلانر من داخل يكون ..
انا عن نفسي احب انسق بالتزيين ويكون ملون ويفتح النفس هالشي يشجعني انه انا اكتب وانظم اكثر .. وكل من يشوف البلانر مالتي سواء بسناب او الي معاي بالدوام يستانسون عليها
 والبعض يقولي انتي وايد وايد فاضيه !!! -.- “ ؟؟
اي فاضيه اني ارتب نفسي ويومي واشغل نفسي بشي مفيد واحس اني انجز ولو بشي بسيط !! يمكن البعض يشوفه تافهه.
انزين انا طلعت عن الموضوع وايد هههه 
الستكرز احصلهم بـ بنترست في ناس يصممون ويخلونهم جاهزين لطباعه بس الي عليكم تاخذون ورق ستكر (مطفي ) وتحطونه بالطابعه وتضغظون امر طباعه .
ليش ورق ستكر مطفي .؟ عشان يثبت الحبر على الورق اولا وثانيا تقدرون تكتبون عليه باي نوع من الاقلام . تحصلون بكل المكتبات موجود .
ومرات انا اصمم ستكرز خاص فيني بـ برنامج الفوتوشوب ..وتقدرون تسوون ببرنامج الوورد Word في وايد شروحات باليوتيوب تعلمكم على تصميم الستكرز ..
جم فيديو يعلمونكم على تصميم الستكرز :
وانا بحسابي بـ بنترست حاطه board  كامل كله افكار عن البلانر عجبوني وستكرز تقدرون تحملونهم ..
وبس هذا موضوعنا اليوم اتمنى انكم استفدتو منه ..ووضحت لكم الفكره شوي ..
البوست الياي بحطلكم موضوعين واختارو اي واحد نكتب عنه .. 
  • نظمو يومي معاي Plan With me ?
  • افكار لتنظيم لـ يوم منجز  .

instagram : @meim .post
Snap Chat : Mdiym

تعليقاتكم تسعدني 🙂

اظهر المزيد